ខេត្តស្ទឹងត្រែង៖ វត្ថុតាងបម្រើអោយបទល្មើសបំផ្លាញធនធានធម្មជាតិយ៉ាងច្រើនសន្ធឹកសន្ធាប់ ត្រូវបានដុតកំទេចចោល កាលពីព្រឹកថ្ងៃទី២០ កញ្ញា ស្ថិតនៅស្រុកសៀមបូក ក្នុងខេត្តស្ទឹងត្រែង ដោយមានការចូលរួមពីរដ្ឋមន្ត្រីក្រសួងបរិស្ថាន ។
ភូមិសាស្ត្រខេត្តស្ទឹងត្រែងមានតំបន់ការពារធម្មជាតិតំបន់ការពារធម្មជាតិដែលមានទំហំផ្ទៃដីសរុបចំនួន៤១៤.១៧៧,៧៣ហិកតា និងរបៀងអភិរក្សជីវៈចម្រុះប្រព័ន្ធតំបន់ការពារធម្មជាតិទំហំផ្ទៃដីសរុបចំនួន៣៩០.៧៤៤,១៥ហិកតា សរុបមានផ្ទៃដីសរុបចំនួន៨០៤.៩២១,៨៨ហិកតា ក្នុងនោះ រួមមានឧទ្យានជាតិវីរៈជ័យ មានផ្ទៃដី៩៩ ១៥០ ហិកតាឧទ្យានជាតិវ៉ឺនសៃ សៀមប៉ាងមានផ្ទៃដីទំហំ៤៤.៨១៧ហិកតា ដែនជម្រកសត្វព្រៃសៀមប៉ាងមានផ្ទៃដី១៣៣.៧០៧,៧៣ហិកតា ដែនជម្រកសត្វព្រៃ-ព្រៃឡង់មានផ្ទៃដី១២១ ៩០៣ ហិកតា តំបន់រ៉ាមសារមានផ្ទៃដី១៥៤.៦០០ ហិកតា លាតសន្ធឹយបណ្តោយទន្លេមេគង្គ ប្រវែងប្រមាណ៣៩គីឡូ ។
ស្ថិតក្នុងទំហំចំនួនផ្ទៃដីខាងលើ មន្ត្រី និងកម្លាំងមានសមត្ថកិច្ចគ្រប់ផ្នែកបាន សហការអនុវត្តច្បាប់ទប់ស្កាត់បទល្មើសនានាក្នុងដែននៃតំបន់ការពារធម្មជាតិ ប៉ុន្តែបញ្ហាបទល្មើសមួយចំនួននៅ មានឡើយដូចជា ការកាប់ឈើ ការកាប់រានឈូសឆាយដីធ្វើកម្មសិទ្ធិ ការបរបាញ់ដាក់អន្ទាក់ និងការប្រើប្រាស់ឧបការណ៍ល្មើសច្បាប់ផ្សេងៗការប្រើប្រាស់កាំភ្លើងកែច្នៃជាដើម។
ទាក់ទិនការបង្ក្រាបប្រមូលដកហូតចាប់យក រាល់វត្ថុតាងបទល្មើសដែលបំផ្លាញធនធានធម្មជាតិ នាពេលកន្លងមកហើយត្រូវដុតកំទេចចោលនានេះ រួមមាន កាំភ្លើងកែច្នៃ (ខ្យល់) និងកាំភ្លើងកែច្នៃ (កាចិន)សរុប៩៥ដើម ស្នាតេះ ៦១ដើម ក្បាលឆក់៧១គ្រឿងខ្សែអន្ទាក់៣៣២៧ខ្សែម៉ងដាក់ស្វា២៦ត្បូង ដោយ៦០ម៉ែត្រ និងអង្គប់៥៨អង្គប់ ។
រដ្ឋមន្ត្រីករសួងបរិស្ថានលោក សាយ សំអាល បានលើកឡើងថា ការការពារធនធានធម្មជាតិ គឺជាការរក្សាលំនឹងបរិស្ថាន ធ្វើយ៉ាងណាអោយប្រជាសហគមន៍បងប្អូនឧទ្យានុរក្សទទួលបាននូវជីវភាព និងសុខុមាលភាពកាន់តែប្រសើរជាងមុន ។ ជម្រើសថ្មី សម្រាប់បងប្អូនឧទ្យានុរក្ស និងប្រជាសហគមន៍ គឺការដាំចំការឈើដាំដូចជា ប្រភេទដើមអាកាស្យា ការដាំដំណាំហូបផ្លែ ដំណាំបន្ទាប់បន្សំ ការចិញ្ចឹមសត្វ ជុំវិញផ្ទះ និងក្នុងសហគមន៍ ដើម្បីធានាសន្តិសុខស្បៀង និងកាត់បន្ថយសំពាធទៅលើការពឹងអាស្រ័យលើធនធានធម្មជាតិទាំងស្រុង។
គោលដៅដ៏សំខាន់ ក្នុងវិស័យបរិស្ថាន គឺការប្រែក្លាយពីទំនៀមទំលាប់នៃការពឹងអាស្រ័យអនុផលព្រៃឈើលើជីវភាពរស់នៅរបស់បងប្អូនក្នុងមូលដ្ឋានឲ្យទៅជាការចូលរួមអភិរក្សធនធានធម្មជាតិ និងជីវៈចម្រុះគ្រប់ប្រភេទ នៅក្នុងតំបន់ការពារធម្មជាតិ និងការរស់នៅដោយចីរភាព សម្រាប់ជាឧត្តមប្រយោជន៍យូរអង្វែងរបស់ប្រជាជនគ្រប់រូប និងគ្រប់ជំនាន់ក្នុងព្រះរាជាណាចក្រកម្ពុជា។
គួរបញ្ជាក់ថានេះ ជាកម្មវិធីលើកទី២ដែលក្រសួងបរិស្ថានបានរៀបចំដុតកំទេចចោលវត្ថុតាងបម្រើអោយបទល្មើសធនធានធម្មជាតិ ដែលកាលពីថ្ងៃទី២៦ ខែវិច្ឆិការឆ្នាំ២០២០ បានដុតកំទេចចោលនូវត្ថុតាងចាប់យកដកហូតបង្ក្រាប ប្រមូល ក្នុងភូមិសាស្ត្រស្រុកសៀមប៉ាងខេត្តស្ទឹងត្រែង ៕
ចែករំលែកព័តមាននេះ