កងទ័ពអីុរ៉ាក់កាលពីថ្ងៃទី២៣ កុម្ភៈ ទទួលបានជ័យជម្នះសំខាន់ថ្មីក្នុងការវាយរំដោះក្រុងម៉ូសស៊ុលជាមួយការវាយដណ្តើមយកបានព្រលានយន្តហោះទីក្រុងនោះដែលនឹងប្រើធ្វើជាឈ្នាន់សម្រាប់ការវាយលុករបស់ខ្លួនប្រឆាំងពួកយុទ្ធជនក្រុមរដ្ឋអ៊ិស្លាមនៅភាគខាងលិចនៃទីក្រុងនោះ ។
កងកម្លាំងរដ្ឋាភិបាលរុលទៅមុខយ៉ាងលឿនចូលបណ្តាតំបន់ជាយក្រុងនៅភាគខាងត្បូងក្រុងម៉ូសស៊ុលជាទីក្រុងធំទី២របស់ប្រទេសចាប់តាំងពីកងទ័ពនោះចាប់វាយលុកលើភាគខាងលិចក្រុងពីថ្ងៃទី១៩ កុម្ភៈមក ហើយក្រុមរដ្ឋអ៊ិស្លាមរងការវាយប្រហារចេញពីរណសិរ្សជាច្រើន ។
យោងតាមអ្នកកាសែតម្នាក់របស់រ៉យទ័រដែលមានវត្តមាននៅភាគខាងត្បូងព្រលានយន្តហោះថា កងកម្លាំងប៉ូលិសសហព័ន្ធ និងកងឯកភាពនៃក្រសួងមហាផ្ទៃហៅកងប្រតិកម្មរហ័សបានធ្វើការវាយលុកប្រឆាំងអគារទាំងឡាយនៅព្រលានយន្តហោះកាន់កាប់ដោយពួកយុទ្ធជនក្រុមរដ្ឋអ៊ិស្លាមដែលប្រើបណ្តារថយន្តផ្ទុកគ្រឿងផ្ទុះបើកដោយពួកជនអត្ត ឃាតដើម្បីរារាំងការរុលទៅមុខរបស់ពួកគេ ។
បន្ទាប់មកទូរទស្សន៍រដ្ឋអីុរ៉ាក់ប្រកាសពីការដណ្តើមកាន់កាប់ទាំងស្រុងព្រលានយន្ត ហោះនេះដែលរងការខូចខាតយ៉ាងខ្លាំង ។ បណ្តាកងឯកភាពពិសេសរបស់ទីភ្នាក់ងារប្រឆាំងភេរវកម្ម CTS ក៏ចូលរួមក្នុងការប្រយុទ្ធដោយវាយដណ្តើមយកមូលដ្ឋានយោធាមួយស្ថិតនៅក្បែរព្រលានយន្តហោះហើយដោយបន្តរុលចូលឆ្ពោះទៅកាន់សង្កាត់ TAL AL RAYYAN និងសង្កាត់ AL MAMOUN ៕
ចែករំលែកព័តមាននេះ