តារា២រូបរងការរិះគន់ ក្រោយបង្ហោះសារសរសើរវីរភាពម្ចាស់ក្សត្រី អេលីហ្សាប៊ែតទី២
ហុងកុង ៖ លោកស្រី Carina Lau បានក្លាយជាតារាហុងកុងចុងក្រោយ ដែលត្រូវបានអ្នកនិយមលេង
ហុងកុង ៖ លោកស្រី Carina Lau បានក្លាយជាតារាហុងកុងចុងក្រោយ ដែលត្រូវបានអ្នកនិយមលេង
ហុងកុង ៖ លោកស្រី Carina Lau បានក្លាយជាតារាហុងកុងចុងក្រោយ ដែលត្រូវបានអ្នកនិយមលេងបណ្តាញសង្គមនៅចិនរិះគន់ ចំពោះការបង្ហោះសាររំលែកទុក្ខព្រះមហាក្សត្រីយ៍ អេលីហ្សាប៊ែតទី២ (Queen Elizabeth II) នៃចក្រភពអង់គ្លេស ដែលយាងសោយទិវង្គតកាលពីថ្ងៃទី៨ ខែកញ្ញា ឆ្នាំ២០២២ ក្នុងព្រះជន្ម ៩៦ព្រះវស្សា ដោយព្រះជរាពាធ បន្ទាប់ពីគ្រងរាជ្យសម្បតិ្តបានរយៈពេល៧០ឆ្នាំ។
លោកស្រី Carina Lau កំពូលតារាសម្តែង និងចម្រៀងកូនកាត់ហុងកុង-កាណាដា អាយុ៥៦ឆ្នាំ បានចែករំលែកព្រះឆាយាលក្ខព្រះមហាក្សត្រី អេលីហ្សាប៊ែតទី២ នៅលើបណ្តាញសង្គម Instagram កាលពីថ្ងៃទី៩ ខែកញ្ញា ដោយសរសេរជាភាសាចិនដើម្បីបង្ហាញការរំលែកទុក្ខ និងការគោរពចំពោះម្ចាស់ក្សត្រី អេលីហ្សាប៊ែតទី២ ដែលបានធ្វើជាអធិបតីក្នុងរជ្ជកាលដ៏យូរអង្វែង និងស្ថិរភាពក្នុងសង្គមដែលមានការផ្លាស់ប្តូរយ៉ាងឆាប់រហ័ស។ ហើយការបាត់បង់ទ្រង់គឺជាការបាត់បង់ដែលមិនអាចជំនួសបានក្នុងសម័យកាលរបស់យើង។
Carina Lau ដែលដើរតួជាអតីតអធិរាជចិន Wu Zetian ក្នុងខ្សែភាពយន្ត Detective Dee (2010-2018) មិនបានបង្ហោះសារនេះ នៅលើបណ្តាញសង្គមចិន Weibo នោះទេ។ ប៉ុន្តែទោះយ៉ាងណា កាលពីពេលថ្មីៗនេះ អ្នកនិយមលេងបណ្តាញសង្គមចិនបាននាំគ្នាយកសារនោះ ទៅបង្ហោះលើបណ្តាញ Weibo ដើម្បីបញ្ចេញមតិ ដោយពួកគេភាគច្រើនបង្ហាញការមិនពេញចិត្តចំពោះការបង្ហោះរបស់ Carina Lau។ ហើយអ្នកខ្លះទៀត ថែមទាំងប្រាប់គាត់កុំឱ្យត្រឡប់ទៅប្រទេសចិនវិញ។
អ្នកផ្សេងទៀតបានលើកឡើងអំពីសង្គ្រាមអាភៀនលើកទី១ អំឡុងឆ្នាំ ១៨៣៩ ដល់ ១៨៤២ ដែលបានប្រគល់កោះហុងកុងទៅឱ្យចក្រភពអង់គ្លេស។ ប៉ុន្តែទោះយ៉ាងណា Carina Lau នៅមិនទាន់មានការឆ្លើយតប ឬប្រតិកម្មនឹងការរិះគន់នេះនៅឡើយទេ។
គួររំលឹកថា កាលពីថ្ងៃទី១៥ ខែកញ្ញា លោក Law Kar Ying តារាសម្តែងហុងកុង និងអ្នកសម្តែងល្ខោនហ៊ីចិនដ៏ល្បីល្បាញផងនោះ បានចេញមកធ្វើការសុំទោស និងបង្ហាញអំពីវីរភាព ស្នេហាជាតិរបស់គាត់នៅក្នុងវីដេអូមួយលើបណ្តាញ Weibo បន្ទាប់ពីរងការរិះគន់ចំពោះការលើកសរសើរអំពីម្ចាស់ក្សត្រី អេលីហ្សាប៊ែតទី២ នៅក្នុងការបង្ហោះលើបណ្តាញ Instagram ដែលក្រោយមកគាត់បានលុបចេញ៕ (ដកស្រង់ចេញពី The Star)
ចែករំលែកព័តមាននេះ