រាជធានីភ្នំពេញ ៖ តារារ៉េបល្បីល្បាញឈរបានតំណែងលេចធ្លោអស់ជាច្រើនឆ្នាំមកហើយនោះ គឺឌីជេ ខេក នៅតែបង្ហាញស្នាដៃបទចម្រៀងបែបកូនខ្មែរ ជូនប្រិយមិត្តគាំទ្រដូចពីមុនដដែល ដោយភាគច្រើនទទួលបានការទាក់ទាញពីមិត្តអ្នកស្តាប់អ្នកទស្សនាលើប្រព័ន្ធសង្គម ក៏ដូចជាតាមយូធូបផងដែរ ។
ថ្មីៗនេះ លោកឌីជេខេក បានបង្ហោះបទថ្មីស្នាដៃរបស់កូនខ្មែរ ច្នៃដោយគំនិតខ្ពស់នៅតាមប្រព័ន្ធយូធូប បានធ្វើឲ្យសង្គមហ្វេសបុកនិងយូធូបចាប់អារម្មណ៍ និងចូលមូលស្តាប់កម្សាន្តពីផ្នែកទាំងអស់ ក្នុងបទចម្រៀងព្រមទាំងតួសម្តែងមានរំលេច ដោយតួកម្ពុជា និងតារាបរទេសច្រៀងផងដែរ។
កាន់តែពិសេសជាងនេះ លោកខេក ថែមទាំងបង្ហាញស្នាដៃរបាំខ្មែរបង្ហាញពីភាពពត់ពេនគ្រឿងលម្អរបស់ខ្មែរបុរាណសម្លៀកបំពាក់ប្រពៃណីជូនមហាជនបានទស្សនា ពិសេសបរទេសទាំងឡាយក៏ចាប់ចិត្តភ្ញាក់ផ្អើល ចំពោះការបង្ហាញស្នាដៃថ្មីសន្លាងនេះ ។ បទថ្មីនេះមានចំណងជើងថា «I AM OLD SCHOOL» ក្រោមការសហការផលិតបទចម្រៀង ជាមួយបរទេសប៉ុន្មានជាតិសាសន៍ ។
បទថ្មីរបស់ឌីជេល្បីឈ្មោះនេះ បានអាប់ឡតចូលយូធូបតាំងពីថ្ងៃទី២២ កុម្ភៈ មកម្ល៉េះ ដោយមានរបាំខ្មែរឧបករណ៍ភ្លេងខ្មែរមានរចនាថខ្លុយ ដែលសុទ្ធសឹងតែជាប្រភេទឧបករណ៍ មានសារប្រយោជន៍ មានការច្នៃប្រឌិតបានហើយ អាចបង្ហាញនូវភាពរីករាយសម្រាប់អ្នកស្តាប់ អ្នកទស្សនា ដែលមិនគួរមើលរំលងឧបករណ៍ទាំងនោះបាន ។
បញ្ជាក់ប្រាប់អ្នកយកព័ត៌មានយើង ឌីជេខេកបានថ្លែងថា លោកពិតជារីករាយ ក្រោយអាប់ឡតបទថ្មីនេះចូលយូធូប មានអ្នកទស្សនាច្រើនគួរជាទីកត់សម្គាល់ ។ នេះជាអ្វីដែលលោកបានព្យាយាមខិតខំធ្វើទាំងយប់ទាំងថ្ងៃជាមួយជនជាតិបរទេស ដែលស្រឡាញ់និងគាំទ្រសិល្បៈខ្មែរយើង ។ លោកបន្តថា ឆ្លើយតបនឹងការបង្ហាញបទថ្មីនេះ លោកក៏មិនបញ្ឈប់ការបញ្ចេញបទថ្មីទាំងអស់នេះទាំងស្រុងនោះទេ ពោលនៅតែមានបន្តបន្ទាប់អ្វីដែលជាស្នាដៃកូនខ្មែរ ដើម្បីឱ្យប្រជាជនយើងបានរីករាយ និងជួយលើកកម្ពស់ស្នាដៃបទចម្រៀងកូនខ្មែរជាបន្តទៀត។
ចែករំលែកព័តមាននេះ