រាជធានីភ្នំពេញ ៖ មន្ត្រីប៉ូលិសផ្នែកអន្តរាគមន៍នៃអធិការដ្ឋាននគរបាលខណ្ឌដង្កោម្នាក់ បានបាញ់ខ្លួនឯងធ្វើអត្តឃាតគួរឱ្យរន្ធត់ និងភ្ញាក់ផ្អើលយ៉ាងខ្លាំងនៅក្នុងបន្ទប់ធ្វើការរបស់ខ្លួនផ្នែកអន្តរាគមន៍នៃអធិការដ្ឋាននគរបាលខណ្ឌដង្កោកាលពីវេលាម៉ោង១២និង១៥នាទីថ្ងៃត្រង់ ទី១៧ មីនា ២០១១ ។
មន្ត្រីប៉ូលិសម្នាក់នេះឈ្មោះហ៊ុន សំអឿន អាយុជាង៣០ឆ្នាំ…គេមិនទាន់ដឹងថា មានស្រុកកំណើតនៅខេត្តណានៅឡើយទេ…ពេលចូលទៅមើលក្នុងបន្ទប់កើតហេតុ គេឃើញសពដួលផ្ងារក្រោយ ដោយជើងដាក់គងលើកាំភ្លើងអាកាដែលមន្ត្រីប៉ូលិសរូបនោះប្រើប្រាស់ ហើយនៅលើក្បាលសពមានឈាមហូរធ្លាក់ទៅលើកម្រាលឥដ្ឋដែលគេសន្និដ្ឋានថា មន្ត្រីប៉ូលិសម្នាក់នេះបានបាញ់ក្បាលខ្លួនឯង…ការធ្វើអត្តឃាតរបស់មន្ត្រីប៉ូលិសម្នាក់នេះមិនបានទម្លាយអាថ៌កំបាំងឱ្យគេដឹងថា មូលហេតុអ្វីទើបគាត់ធ្វើអត្តឃាតនោះទេ។
មន្ត្រីប៉ូលិសរួមការងារជាមួយហ៊ុន សំអឿន បាននិយាយឱ្យដឹងថា គេមិនដឹងពីមូលហេតុនៃការធ្វើអត្តឃាតនោះទេ ប៉ុន្តែគេដឹងថា ហ៊ុន សំអឿន តែងតែផឹកស្រាស្រវឹងរាល់ថ្ងៃ…ពេលស្រវឹងម្តងៗ ហ៊ុន សំអឿន និយាយរវើរវាយផ្តេសផ្តាស និងរកសម្លាប់ខ្លួនឯងញឹកញាប់…ហ៊ុន សំអឿន មានជីវភាពក្រីក្រ និងមានជំងឺប្រចាំ កាយ…។ ពេលនេះប៉ូលិសខណ្ឌដង្កោកំពុងតែត្រួតពិនិត្យសព និងស្រាវជ្រាវរកសាច់ញាតិដើម្បីមកទទួលយកសពទៅធ្វើបុណ្យតាមប្រពៃណី ។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព .
ចែករំលែកព័តមាននេះ