រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានជំរុញឲ្យសហគ្រិនវ័យក្មេងក្នុងវិស័យទេសចរណ៍ចូលរួមការប្រកួតប្រជែងសហគ្រិនវ័យក្មេងពិភពលោក ថែមទាំងប្រកាសផ្តល់អ្នកជំនាញឲ្យជួយ
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានជំរុញឲ្យសហគ្រិនវ័យក្មេងក្នុងវិស័យទេសចរណ៍ចូលរួមការប្រកួតប្រជែងសហគ្រិនវ័យក្មេងពិភពលោក ថែមទាំងប្រកាសផ្តល់អ្នកជំនាញឲ្យជួយរៀបចំដំណើរការអាជីវកម្មទៀតផង ។
លោករដ្ឋមន្ត្រីថ្លែងបែបនេះ នៅក្នុងឱកាសបើកសិក្ខាសាលាផ្សព្វផ្សាយស្តីពី « ការត្រៀមខ្លួនរបស់សហគ្រិនវ័យក្មេងក្នុងវិស័យទេសចរណ៍កម្ពុជា ដើម្បីចូលរួមការប្រកួតប្រជែងសហគ្រិនវ័យក្មេងពិភពលោកឆ្នាំ២០១៧» កាលពីថ្ងៃទី២៣ កុម្ភៈ នៅទីស្នាក់ការគណៈកម្មាធិការជាតិអូឡាំពិកកម្ពុជា ។
លោករដ្ឋមន្ត្រីបន្ដថា សហគ្រិនវ័យក្មេងដែលទើបដំណើរការអាជីវកម្មរបស់ខ្លួន សូមចូលរួមប្រកួត ហើយការប្រកាសជ័យលាភី នឹងប្រព្រឹត្តទៅនាឱកាសវេទិកាទេសចរណ៍ពិភពលោក (World Tourism Forum) នៅទីក្រុង Luoem ប្រទេសស្វ៊ីស ក្នុងអំឡុងខែឧសភា ឆ្នាំ២០១៧ខាងមុខ ។ ការចូលរួមប្រកួតក្នុងព្រឹត្តិការណ៍នេះ នឹងផ្តល់ឱកាសឲ្យសហគ្រិនវ័យក្មេងកម្ពុជាទទួលបាននូវគំនិតថ្មីៗ ក្នុងការអភិវឌ្ឍអាជីវកម្មរបស់ខ្លួន ព្រមទាំងចូលរួមផ្សព្វផ្សាយទេសចរណ៍ ក៏ដូចជាកិត្យានុភាពកម្ពុជា នៅលើឆាកអន្តរជាតិឲ្យកាន់តែខ្លាំងក្លាថែមទៀត ។
ជាមួយគ្នានេះ លោករដ្ឋមន្ត្រីក៏បានប្រកាសផ្តល់អ្នកជំនាញបរទេសដល់សហគ្រិនក្នុងវិស័យទេសចរណ៍ ដែលមានតម្រូវការផ្នែកបច្ចេកទេសក្នុងការបង្កើតអាជីវកម្មថ្មី ដោយក្រសួងទេសចរណ៍អញ្ជើញអ្នកជំនាញប្រមាណជាង៧០០រូបក្នុងបណ្តាញរបស់ខ្លួន ដែលភាគច្រើនជាអ្នកជំនាញចូលនិវត្តន៍មានបទពិសោធន៍ខ្ពស់ ក្រោមកិច្ចសហការជាមួយអង្គការ Swisscontact ។
លោករដ្ឋមន្ត្រីក្រសួងទេសចរណ៍ ក៏បានប្រកាសឲ្យមណ្ឌលអាជីវកម្មទេសចរណ៍ទាំងអស់ចូលរួមបណ្តុះបណ្តាលជំនាញដល់បុគ្គលិករបស់ខ្លួន ក្នុងទម្រង់ជាការបណ្តុះបណ្តាលខាងក្នុង (In-House Training) ដោយក្រសួងនឹងផ្តល់កម្មវិធីបណ្តុះបណ្តាល ព្រមទាំងជួយបណ្តុះបណ្តាលម្ចាស់អាជីវកម្ម ឬអ្នកគ្រប់គ្រងឲ្យមានសមត្ថភាពបណ្តុះបណ្តាលបន្តដល់បុគ្គលិករបស់ខ្លួន ។
គួរបញ្ជាក់ថា នៅឆ្នាំ២០១៦កន្លងទៅ កម្ពុជាទទួលបានភ្ញៀវទេសចរជាតិចំនួន៥លាននាក់ កើនឡើង៥% និងបង្កើតការងារសរុប (ការងារផ្ទាល់ និងមិនផ្ទាល់) ចំនួន២,៣លាននាក់ ប្រមាណជាង២៧% ក្នុងនោះបង្កើតការងារផ្ទាល់ប្រមាណ១,២លាននាក់ស្មើនឹង១៤%នៃការងារសរុប ដោយបង្កើតចំណូលចូលសេដ្ឋកិច្ចជាតិប្រមាណជាង៣ពាន់លានដុល្លារ ស្មើនឹង១៣,៥%នៃផលិតផលក្នុងស្រុកសរុប(GDP)៕
ចែករំលែកព័តមាននេះ