តំបន់សេដ្ឋកិច្ចពិសេសប៉ោយប៉ែតនឹងទាក់ទាញវិនិយោគិនជប៉ុនកាន់តែច្រើន
រាជធានីភ្នំពេញ ៖ សេដ្ឋវិទូកម្ពុជាបានសម្តែងនូវសុទិដ្ឋិនិយមថា តំបន់សេដ្ឋកិច្ចពិសេសប៉ោយប៉ែតនឹងទាក់ទាញវិនិយោគិនជប៉ុនកាន់តែច្រើនមកកម្ពុជា បន្ទាប់ពី
រាជធានីភ្នំពេញ ៖ សេដ្ឋវិទូកម្ពុជាបានសម្តែងនូវសុទិដ្ឋិនិយមថា តំបន់សេដ្ឋកិច្ចពិសេសប៉ោយប៉ែតនឹងទាក់ទាញវិនិយោគិនជប៉ុនកាន់តែច្រើនមកកម្ពុជា បន្ទាប់ពី Poipet PPSEZ Co. Ltd បានចុះអនុស្សរណៈយោគយល់គ្នាជាមួយក្រុមហ៊ុនថៃ ដើម្បីបញ្ជូនប្រព័ន្ធអគ្គិសនីមានគុណភាពមកកាន់តំបន់នេះ ។
កាលពីថ្ងៃទី២០ កុម្ភៈ កន្លងទៅ ក្រុមហ៊ុន Poipet PP SEZ Co. Ltd ជាបុត្រសម្ព័ន្ធរបស់ Phnom Penh SEZ PLC បានចុះអនុស្សរណៈយោគយល់ជាមួយក្រុមហ៊ុន B. Grimm Power Public Company Limited ជាសមាជិករបស់ក្រុមហ៊ុន B. Grimm Group របស់ប្រទេសថៃ ក្នុងការផ្ដល់សិទ្ធិផ្ដាច់មុខឲ្យក្រុមហ៊ុនថៃមួយនេះធ្វើការអភិវឌ្ឍ និងប្រតិបតិ្តការសមត្ថភាពបញ្ជូនថាមពលអគ្គិសនី តាមរយៈកិច្ចព្រមព្រៀងជាវថាមពលអគ្គិសនី (PPA) សម្រាប់តំបន់សេដ្ឋកិច្ចពិសេស Poipet PP SEZ កំពុងស្ថិតក្នុងដំណាក់កាលសាងសង់នៅឡើយ ។
ការចុះអនុស្សរណៈនេះ នឹងអនុញ្ញាតឲ្យក្រុមហ៊ុនទាំងពីរសិក្សាលទ្ធភាពសម្រាប់ការសាងសង់ខ្សែបញ្ជូនថាមពលទំហំ២២គីឡូវ៉ុល ដែលមានចម្ងាយ១២,៤គីឡូម៉ែត្រសម្រាប់ដំណាក់កាលដំបូង ដោយតភ្ជាប់តំបន់សេដ្ឋកិច្ចពិសេសនេះជាមួយអនុស្ថានីយចែកចាយថាមពលនៅក្រុងប៉ោយប៉ែត ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ ថ្លែងថា តាមរយៈការចុះកិច្ចព្រមព្រៀងនេះ លោករំពឹងថា ក្រុមហ៊ុនជប៉ុននៅប្រទេសថៃកាន់តែច្រើននឹងមកវិនិយោគនៅកម្ពុជា ដោយសារតម្លៃពលកម្មនៅប្រទេសថៃឡើងខ្ពស់ ហើយថៃកំពុងជួបការខ្វះខាតកម្លាំងពលកម្ម ដោយសារម៉ាស៊ីនសេដ្ឋកិច្ចរបស់ថៃបានឡើងដល់កំពូលរួចទៅហើយ ។ លោកបន្តថា ក្រុមហ៊ុនវាយនភ័ណ្ឌនៅប្រទេសថៃមានជាង២ពាន់ក្រុមហ៊ុន ពួកគេនឹងមកពង្រីកផលិតកម្មនៅកម្ពុជា បន្ទាប់ពីកិច្ចព្រមព្រៀងនៃការបញ្ជូនបណ្តាញអគ្គិសនីប្រកបដោយគុណភាពមកពីប្រទេសថៃ ។
លោកបន្ថែមថា ក្រុមហ៊ុនផ្គត់ផ្គង់អគ្គិសនីថៃនេះ ជាក្រុមហ៊ុនឈានមុខគេ ខ្លាំងជាងគេមួយក្នុងការចែកចាយបណ្តាញអគ្គិសនី ពេលក្រុមហ៊ុននេះទៅកាន់ទីណា ក្រុមហ៊ុនជប៉ុននឹងទៅកាន់ទីនោះជាមួយគ្នា ហើយអនុស្សរណៈនេះ ខ្មែរក៏ចំណេញ ថៃក៏ចំណេញ តាមរយៈការសហការគ្នាក្នុងរូបភាពកម្ពុជាជាកូនពៅ ថៃជាកូនច្បង ហើយជប៉ុនជាអ្នកមកវិនិយោគ ។
លោកបណ្ឌិត ម៉ី កល្យាណ បន្តថា ៖ «គម្រោងនេះមិនផ្តល់ផលចំណេញតែផ្នែកសេដ្ឋកិច្ចប៉ុណ្ណោះទេ ប៉ុន្តែវាផ្តល់ផលចំណេញដល់សង្គមផងដែរ តាមរយៈការកាត់បន្ថយការធ្វើចំណាកស្រុករបស់ប្រជាពលរដ្ឋកម្ពុជាទៅកាន់ប្រទេសថៃ ។ ដូច្នេះ រាជរដ្ឋាភិបាលគួរតែជំរុញការងារនេះបន្តទៀត ព្រោះនេះជាផ្នែកមួយនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ » ។
លោកស្រី Preeyanart Soontornwata ប្រធានក្រុមហ៊ុន B. Grimm Power បានឲ្យដឹងថា ការវិនិយោគនេះមានទំហំទឹកប្រាក់ចន្លោះពី២ទៅ៣លានដុល្លារ ។ តាមរយៈនេះ ក្រុមហ៊ុននឹងផ្ដល់សមត្ថភាពផ្គត់ផ្គង់បន្ថែមទៀតទៅតាមតម្រូវការរបស់ក្រុមហ៊ុន ដែលនឹងប្រតិបត្តិការនៅក្នុងតំបន់សេដ្ឋកិច្ចមួយនេះនាពេលអនាគត។លោកស្រីបន្តថា គម្រោងនេះមិនត្រូវការថវិកាធំពេកទេ ហើយសម្រាប់ដំណាក់កាលដំបូង គឺត្រូវបោះទុនវិនិយោគ៣លានដុល្លារប៉ុណ្ណោះ ។
លោកជំទាវឧកញ៉ា លីម ឈីវហូរ ប្រធានក្រុមហ៊ុន Phnom Penh SEZ PLC ថ្លែងថា កិច្ចព្រមព្រៀងថាមពលនេះ នឹងជួយឲ្យមានការអភិវឌ្ឍកាន់តែធំ ផលិតកម្មជំនាញខ្ពស់ដូចជាគ្រឿងអេឡិចត្រូនិកជាដើម នៅក្នុងតំបន់សេដ្ឋកិច្ចពិសេស Poipet PP SEZ ។ ក្រុមហ៊ុនកំពុងសម្លឹងមើលការវិនិយោគពីក្រុមហ៊ុនផលិតកម្មរបស់ប្រទេសជប៉ុន ដែលត្រូវការអគ្គិសនី ដោយក្រុមហ៊ុនភាគច្រើនក្នុងចំណោមក្រុមហ៊ុនទាំងនោះប្រតិបត្តិការរួចហើយនៅក្នុងតំបន់សេដ្ឋកិច្ចពិសេសភ្នំពេញ ៕
ចែករំលែកព័តមាននេះ