រាជធានីភ្នំពេញ ៖ ការសិក្សារបស់គណៈកម្មាធិការផលិតភាពកម្ពុជារកឃើញថា សុខុមាលភាពក្នុងវិស័យកាត់ដេរ និងស្បែកជើងកម្ពុជានៅតែមានភាពល្អប្រសើរ ដែលមានលក្ខណៈវិទ្យាសាស្ត្រ និងជំនាញវិជ្ជាជីវៈ ។
រាជធានីភ្នំពេញ ៖ ការសិក្សារបស់គណៈកម្មាធិការផលិតភាពកម្ពុជារកឃើញថា សុខុមាលភាពក្នុងវិស័យកាត់ដេរ និងស្បែកជើងកម្ពុជានៅតែមានភាពល្អប្រសើរ ដែលមានលក្ខណៈវិទ្យាសាស្ត្រ និងជំនាញវិជ្ជាជីវៈ ។
លោក អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានបើកកិច្ចប្រជុំដើម្បីពិនិត្យមើលសុខុមាលភាពក្នុងវិស័យវាយនភ័ណ្ឌកាត់ដេរ និងផលិតស្បែកជើងកម្ពុជា ក្រោមការរៀបចំដោយគណៈកម្មាធិការផលិតភាពកម្ពុជា កាលពីល្ងាចថ្ងៃទី២០ កុម្ភៈ កន្លងមកថា នៅឆ្នាំ២០១៦កន្លងមក គណៈកម្មាធិការផលិតភាពកម្ពុជាបានលើកអនុសាសន៍ជាយុទ្ធសាស្ត្រ និងគោលនយោបាយមួយចំនួនសម្រាប់ក្រសួងពាក់ព័ន្ធដើម្បីពិភាក្សា និងពិចារណាក្នុងការចាត់វិធានការអនុវត្ត សំដៅដោះស្រាយបញ្ហាប្រឈមនានា និងជាការរៀបចំយុទ្ធសាស្ត្រ និងផែនការសកម្មភាពពាក់ព័ន្ធនឹងសមត្ថកិច្ចរៀងខ្លួន ដើម្បីលើកកម្ពស់ទំនាក់ទំនងការងារ សុខុមាលភាព និងផលិតភាពរបស់កម្មករនិយោជិត ការដឹកជញ្ជូនទំនិញ ព្រមទាំងស្ថានភាព និងនិន្នាការក្នុងវិស័យឧស្សាហកម្មកម្ពុជា ក្នុងនោះរួមទាំងការបន្តជំរុញ និងលើកកម្ពស់សេដ្ឋកិច្ចពលកម្ម ផលិតភាពពលកម្ម និងភាពប្រកួតប្រជែង ។
យោងតាមលទ្ធផលនៃការសិក្សាស្រាវជ្រាវរបស់លេខាធិការដ្ឋានរកឃើញថា វិស័យនេះមានភាពល្អប្រសើរ ដែលមានលក្ខណៈវិទ្យាសាស្ត្រ និងជំនាញវិជ្ជាជីវៈពាក់ព័ន្ធនឹងគោលនយោបាយ ក៏ដូចជាម៉ាក្រូសេដ្ឋកិច្ច ដែលមានភាពចាំបាច់ក្នុងការដាក់ឱ្យអនុវត្តគោលនយោបាយពាក់ព័ន្ធផងដែរ ។
កិច្ចប្រជុំរបស់គណៈកម្មាធិការផលិតភាពកម្ពុជាលើកទី៤នេះ មានការចូលរួមផងដែរពីរដ្ឋមន្ត្រីក្រសួងអប់រំ យុវជន និងកីឡា លោកហង់ ជួនណារ៉ុន លោក សុខ ចិន្តាសោភាអគ្គលេខាធិការក្រុមប្រឹក្សាអភិវឌ្ឍន៍កម្ពុជា និងមន្ត្រីពាក់ព័ន្ធមួយចំនួនទៀតដើម្បីពិនិត្យលើលទ្ធផលសិក្សាស្រាវជ្រាវរបស់លេខាធិការដ្ឋានគណៈកម្មាធិការផលិតភាពកម្ពុជា ក្នុងឆ្នាំ២០១៦។ កិច្ចប្រជុំនេះមានគោលបំណងដើម្បីពិនិត្យលើលទ្ធផលនៃការសិក្សារបស់លេខាធិការដ្ឋាន គ.ផ.ក. នៅក្នុងឆ្នាំ២០១៦ លើបញ្ហាសុខុមាលភាព និងផលិតភាពពលកម្មរបស់កម្មករក្នុងវិស័យវាយនភ័ណ្ឌកាត់ដេរសម្លៀកបំពាក់ និងផលិតស្បែកជើងនៅកម្ពុជា ។
តាមរយៈកិច្ចប្រជុំនេះ ក្រុមមន្ត្រីពាក់ព័ន្ធបានផ្តល់អនុសាសន៍ណែនាំ និងកំណត់បន្តអនុវត្តវិធានការមួយចំនួនដូចជា បន្តការសិក្សាបន្ថែមលើបញ្ហាមួយចំនួនទៀតពីផលិតភាពពលកម្ម និងប្រកួតប្រជែង និងតាមវិស័យ ដើម្បីបន្តរក្សាកំណើនសេដ្ឋកិច្ចដោយចីរភាព ។ ការបន្តពិនិត្យលើការពង្រឹងការបណ្តុះបណ្តាលជំនាញ ដែលចាំបាច់សម្រាប់ការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ ដើម្បីបន្តពង្រឹងគុណភាពនៃការបណ្តុះបណ្តាល និងការឆ្លើយតបតាមតម្រូវការទីផ្សារ។ ការជំរុញឲ្យក្រសួងស្ថាប័នពាក់ព័ន្ធបន្តបង្កើនកិច្ចសម្របសម្រួលក្នុងការជំរុញ និងលើកកម្ពស់សេដ្ឋកិច្ចពលកម្ម ផលិតភាពពលកម្ម និងភាពប្រកួតប្រជែង ក៏ដូចជាការអនុវត្តនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ និងការកំណត់ទិសដៅឲ្យលេខាធិការដ្ឋាន គ.ផ.ក. បន្តការងារសិក្សាស្រាវជ្រាវឱ្យកាន់តែស៊ីជម្រៅដើម្បីគាំទ្រការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ ផងដែរ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា វិស័យកាត់ដេរនៅតែមានភាពរឹងមាំ ហើយវិស័យនេះនៅតែជាចន្ទល់យ៉ាងសំខាន់សម្រាប់ទ្រទ្រង់កំណើនសេដ្ឋកិច្ចជាតិ ដែលត្រូវការការយកចិត្តទុកដាក់ចំពោះសុខុមាលភាពរបស់វិស័យនេះ ។ លោកបន្តថា ទោះបីជាការនាំចេញផលិតផលកាត់ដេរស្បែកជើងទៅអាមេរិកធ្លាក់ចុះក្តី ប៉ុន្តែការនាំចេញទៅអឺរ៉ុប ជប៉ុន និងប្រទេសមួយចំនួនទៀតបានកើនឡើង ។
លោកបន្តថា ៖ « ការធ្វើពិពិធកម្មរបស់វិស័យនេះបានធ្វើឲ្យកម្ពុជាទទួលបានតម្លៃបន្ថែមកាន់តែច្រើន ។ នៅពេលរោងចក្រកាត់ដេរកាន់តែច្រើន ធ្វើការផលិតទំនិញដែលមានតម្លៃខ្ពស់ជាងមុន » ៕
ចែករំលែកព័តមាននេះ