រាជធានីភ្នំពេញ ៖ អ្នករត់ម៉ូតូឌុបម្នាក់ត្រូវជនមិនស្គាល់មុខមួយក្រុមមានគ្នា៥នាក់ ស្ទាក់វាយនឹងដុំថ្មផុងលលាដ៏ក្បាលបណ្តាលឱ្យស្លាប់ពេលបញ្ជូនទៅសង្គ្រោះដល់មន្ទីរពេទ្យកាល់ម៉ែត កាលពីវេលាម៉ោង១០ព្រឹក ថ្ងៃទី២១ មីនា។ ការស្ទាក់វាយរហូតដល់ស្លាប់នេះត្រូវសមត្ថកិច្ចឱ្យដឹងថា កើតឡើងកាលពីវេលាម៉ោង១០យប់ ថ្ងៃទី២០ មីនា នៅតាមផ្លូវK5 ភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ ខណៈពេលជនរងគ្រោះដឹកម៉ូយជាជនដៃដល់ម្នាក់ទៅកន្លែងស្ងាត់ ហើយបក្សពួក៤នាក់ទៀតស្ទាក់ចាំវាយ។
តាមសាក្សីនៅកន្លែងកើតហេតុឱ្យដឹងថា ការស្ទាក់វាយនេះជាអំពើវាយប្លន់យកប្រាក់ និងម៉ូតូ។ ទោះបីជាយ៉ាងណាក្តី ចោរយកម៉ូតូមិនបានឡើយ។ ភ្លាមៗនោះសមត្ថកិច្ចមូលដ្ឋានមិនបានសួរនាំជុំវិញហេតុការណ៍នោះទេ រហូតដល់ជនរងគ្រោះស្លាប់ទើបទៅសួរនាំនៅកន្លែងកើតហេតុ។ អ្នករត់ម៉ូតូឌុបនោះក្រុមគ្រួសារឱ្យដឹងថា ឈ្មោះកែវ វ៉ារិ ហៅម៉ៅ អាយុ៣៤ឆ្នាំ ស្នាក់នៅផ្ទះលេខ០៦២ ផ្លូវលេខ៩៣ ភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ បានរងរបួសផុងលលាដ៏ក្បាល ហើយបានស្លាប់នៅក្នុងមន្ទីរពេទ្យកាល់ម៉ែត។ អ្នករត់ម៉ូតូឌូបដូចគ្នាឱ្យដឹងថា មុនពេលកើតហេតុជនរងគ្រោះចាំដឹកម៉ូយនៅក្បែរស្ថានីយប្រេងឥន្ធនៈតេលា រង្វង់មូលស្តាតចាស់ ហើយបានឌុបម៉ូយម្នាក់ទៅចំណុចផ្លូវK5 កន្លែងកើតហេតុ ក៏រងគ្រោះតែម្តង ៕
ចែករំលែកព័តមាននេះ