ជិះកង់ទៅទិញផ្លែឈើលក់ ត្រូវរថយន្តបុកទាំង២នាក់បងប្អូន
រាជធានីភ្នំពេញ ៖ បុរស២នាក់បងប្អូនជីដូនមួយ ខណៈជិះកង់២គ្រឿងទៅទិញផ្លែឈើនៅផ្សារនាគមាសដើម្បីយកទៅលក់បន្ត ស្រាប់តែត្រូវរថយន្តស៊េរីទំនើបបើកមកបុក …
រាជធានីភ្នំពេញ ៖ បុរស២នាក់បងប្អូនជីដូនមួយ ខណៈជិះកង់២គ្រឿងទៅទិញផ្លែឈើនៅផ្សារនាគមាសដើម្បីយកទៅលក់បន្ត ស្រាប់តែត្រូវរថយន្តស៊េរីទំនើបបើកមកបុកពីក្រោយបណ្ដាលឲ្យរងរបួសធ្ងន់ម្នាក់ស្រាលម្នាក់ ។ ហេតុការណ៍នេះកើតឡើងកាលពីវេលាម៉ោង៥ និង២០ទៀបភ្លឺ ថ្ងៃទី២៤ ខែកុម្ភៈ ឆ្នាំ២០១៧ នៅចំណុចមុខភោជនីយដ្ឋាន ឡោទីហ្វាង ផ្លូវម៉ៅសេទុង កែងផ្លូវលេខ១៧៣ សង្កាត់ទួលស្វាយព្រៃ១ ខណ្ឌចំការមន ។
អ្នកបើករថយន្តបង្កឈ្មោះ ត្រាំង ហ៊ុយ ភេទប្រុស អាយុ៤១ឆ្នាំ មុខរបរលក់ដូរ ស្នាក់នៅផ្ទះលេខ៣១ ផ្លូវលេខ៩៥ សង្កាត់បឹងត្របែក ខណ្ឌចំការមន ។ ចំណែកជនរងគ្រោះ ម្នាក់ឈ្មោះ សំរិត សារម្យ ភេទប្រុស អាយុ៥៥ឆ្នាំ មុខរបរលក់ផ្លែឈើ ស្នាក់នៅផ្ទះជួល ផ្លូវលេខ៥០៨ សង្កាត់បឹងត្របែក ខណ្ឌចំការមន រងរបួសបាក់ជើងខាងឆ្វេង និងម្នាក់ទៀតឈ្មោះ ផែង សុភា អាយុ៤៥ឆ្នាំ ស្នាក់នៅជាមួយជនរងគ្រោះខាងលើ រងរបួសស្រាល ។
តាមសម្តីជនរងគ្រោះដែលរងបួសស្រាលបាននិយាយថា មុនពេលកើតហេតុ រូបគាត់មាន២នាក់បងប្អូនជីដូនមួយបានជិះកង់ម្នាក់មួយចេញពីផ្ទះនៅម្តុំបឹងត្របែក គោលបំណងទៅទិញផ្លែឈើនៅផ្សារនាគមាសដើមដឹកដើរលក់បន្ត ដោយបានធ្វើដំណើរតាមផ្លូវម៉ៅសេទុង ក្នុងទិសដៅពីត្បូងទៅជើង លុះមកដល់ចំណុចកើតស្រាប់តែរថយន្តម៉ាក SIENNA XLE ពណ៌ស ពាក់ស្លាកលេខ តាកែវ 2A-2100 ធ្វើដំណើរតាមផ្លូវម៉ៅសេទុងក្នុងទិសដៅស្របគ្នាក្នុងល្បឿនលឿន និងស្រវឹង បានរេចង្កូតទៅបុកគាត់ទាំងពីរនាក់ពីក្រោយពេញទំហឹង បណ្តាលឲ្យប្អូនប្រុសរបស់គាត់ដួលរងរបួសបាក់ជើងខាងឆ្វេងធ្ងន់ ត្រូវបានរថយន្តសង្គ្រោះមកដឹកយកទៅសង្គ្រោះនៅគ្លីនិកឯកជន ហុង ហាក់ ចំណែករូបគាត់វិញរងរបួស រលាត់ដៃជើងស្រាលមិនបានទៅពេទ្យតែ រីឯកង់រងកាខូចខាតវៀចខ្នងក្រោយទាំងពីរ ។
ជនរងគ្រោះបន្តទៀតថា បន្ទាប់ពីបុកពួកគាត់រួច រថយន្តបង្កមិនទាន់អស់ល្បឿនបានជ្រុលទៅបុកបង្គោលស្លាកសញ្ញាចរាចរណ៍បាក់អស់១ដើម រួចបានជ្រុលទៅបុកដើមតាសេកទៀត ធ្វើឲ្យរថយន្តស្រុញខ្ទេចផ្នែកខាងមុខ និងផ្ទុះពោងសុវត្ថិភាព ចំណែកអ្នកបើកបររថយន្តបង្កអត់មានរងរបួសនោះទេ ។
ក្រោយពេលកើតហេតុ សមត្ថកិច្ចជំនាញបានមកដល់ក៏ធ្វើការវាស់វែង រួចបានយករថយន្ត កង់ ព្រមទាំងអ្នកបើកបរ ទៅការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ