ខេត្តកណ្ដាល ៖ ជនសង្ស័យម្នាក់ដែលចូលទៅសំងំក្នុងផ្ទះដាំបាយស៊ី ហើយចាំប្លន់វាយម្ចាស់ផ្ទះនឹងអង្រែបុកគ្រឿង បណ្ដាលឱ្យរងរបួសធ្ងន់ពីរនាក់ ហើយរត់គេចខ្លួន កាលពីម៉ោង១២ និង១៥នាទីថ្ងៃត្រង់ទី២២ កុម្ភៈ ស្ថិតនៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ។ តែអ្វីដែលកត់សម្គាល់នោះ យប់ឡើងជនសង្ស័យខាងលើ បានផ្លោះរបងចូលក្នុងផ្ទះនេះម្ដងទៀត មករកអត្តសញ្ញាណប័ណ្ណដែលជ្រុះ ក៏ត្រូវនគរបាលចាប់ខ្លួនបានតែម្ដង។
លោកអា៑វ បញ្ញា អធិការរងក្រុងតាខ្មៅបានឱ្យដឹងថា ជនសង្ស័យឈ្មោះឯល អាហ្សូត ជនជាតិខ្មែរអ៊ិស្លាម អាយុ២១ឆ្នាំ មានទីលំនៅក្នុងភូមិព្រែករាំង សង្កាត់កំពង់សំណាញ់ ក្រុងតាខ្មៅ ។ រីឯជនរងគ្រោះមាន៣នាក់ ១-ឈ្មោះហួ លាងហេង ភេទស្រី អាយុ៥៥ឆ្នាំ មេផ្ទះ (របួសធ្ងន់) ២-ឈ្មោះហេង សុផាន់ណា ភេទស្រី អាយុ២១ឆ្នាំ ជានិស្សិត របួសធ្ងន់ និង៣-ឈ្មោះថេង សេងហៀក ភេទស្រី អាយុ២៦ឆ្នាំ ទាំង៣នាក់ មានទីលំនៅក្នុងភូមិ-សង្កាត់ខាងលើ ។
នៅមុនពេលកើតហេតុ ជនរងគ្រោះបានមកមើលផ្ទះរបស់ខ្លួន ដែលយូរៗមកមើលម្តង លុះមកដល់ផ្ទះកើតហេតុ បានចាក់សោចូលក្នុងផ្ទះ បានរៀបចំហូបបាយនៅជាន់ខាងក្រោមផ្ទះ ដោយមិនទាន់បានឡើងទៅលើផ្ទះទេ តែបានឃើញបាយដាំថ្មីៗ ក្នុងឆ្នាំងខ្សែភ្លើង និងមានពងទាមួយគ្រាប់ តែមិនចាប់អារម្មណ៍ទេ ។ លុះដល់វេលាកើតហេតុ ជនរងគ្រោះឈ្មោះហេង សុផាន់ណា បានឡើងផ្ទះជាន់ខាងលើ ដើម្បីយកខោអាវ ស្រាប់តែឃើញបានឃើញជនសង្ស័យស្ទុះចេញពីក្រោយទូដាក់ខោរអាវមកច្របាច់.ក និងយកអង្រែ វាយទៅលើក្បាលជនរងគ្រោះ ។
ពេលនោះ ជនរងគ្រោះក៏បានខំប្រឹងស្រែកឮដល់ជនរងគ្រោះម្នាក់ឈ្មោះហួរ លាងហេង ត្រូវជាម្តាយធំ បានឡើងទៅមើល ភ្លាមនោះជនសង្ស័យបានស្ទុះយកអង្រែមកវាយចំក្បាលជាច្រើនអង្រែ ហើយរត់ចុះមកក្រោម ដោយមិនបានយកទ្រព្យសម្បត្តអ្វីទេ បម្រុងចេញតាមទ្ធារមុខ ក៏បានជួបនិងជនរងគ្រោះទី៣ ហើយបានដេញវាយ តែវាយមិនត្រូវ ដោយជនរងគ្រោះទី៣ បានបើកទ្ធាររត់ចេញទៅក្រៅស្រែកហៅឱ្យគេជួយ ។
ឃើញដូច្នេះ ជនសង្ស័យបានរត់ចូលទៅក្នុងវិញឡើងទៅជាន់លើ រួចចុះតាមបង្អួច រត់គេចខ្លួនបាត់តែម្តង។ រហូតមកដល់វេលម៉ោង
០៧ និង០៥នាទីយប់ថ្ងៃដដែល ជនសង្ស័យឈ្មោះឯល អាហ្សូត ក៏បានលួចចូលផ្ទះកើតហេតុម្តងទៀត ក្នុងគោលបំណងមកយកអត្តសញ្ញាណបណ្ណ័របស់ខ្លួន ដែលបានជ្រុះនៅកន្លែងកើតហេតុ តែរកមិនឃើញ ក៏ត្រូវនគរបាលចាំឃ្លាំមើលនៅផ្ទះឃាត់ខ្លួនបានតែម្តង។
ចែករំលែកព័តមាននេះ