មហោស្រពគីហ្ស៊ុណាជប៉ុន-កម្ពុជាលើកទី៦នឹងប្រារព្ធធ្វើនៅថ្ងៃនេះ
រាជធានីភ្នំពេញ ៖ ស្ថានទូតជប៉ុនប្រចាំកម្ពុជា សហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) និងមជ្ឈមណ្ឌលមូលនិធិជប៉ុននៅអាស៊ី ក្រោមការឧបត្ថម្ភពី …
រាជធានីភ្នំពេញ ៖ ស្ថានទូតជប៉ុនប្រចាំកម្ពុជា សហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) និងមជ្ឈមណ្ឌលមូលនិធិជប៉ុននៅអាស៊ី ក្រោមការឧបត្ថម្ភពីក្រុមហ៊ុនអាកាសចរណ៍ANAអ៊ែរឡាញ នឹងរៀបចំមហោស្រពគីហ្ស៊ុណាជប៉ុន-កម្ពុជាលើទី៦ ដែលប្រព្រឹត្តទៅរយៈពេល៤ថ្ងៃ ចាប់ពីថ្ងៃទី២៣ ដល់ថ្ងៃទី២៦ ខែកុម្ភៈ ឆ្នាំ២០១៧ នៅមជ្ឈមណ្ឌល CJCC ស្ថិតក្នុងបរិវេណនៃសាកលវិទ្យាល័យភូមិន្ទភ្នំពេញ ។ នេះបើយោងតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំនៅកម្ពុជា ចេញផ្សាយកាលពីថ្ងៃទី២១ ខែកុម្ភៈ កន្លងមក ។
សេចក្ដីប្រកាសព័ត៌មានបានឱ្យដឹងទៀតថា នៅក្នុងពិធីមហោស្រពនេះ មានរៀបចំកម្មវិធីសំខាន់ៗជាច្រើនដូចជា ការសម្ដែងសិល្បៈ សិក្ខាសាលានៃការសម្ដែងក្បាច់រាំទំនើបជប៉ុន ការបង្ហាញជូននូវកីឡាយុទ្ធសិល្ប៍ ការបង្ហាញម៉ូដសម្លៀកបំពាក់ ការស្លៀកពាក់បែបតុក្កតាជប៉ុន(ខូសផ្លេ) ការបង្ហាញជូននូវការគណនាលេខយ៉ាងរហ័សដោយប្រើក្បាច់គិតលេខបុរាណ សិល្បៈតុបតែងផ្កា និងការសរសេរអក្សរផ្ចង់ ថ្នាក់រៀនធ្វើមីជប៉ុន ព្រមទាំងបាឋកថា និងការតាំងពិព័រណ៍ផ្សេងៗទៀត ។
សេចក្ដីប្រកាសព័ត៌មានបានបញ្ជាក់ថា ៖ «ប្រធានបទក្នុងឆ្នាំនេះគឺធ្វើដំណើរទៅកាន់ប្រទេសជប៉ុន ហៅថា «Fly to Japan» ដែលជាការស្វាគមន៍ការហោះហើរត្រង់រវាងប្រទេសកម្ពុជានិងប្រទេសជប៉ុន កាលពីថ្ងៃទី១ ខែកញ្ញា ឆ្នាំ២០១៦ កន្លងទៅ ។ យើងខ្ញុំសង្ឃឹមថាប្រធានបទក្នុងមហោស្រពនេះនឹងអាចឱ្យប្រជាជនកម្ពុជា មានអារម្មណ៍កាន់តែខិតជិតប្រទេសជប៉ុន ហើយជំរុញឱ្យពួកគេមានចំណាប់អារម្មណ៍ ទៅលេងប្រទេសជប៉ុនផងដែរ» ។
ទាក់ទងនឹងមហោស្រពគីហ្ស៊ុណាជប៉ុន-កម្ពុជានេះ លោកស្រី កាអូរិ តាណាបេ លេខាទី២ស្ថានទូតជប៉ុនប្រចាំនៅកម្ពុជា បានថ្លែងប្រាប់អ្នកយកព័ត៌មានកាលពីថ្ងៃទី២១ ខែកុម្ភៈ ថា នៅអំឡុងឆ្នាំ២០១១ ប្រទេសជប៉ុនបានរងគ្រោះដោយរញ្ជួយដី និងរលកយក្សស៊ូណាមិដ៏ធ្ងន់ធ្ងរ ហើយគ្រានោះមានប្រជាជនខ្មែរបានចូលរួមជួយសង្គ្រោះប្រជាជនជប៉ុនពីគ្រោះធម្មជាតិមួយនេះ ។ ចាប់ពីពេលនោះមក ប្រទេសជប៉ុនក៏បានរៀបចំមហោស្រពនេះឡើង ដើម្បីរឹតចំណងមិត្តភាពរវាងប្រទេសទាំង២ឲ្យកាន់តែជិតស្និទ្ធថែមទៀត ដែលបានចាប់ផ្ដើមប្រារព្ធលើកទី១នៅឆ្នាំ២០១២ ។
លោកស្រីថ្លែងថា ៖ «ពាក្យ គីហ្ស៊ុណា មានន័យថា ចំណងទាក់ទងជាមួយមនុស្សសំខាន់ៗ ដូចជាគ្រួសារ សមាជិកក្រុមគ្រួសារ ឬមិត្តភក្ដិដែលសំខាន់បំផុតសម្រាប់យើង ។ ដូច្នេះហើយយើងប្រើពាក្យហ្នឹងគឺសម្រាប់តែមនុស្សសំខាន់ៗប៉ុណ្ណោះ អីុចឹងហើយបានយើងដាក់ឈ្មោះមហោស្រពគីហ្សុ៊ណាជប៉ុន-កម្ពុជា ដើម្បីផ្សារភ្ជាប់ទំនាក់ទំនងរវាងប្រទេសទាំង២ជប៉ុន-កម្ពុជាឱ្យកាន់តែរឹងមាំថែមទៀត»។
គួររំឭកថា កាលពីឆ្នាំ២០១៦កន្លងទៅ មហោស្រពនេះបានទាក់ទាញអ្នកចូលរួមទាំងភ្ញៀវជាតិ និងអន្តរជាតិប្រមាណជាង១៨.០០០នាក់ ហើយក្នុងឆ្នាំ២០១៧នេះត្រូវបានព្យាករណ៍ថា នឹងមានអ្នកចូលរួមប្រមាណជាង២ម៉ឺននាក់សម្រាប់រយៈពេល៤ថ្ងៃនៃកម្មវិធីនេះ ៕
ចែករំលែកព័តមាននេះ