រាជធានីភ្នំពេញ ៖ អគ្គនាយកក្រុមហ៊ុនផ្សារមូលបត្រកម្ពុជាអះអាងថា ក្រុមហ៊ុនផ្សារមូលបត្រកម្ពុជានឹងបង្កើតប្រព័ន្ធអនឡាញដើម្បីផ្តល់ព័ត៌មានស្តីពីការជួញដូរភាគហ៊ុន …
រាជធានីភ្នំពេញ ៖ អគ្គនាយកក្រុមហ៊ុនផ្សារមូលបត្រកម្ពុជាអះអាងថា ក្រុមហ៊ុនផ្សារមូលបត្រកម្ពុជានឹងបង្កើតប្រព័ន្ធអនឡាញដើម្បីផ្តល់ព័ត៌មានស្តីពីការជួញដូរភាគហ៊ុន ហើយប្រជាពលរដ្ឋក៏អាចជួញដូរភាគហ៊ុនរបស់ខ្លួនតាមប្រព័ន្ធអនឡាញផងដែរ ។
លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា បានថ្លែងក្នុងពិធីតាំងពិព័រណ៍ផ្សារភាគហ៊ុន ឬផ្សារមូលបត្រស្តីពី «ភាគហ៊ុនដំបូងរបស់ខ្ញុំ» ថា ស្របពេលប្រជាពលរដ្ឋ និងវិនិយោគិនជាច្រើនបាននិងកំពុងប្រើប្រាស់ប្រព័ន្ធទូរស័ព្ទចល័តទំនើប និងអាចប្រើអ៊ីនធើរណេត នៅក្នុងខែកក្កដា ឬខែសីហា ឆ្នាំ២០១៧នេះ ក្រុមហ៊ុនមូលបត្រកម្ពុជា បានបង្កើតគេហទំព័រមួយដែលបង្កលក្ខណៈងាយស្រួលដល់អ្នកជួញដូរភាគហ៊ុនទាំងអស់អាចជួញដូរ ទិញលក់ភាគហ៊ុន និងទទួលព័ត៌មានស្តីពីដំណើរការជួញដូរភាគហ៊ុននៅលើប្រព័ន្ធអនឡាញ ។ ការបង្កើតប្រព័ន្ធជួញដូរតាមអនឡាញនេះ ដើម្បីបង្កលក្ខណៈងាយស្រួលដល់ប្រជាពលរដ្ឋចង់បង្កើនប្រាក់ចំណូល ឬបង្កើនដើមទុនទៅលើអាជីវកម្មរបស់ខ្លួន ។
បច្ចុប្បន្ន ផ្សារហ៊ុនកម្ពុជាមានក្រុមហ៊ុនរដ្ឋ និងឯកជនបានចុះបញ្ជីបោះផ្សាយលក់ភាគហ៊ុនចំនួន៤ ក្នុងនោះរួមមាន រដ្ឋាករទឹកស្វយ័តក្រុងភ្នំពេញ, ក្រុមហ៊ុនហ្គ្រីនធ្វីន អ៊ិនធើរណាសិនណល, កំពង់ផែស្វយ័តភ្នំពេញ និងភ្នំពេញអេអ៊ីហ្សិត ភីអិលស៊ី ហើយយ៉ាងយូរនៅក្នុងអំឡុងដើមខែមេសានេះ កំពង់ផែស្វយ័តក្រុងព្រះសីហនុ ចុះបញ្ជីក្នុងផ្សារហ៊ុនកម្ពុជា និងបោះផ្សាយមូលបត្ររបស់ខ្លួនជួញដូរជាសាធារណៈ ។
លោក ហុង សុហួរ ថ្លែងបន្តថា បច្ចុប្បន្ន នៅក្នុងផ្សារមូលបត្រមានអ្នកជួញដូរប្រមាណជាង៨ពាន់នាក់ ស្មើនឹង៨ពាន់គណនីបាននិងកំពុងដំណើរការជួញដូរយ៉ាងសកម្មជារៀងរាល់ថ្ងៃ និងមានទំហំទឹកប្រាក់ជួញដូរប្រមាណជាង១ម៉ឺនដុល្លារក្នុងមួយថ្ងៃផងដែរ។ លោកបន្តថា នៅថ្ងៃខាងមុខ នឹងមានចំនួនអ្នកសម្រេចចិត្តចូលជួញដូរភាគហ៊ុននៅក្នុងក្រុមហ៊ុនផ្សារមូលបត្រកាន់តែច្រើន ខណៈក្រុមហ៊ុនផ្សារមូលបត្រនឹងរៀបចំឲ្យមានវីធីសាស្ត្រសម្រាប់ជួញដូរផ្ទាល់ និងប្រភេទបញ្ជាទីផ្សារហ៊ុន ជាពិសេស ក្រុមហ៊ុនផ្សារមូលបត្រនឹងដំឡើងដែនកំណត់ថ្លៃពី៥ទៅ១០% គ្រោងនឹងដាក់ដំណើរការក្នុងពេលឆាប់ៗនេះ ដែលការដំឡើងនេះ នឹងជួយបង្កើនទំហំជួញដូរ និងអនុញ្ញាតឲ្យវិនិយោគិនអាចចំណេញពីការឡើងចុះថ្លៃបានច្រើនជាងមុន ។
លោក ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា ថ្លែងថា ទីផ្សារនេះនឹងស្វាគមន៍ក្រុមហ៊ុនថ្មីៗបន្ថែមទៀតធ្វើឲ្យទីផ្សារនេះកាន់តែមានសកម្មភាពរស់រវើក ហើយដើម្បីឲ្យផ្សារមានសកម្មភាពជួញដូរច្រើន ទាល់តែផ្សារនេះមានផលិតផលច្រើន ពោលគឺមានក្រុមហ៊ុនចូលមកបោះផ្សាយមូលបត្រច្រើនដើម្បីផ្តល់ជម្រើសកាន់តែច្រើនដល់អតិថិជន ។
លោកបន្តថា លើសពីនេះ គណៈកម្មាធិការផ្សារមូលបត្រកម្ពុជា ក៏គ្រោងនឹងបោះផ្សាយមូលបត្របំណុលនាពេលខាងមុខផងដែរ ដើម្បីឲ្យសាធារណជនចូលរួមទិញ និងជួញដូរក្នុងផ្សារនេះកាន់តែច្រើន ៕
ចែករំលែកព័តមាននេះ