រាជធានីភ្នំពេញ ៖ បន្ទាប់ពីសារព័ត៌មានកោះសន្ដិភាពចេញផ្សាយអត្ថបទក្រោមចំណងជើងថា «កើតជំងឺហើមក្បាលជង្គង់រកគ្រូបុរាណផ្លុំស្ដោះរយៈពេល៦ខែមិនស្រកទើបនាំមកមន្ទីរពេទ្យ» ឆ្នាំទី៤៤ លេខ៧២០៥ ចេញផ្សាយថ្ងៃសៅរ៏-អាទិត្យ ទី៥-៦ មីនា ឆ្នាំ២០១១បានរៀបរាប់ពីយុវជនកើតជំងឺហើមក្បាលជង្គង់ឈ្មោះជឺង កប អាយុ១៩ឆ្នាំ មានស្រុកកំណើតនៅភូមិបឹងសាឡាងខាងត្បូង
រាជធានីភ្នំពេញ ៖ បន្ទាប់ពីសារព័ត៌មានកោះសន្ដិភាពចេញផ្សាយអត្ថបទក្រោមចំណងជើងថា «កើតជំងឺហើមក្បាលជង្គង់រកគ្រូបុរាណផ្លុំស្ដោះរយៈពេល៦ខែមិនស្រកទើបនាំមកមន្ទីរពេទ្យ» ឆ្នាំទី៤៤ លេខ៧២០៥ ចេញផ្សាយថ្ងៃសៅរ៏-អាទិត្យ ទី៥-៦ មីនា ឆ្នាំ២០១១បានរៀបរាប់ពីយុវជនកើតជំងឺហើមក្បាលជង្គង់ឈ្មោះជឺង កប អាយុ១៩ឆ្នាំ មានស្រុកកំណើតនៅភូមិបឹងសាឡាងខាងត្បូង ឃុំបឹងសាឡាងខាងត្បូង ស្រុកកំពង់ត្រាច ខេត្ដកំពត ដែលជើងខាងឆ្វេងហើមធំរហូតដល់ថ្នាក់ដើរមិនរួច សូម្បីតែពេល ក្រោកអង្គុយ ឬផ្អៀងម្ដងៗត្រូវមានអ្នកជួយលើកពីរនាក់ទើបលើករួចនោះ ។ កាលពីថ្ងៃទី
៤ មីនា ត្រូវបានធ្វើការវះកាត់ រួចរាល់ហើយ ដោយគ្រូពេទ្យកាត់ត្រឹមភ្លៅ ដើម្បីសង្គ្រោះជីវិត ។
តាមការឱ្យដឹងពីម្ដាយឈ្មោះកង ពៅ អាយុ៤០ឆ្នាំបានឱ្យដឹងថា បន្ទាប់ពីវះកាត់ហើយកូនរបស់គាត់សន្លប់មួយថ្ងៃមួយយប់ទើបដឹងខ្លួនឡើងវិញ ។ រហូតមកដល់ថ្ងៃទី៨ មីនា នេះកូនរបស់គាត់បានធូរស្បើយច្រើនហើយ ។ ស្ដ្រីជា ម្ដាយបានបន្ដថា ដោយសារមានការយកចិត្ដទុកដាក់ពីគ្រូពេទ្យនៅមន្ទីរពេទ្យមិត្ដភាពខ្មែរ-សូវៀត ទើបកូនគាត់ឈានទៅធ្វើការវះកាត់រួចរាល់ហើយ ចំណែកឈាមដែលបញ្ចូលឱ្យកូនគាត់នោះគ្រូពេទ្យបានបញ្ចូលឱ្យទាំងអស់ដោយមិនគិតប្រាក់ពីគាត់ទេ ព្រោះគាត់គ្មានប្រាក់សំរាប់ទិញឡើយ ។
ស្ដ្រីជាម្ដាយក៏បានថ្លែងអំណរគុណដល់សារព័ត៌មានកោះសន្ដិភាពដែលជួយចុះផ្សាយស្តីពីវាសនាកូនរបស់គាត់ ហើយបន្ទាប់ពីចុះផ្សាយមានសប្បុរសជនអ្នកអានតាមរយៈសារព័ត៌មានយកប្រាក់ទៅផ្ដល់ឱ្យគាត់ដល់មន្ទីរពេទ្យជាហូរហែ ក្នុងនោះមានសិស្សសាលាបានយកប្រាក់២០ដុល្លារអាមេរិក ។ មានបងប្អូនខ្មែររស់នៅសហរដ្ឋអាមេរិកបានផ្ញើតាមរយៈបងប្អូនរស់នៅប្រទេសកម្ពុជាចំនួន២០០ដុល្លារអាមេរិក។ សប្បុរសជនដទៃទៀតគាត់មិនបានចាំឈ្មោះចំនួន៥៥ដុល្លារ និងប្រាក់៥៥ម៉ឺនរៀល ។ ចំណែកអំណោយតាមរយៈកោះសន្ដិភាពលើកនេះ មានចំនួន១១១ដុល្លារអាមេរិក និងប្រាក់៨ម៉ឺនរៀល ដែលកោះសន្តិភាពទទួលបានពី១-សប្បុរសជនលេខទូរស័ព្ទ ០១២ ៨១៨ ៣៣៩ បានឧបត្ថម្ភ១១០ដុល្លារ ២-លោកចេង ហុងជិន និងក្រុមគ្រួសារ២ម៉ឺនរៀល ៣-លោកកែ ប៉ូលីន ៥ពាន់រៀល ៤-កញ្ញាស្រី វិន លក់តុក្កតា ៥ពាន់រៀល ៥-លោកវិចិត្រ ព្រមទាំងក្រុមគ្រួសារ១ដុល្លារ ៦-ហាងតុក្កតាទាន់សម័យ១ម៉ឺនរៀល និង៧-តារា វត្តី (លក់ទូរសព្ទដៃ) ៤ម៉ឺនរៀល។ ក្នុងពេលដែលតំណាងកោះសន្តិភាពយកអំណោយជូនដោយផ្ទាល់ដៃនោះ ស្ដ្រីជាម្ដាយរំភើបរហូតស្រក់ទឹកភ្នែកដែលគាត់ស្មានមិនដល់នូវទឹកចិត្តជ្រះថ្លានេះដោយលើកដៃថ្លែងអំណរគុណយ៉ាងជ្រាលជ្រៅចំពោះសប្បុរជនទាំងអស់ដែលបានផ្ដល់ជាថវិកាជួយដល់ជីវិតកូនរបស់គាត់ ៕
ចែករំលែកព័តមាននេះ