កម្ទេចដំឡូងមីហុយទ្រលោម ធ្វើឱ្យប្រជាពលរដ្ឋ ព្រួយបារម្ភពីបញ្ហាសុខភាពផ្លូវដង្ហើម
ខេត្តប៉ៃលិន ៖ រហូតមកដល់ពេលនេះ ប្រជាពលរដ្ឋជាច្រើន ដែលមានផ្ទះនៅក្បែរស្តង់ដំឡូងមី មានការព្រួយបារម្ភយ៉ាងខ្លាំង ចំពោះបញ្ហាសុខភាពផ្លូវដង្ហើម
ខេត្តប៉ៃលិន ៖ រហូតមកដល់ពេលនេះ ប្រជាពលរដ្ឋជាច្រើន ដែលមានផ្ទះនៅក្បែរស្តង់ដំឡូងមី មានការព្រួយបារម្ភយ៉ាងខ្លាំង ចំពោះបញ្ហាសុខភាពផ្លូវដង្ហើម ខណៈកម្ទេចធូលីដំឡូងមីស្ងួត ដែលឈ្មួញហាលនៅក្នុងស្តង់ ពេលរុញកកាយកើប ធ្វើឱ្យហុយទ្រលោមចូលទៅលើផ្ទះរបស់ពួកគាត់។ ចំណែកអ្នកខ្លះទៀត ដែលធ្វើដំណើរ តាមដងផ្លូវ ក៏មានការត្អូញត្អែរ ដោយសារកម្ទេចដំឡូងមីហោះហើរចូលភ្នែកច្រមុះរបស់ពួកគាត់ដែរ។
ម្យ៉ាងវិញទៀត កម្ទេចដំឡូងមីមានសារធាតុពុល ខណៈហុយចូលក្នុងច្រមុះប្រជាពលរដ្ឋ អាចបង្កទៅជាជំងឺរលាកផ្លូវដង្ហើម និងរលាកសួតផងដែរ បើសិនជាអត់មានវិ ធានការទប់ស្កាត់ចំពោះការហុយបែបនេះ។ ជាក់ស្តែងកាលពីរសៀលថ្ងៃទី២២ ខែកុម្ភៈ ឆ្នាំ២០១៧នេះ មានការហុយកម្ទេចដំឡងមីចេញពីស្តង់ជាច្រើន នៅតាមបណ្តោយផ្លូវជាតិលេខ៥៧ ក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន និងនៅតាមភូមិជាច្រើនទៀត។
ប្រជាពលរដ្ឋជាច្រើននាក់ បានឱ្យដឹងថា បន្ទាប់ពីឈ្មួញទិញដំឡូងមីយកទៅកាប់ចិញ្ច្រាំហាលនៅក្នុងស្តង់របស់ខ្លួន ពេលហាលស្ងួត រួចយកគ្រឿចក្រទៅរុញ និងកើបប្រមូលម្តងៗ បណ្តាលឱ្យហុយចូលផ្ទះរបស់ពួកគាត់ ដែលស្ថិតនៅក្បែរៗស្តង់ បង្កទៅជាជំងឺផ្តាសាយ រលាកបំពង់ក និងប៉ះពាល់ដល់សុខភាពផងដែរ។ ពួកគាត់បន្តទៀតថា ចំណែកអ្នកខ្លះទៀត ជិះម៉ូតូតាមដងផ្លូវជាតិ ក៏ត្រូវកម្ទេចធូលីដំឡូងមីដែលមានសារធាតុពុលហុយចូលក្នុងច្រមុះ បង្កឱ្យប៉ះពាល់ដល់សុខភាពផ្លូវដង្ហើមគួរឱ្យព្រួយបារម្ភយ៉ាងខ្លាំង។
ពួកគាត់បញ្ជាក់ទៀតថា ដូច្នេះសូមឱ្យឈ្មួញ ដែលសាងសង់ស្តង់នៅក្បែរផ្ទះប្រជាពលរដ្ឋ និងក្បែរផ្លូវសូមឱ្យរៀបចំធ្វើយ៉ាងណា កុំឱ្យកំទេចធូលីដំឡូងមីហុយចូលផ្ទះរបស់ពួកគាត់ និងហុយទៅលើអ្នកដំណើរ ដែលកំពុងបើកបរម៉ូតូ នៅលើដងផ្លូវជាតិរាល់ថ្ងៃ។ ព្រះអីផលប៉ះពាល់នៃសារធាតុដំឡូងមី ទាំងកម្ទេចធូលី និងកាកសំណល់ស្អុយរលួយ សុទ្ធតែបង្កទៅជាធាតុពុលទាំងអស់ ហើយដើម្បីជៀសវាងប៉ះពាល់ដល់សុខភាពមានតែប្រុងប្រយ័ត្នដោយខ្លួនឯង និងសូមឱ្យម្ចាស់ស្តង់ជួយរៀបចំកន្លែងឱ្យបានស្រួលបួលផងដែរ។
ពាក់ព័ន្ធទៅនឹងបញ្ហានេះ លោក គឹម សុខា ប្រធានមន្ទីរបរិស្ថានខេត្ត ប៉ៃលិន បានឱ្យដឹងកាលពីរសៀលថ្ងៃទី២២ ខែកុម្ភៈ ឆ្នាំ២០១៧នេះថា ការសាងសង់ស្តង់នៅក្បែរផ្លូវថ្នល់ ឬនៅជិតផ្ទះប្រជាពលរដ្ឋ ពិតជាបង្កផលប៉ះពាល់ដល់សុខភាពមែន។ តែខាងលោកបានណែនាំឱ្យម្ចាស់ស្តង់ទាំងអស់រៀបចំដាក់បាំងស្បៃមុង ដើម្បីកាត់បន្ថយការហុយទៅលើផ្ទះ អ្នកនៅក្បែរស្តង់ និងហុយមកលើផ្លូវបង្កផលប៉ះពាល់ដល់សុខភាពប្រជាពលរដ្ឋធ្វើដំណើររួចរាល់អស់ហើយ ។
លោកបន្តទៀតថា ចំណែកការសាងសង់ស្តង់ដំឡូងមី នៅតាមភូមិដែលមានប្រជាពលរដ្ឋរស់នៅមិនអនុញ្ញាតឱ្យឈ្មួញធ្វើនោះឡើយ ហើយបើសិនជានៅកន្លែងណាបង្កផលប៉ះពាល់ដល់ប្រជាពលរដ្ឋ ខាងលោកនឹងចុះទៅត្រួតពិនិត្យ ហើយណែនាំម្ចាស់ឱ្យគោរពទៅតាមលក្ខខណ្ឌផងដែរ៕
ចែករំលែកព័តមាននេះ