ទីក្រុងហ្សឺណែវ, ប្រទេសស្វ៊ីស ៖ តាមប្រភពព័ត៌មានផ្លូវការពីក្រសួងពាណិជ្ជកម្មកម្ពុជា បានឲ្យដឹងថា ព្រះរាជាណាចក្រកម្ពុជាបានក្លាយជាប្រធានសម្របសម្រួលផ្លូវការ …
ទីក្រុងហ្សឺណែវ, ប្រទេសស្វ៊ីស ៖ តាមប្រភពព័ត៌មានផ្លូវការពីក្រសួងពាណិជ្ជកម្មកម្ពុជា បានឲ្យដឹងថា ព្រះរាជាណាចក្រកម្ពុជាបានក្លាយជាប្រធានសម្របសម្រួលផ្លូវការនៃក្រុមប្រទេសអភិវឌ្ឍន៍តិចតួច ឬហៅថា LDCs ដែលមានសមាជិកចំនួន៣៦ និងប្រទេសសង្កេតការណ៍ចំនួន៨ សម្រាប់អាណត្តិដែលមានរយៈពេល១ឆ្នាំ គិតចាប់ពីពាក់កណ្តាលខែកុម្ភៈ ឆ្នាំ២០១៧ ដល់ពាក់កណ្តាលខែកុម្ភៈ ឆ្នាំ២០១៨ ។ ពិធីផ្ទេរតំណែងជាផ្លូវការនេះ បានធ្វើឡើងនៅអង្គការពាណិជ្ជកម្មពិភពលោក ប្រទេសស្វ៊ីស កាលពីថ្ងៃទី២០ កុម្ភៈ ឆ្នាំ២០១៧ ។
នៅក្នុងឱកាសនោះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មប្រទេសកម្ពុជា បានទទួលញញួរឈើពីលោក ឡាហ្សារ៍ ម៉ូរី ស៊ូអៀតូ (Lazare Maurice Sethoueto) រដ្ឋមន្ត្រីឧស្សាហកម្ម ពាណិជ្ជកម្ម និងសិប្បកម្មប្រទេសបេនីន ដែលជានិមិត្តរូបនៃការចូលកាន់តំណែងជាប្រធានផ្លូវការ ក្រោមការចូលរួមជាសាក្សីតំណាងក្រុម LDCs ចំនួន៣៣ប្រទេស ។
លោករដ្ឋមន្ត្រី ប៉ាន សូរស័ក្តិ បានលើកឡើងពីសមិទ្ធផលសំខាន់ៗដែលរាជរដ្ឋាភិបាលកម្ពុជាសម្រេចបាន ដូចជាការរក្សាបានកំណើនសេដ្ឋកិច្ចយ៉ាងតិច៧%ជាងពីរទសវត្សរ៍ និងការកាត់បន្ថយភាពក្រីក្រមកនៅត្រឹម១៣,៥% នៅក្នុងឆ្នាំ២០១៦ ដែលជាបច្ច័យធ្វើឲ្យកម្ពុជា សម្រេចបាននូវគោលដៅសហស្សវត្សរ៍កាលពីឆ្នាំ២០០៩ ។
លោករដ្ឋមន្ត្រីក៏បានគូសបញ្ជាក់ពីការចែករំលែកបទពិសោធន៍របស់កម្ពុជា ជាមួយប្រទេស LDCs ដូចជា ទីម័រខាងកើត និងអេត្យូពីរ ព្រមទាំងបញ្ហាប្រឈមមួយចំនួននៅ WTO ដែលតម្រូវឲ្យមានការចូលរួមសហការពីបណ្តាប្រទេស LDCs ជាសមាជិក ។
លោករដ្ឋមន្ត្រីថ្លែងថា ៖ « យើងត្រូវតែធ្វើការទាក់ទងយ៉ាងសកម្ម និងត្រូវខិតខំប្រឹងប្រែងទ្វេដង ។ ដូច្នេះ អត្ថប្រយោជន៍របស់យើង ត្រូវបានដាក់ចេញ » ។ លោករដ្ឋមន្ត្រីបញ្ជាក់ថា ៖ « ដើម្បីសម្រេចគោលដៅអាទិភាពរបស់យើង ប្រទេស LDCs ទាំងអស់ត្រូវតែរួបរួមគ្នា និងបង្កើតជាសំឡេងតែមួយ » ។
យោងតាមរបាយការណ៍របស់លោក ឡាហ្សារ៍ ម៉ូរី ស៊ូអៀតូ អតីតប្រធានសម្របសម្រួលក្រុមប្រទេសអភិវឌ្ឍន៍តិចតួចឆ្នាំ២០១៦ បានបង្ហាញថា កិច្ចការដែលកម្ពុជាត្រូវធ្វើបន្តពីប្រទេសបេនីន មានដូចជា ៖
១-ដាក់ជូនផែនការអាទិភាពរបស់ LDCs ក្រោយកិច្ចប្រជុំថ្នាក់រដ្ឋមន្ត្រីនៅប្រទេសណៃរ៉ូប៊ី ទៅក្នុងសន្និសីទរដ្ឋមន្ត្រី WTO ដែលនឹងធ្វើឡើងនៅទីក្រុង Buenos Aires ប្រទេសអាហ្សង់ទីន។
២-បញ្ចូលសំណើប្រទេស LDCs ស្តីពីគោលការណ៍ឧបត្ថម្ភធនលើវិស័យជលផល និងការមិនកំណត់ចំនួននាំចូល-មិនយកពន្ធនាំចូល ។
៣-ដឹកនាំចរចាបែបទន់ភ្លន់សម្រាប់វិស័យពាណិជ្ជកម្ម និងសេវាកម្ម ។
៤-ពិភាក្សាលើការអនុគ្រោះវិធានប្រភពដើមទំនិញ និងពាណិជ្ជកម្មអឡិចត្រូនិក ។ល។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចប្រចាំរាជបណ្ឌិត្យសភាកម្ពុជា ថ្លែងថា ការដែលកម្ពុជាបានក្លាយជាប្រធានសម្របសម្រួបនៃបណ្តាប្រទេសអភិវឌ្ឍន៍តិចតួច ដោយសារកម្ពុជា ជាប្រទេសអភិវឌ្ឍន៍សេដ្ឋកិច្ចបានល្អប្រសើរក្នុងរយៈពេលវែង ហើយកម្ពុជាអាចទទួលបានផលចំណេញច្រើនដូចជា ៖
១-អាចផ្សព្វផ្សាយពីកម្ពុជាទៅកាន់ពិភពលោកថា កម្ពុជាមានកាលានុវត្តភាព និងសក្តានុពលអ្វីខ្លះ ។
២-កម្ពុជាមានឱកាសប្រមូលព័ត៌មាន និងយុទ្ធសាស្ត្រពីការអភិវឌ្ឍប្រទេសយកមកអនុវត្តបន្ថែមនៅកម្ពុជា ។
៣-កម្ពុជាអាចមើល ឬចាប់ឱកាសនៅតាមបណ្តាប្រទេសតិចតួចនានា ដើម្បីស្វែងរកឱកាសវិនិយោគនៅតាមបណ្តាប្រទេសទាំងនោះ ។
៤-អ្នកវិនិយោគចូលមកប្រទេសរបស់យើងអាចស្វែងរកឱកាសវិនិយោគ និងចាប់ដៃគូជាមួយអ្នកធុរកិច្ចក្នុងស្រុកដើម្បីវិនិយោគនៅកម្ពុជា ៕
ចែករំលែកព័តមាននេះ