តំបន់សេដ្ឋកិច្ចពិសេសប៉ោយប៉ែតត្រៀមផ្តល់ថាមពលអគ្គិសនីមានគុណភាព
រាជធានីភ្នំពេញ ៖ ក្រុមហ៊ុនប៉ោយប៉ែត ភីភី អេសអុីហ្សិត និងក្រុមហ៊ុន B.Grimm Power Public Company Limited បានបង្កើតក្រុមការងារសហការគ្នាសិក្សាពីឱកាស …
រាជធានីភ្នំពេញ ៖ ក្រុមហ៊ុនប៉ោយប៉ែត ភីភី អេសអុីហ្សិត និងក្រុមហ៊ុន B.Grimm Power Public Company Limited បានបង្កើតក្រុមការងារសហការគ្នាសិក្សាពីឱកាស …
រាជធានីភ្នំពេញ ៖ ក្រុមហ៊ុនប៉ោយប៉ែត ភីភី អេសអ៊ីហ្សិត និងក្រុមហ៊ុន B.Grimm Power Public Company Limited បានបង្កើតក្រុមការងារសហការគ្នាសិក្សាពីឱកាសវិនិយោគលើការបញ្ជូន និងចែកចាយថាមពលអគ្គិសនីនៅក្នុងតំបន់សេដ្ឋកិច្ចពិសេសប៉ោយប៉ែត ដែលមានគុណភាពសម្រាប់ប្រើប្រាស់ ។ នេះបើយោងតាមអគ្គនាយិកាក្រុមហ៊ុនប៉ោយប៉ែត ភីភី អេសអ៊ីហ្សិត ។
ថ្លែងក្នុងពិធីចុះអនុស្សរណៈយោគយល់ (MOU) ជាមួយក្រុមហ៊ុន B.Grimm Power Public កាលពីថ្ងៃទី២០ កុម្ភៈ នៅសណ្ឋាគារ សូហ្វីតែល ភ្នំពេញភូគីត្រា លោកជំទាវឧកញ៉ា លីម ឈីវហូរ អគ្គនាយិកាក្រុមហ៊ុនប៉ោយប៉ែត ភីភី អេសអ៊ីហ្សិត មានប្រសាសន៍ថា តំបន់សេដ្ឋកិច្ចពិសេសប៉ោយប៉ែតមានសក្តានុពលទាក់ទាញរោងចក្រឧស្សាហកម្មដែលផលិតនូវផលិតផលផ្តល់តម្លៃបន្ថែមខ្ពស់ ជាពិសេស មកពីប្រទេសថៃ ។
ក្រុមហ៊ុន B.Grimm Power ជាអ្នកផ្គត់ផ្គង់ថាមពលអគ្គិសនីប្រកបដោយគុណភាព នឹងជួយធ្វើឱ្យដំណើរការគម្រោងនេះជាមួយតំបន់សេដ្ឋកិច្ចពិសេសប៉ោយប៉ែត ។
លោកជំទាវលើកឡើងថា ប្រទេសថៃទទួលបានជោគជ័យក្នុងការទាក់ទាញរោងចក្រឧស្សាហកម្ម ដែលផ្តល់តម្លៃបន្ថែមខ្ពស់នេះ តាំងពីដើមទសវត្សរ៍៩០ ក្នុងនោះហេតុផលចម្បងដែលប្រទេសថៃអាចផ្គត់ផ្គង់ថាមពលអគ្គិសនីប្រកបដោយគុណភាព និងប្រសិទ្ធភាព ទៅរោងចក្រឧស្សាហកម្មទាំងនោះបាន ដោយសារមានកិច្ចប្រឹងប្រែងទាំងវិស័យសាធារណៈ និងឯកជន ។
លោកស្រី Preeyanart Soontornwata ប្រធានក្រុមហ៊ុន B.Grimm Power Public Company មានប្រសាសន៍ថា ៖ « ក្រុមហ៊ុនយើងទាំងពីរនឹងសិក្សាសមិទ្ធលទ្ធភាពសម្រាប់ការសាងសង់ ដំណើរការ និងថែទាំប្រព័ន្ធបញ្ជូនអគ្គិសនីប្រវែង១២,៤គីឡូម៉ែត្រ និងប្រព័ន្ធចែកចាយមួយដែលតភ្ជាប់ពីស្ថានីយតូចនៅទីក្រុងប៉ោយប៉ែត ស្ថិតក្នុងតំបន់សេដ្ឋកិច្ចពិសេសថ្មីក្នុងទីក្រុងប៉ោយប៉ែត ដែលមានទំហំផ្ទៃដីប្រមាណ៦៥,៧ហិកតា ។ ក្រុងប៉ោយប៉ែតមានសក្តានុពលអស្ចារ្យក្នុងការទាក់ទាញចំណាប់អារម្មណ៍រោងចក្រ ដែលនៅផ្នែកខាងលើក្នុងទឹកដីថៃ ហើយពួកគេបាននិងកំពុងសម្លឹងរកមើលទីតាំងដើម្បីពង្រីករោងចក្រ » ។
លោកជំទាវឧកញ៉ា លីម ឈីវហូរ បញ្ជាក់ថា ៖ « តាមរយៈកិច្ចសហការរបស់យើងអាចនឹងបង្កើតឱ្យមានអត្ថប្រយោជន៍បន្ថែមទៀតសម្រាប់ប្រជាជនកម្ពុជា ដោយបន្ថែមទៅលើកំណើនសេដ្ឋកិច្ច ដែលពឹងផ្អែកលើរោងចក្រឧស្សាហកម្មពីបរទេសដូចជា បង្កើតការងារបន្ថែម និងបង្កើនចំណូលសម្រាប់កម្មករនិយោជិតកម្ពុជា, កាត់បន្ថយពលករចំណាកស្រុក និងរក្សាបាននូវសាមគ្គីភាពក្នុងសង្គម ព្រមទាំងបំពេញបន្ថែមនូវទំនាក់ទំនងសេដ្ឋកិច្ចឈ្នះ-ឈ្នះរវាងកម្ពុជា និងថៃ » ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ មានប្រសាសន៍ថា ៖ « ប្រទេសកម្ពុជាយើងមានអគ្គិសនីមែន តែអគ្គិសនីអត់មានគុណភាពខ្ពស់ មិនទាន់អាចជំរុញការអភិវឌ្ឍឧស្សាហកម្មបានទេ ។ បើយើងមានភ្លើង និងហេដ្ឋារចនាសម្ព័ន្ធត្រឹមត្រូវនោះ ខ្ញុំជឿថា កម្ពុជានឹងមានសក្តានុពលខ្ពស់ណាស់ នឹងទាក់ទាញក្រុមហ៊ុនផ្សេងមកបន្ត ។ យើងគិតថា ក្រុមហ៊ុនថៃ និងជប៉ុនមានជាង២ពាន់ ហើយបូករួមជាមួយក្រុមហ៊ុនផ្សេងទៀតនៅប្រទេសថៃ នូវចំណែកតូចណាមួយមកកម្ពុជានឹងធ្វើឱ្យស្រុកយើងកម្រើក » ។
លោកបណ្ឌិតបន្តថា ៖ « ការចុះ MOU រវាងក្រុមហ៊ុនខ្មែរនិងថៃពេលនេះ គឺជារឿងល្អមួយសម្រាប់ប្រទេសកម្ពុជា ។ បើយើងអាចជំរុញការអភិវឌ្ឍឧស្សាហកម្មបាន កម្ពុជានឹងមានការជឿនលឿនបន្ត មានកំណើនបន្ត មានការងារសម្រាប់ប្រជាពលរដ្ឋ កាត់បន្ថយការចំណាកស្រុករបស់ពលរដ្ឋខ្មែរ ហើយពួកគាត់អាចនៅធ្វើការជាមួយក្រុមគ្រួសារដើម្បីរួបរួមគ្នាកសាងប្រទេស » ៕
ចែករំលែកព័តមាននេះ