មិនមែន Ronaldo ឬ Messi តែជា Mbappé ដែលរកចំណូលបានខ្ពស់បំផុតប្រចាំឆ្នាំ ២០២២
បារាំង ៖ ខណៈពេលដែលកំពូលកីឡាករ Cristiano Ronaldo និង Lionel Messi បានគ្របដណ្ដប់លើ
បារាំង ៖ ខណៈពេលដែលកំពូលកីឡាករ Cristiano Ronaldo និង Lionel Messi បានគ្របដណ្ដប់លើ
បារាំង ៖ ខណៈពេលដែលកំពូលកីឡាករ Cristiano Ronaldo និង Lionel Messi បានគ្របដណ្ដប់លើវិស័យកីឡាបាល់ទាត់ពិភពលោក ព្រមទាំងកម្រៃជើងសារដ៏ច្រើនសន្ធឹកសន្ធាប់អស់រយៈពេលជិត២ទសវត្សកន្លងមកហើយនោះ ប៉ុន្តែពេលនេះអ្វីៗបានប្រែប្រួលហើយ ដោយកីឡាករ Kylian Mbappé កំពុងក្លាយជាតំណាងឱ្យមនុស្សជំនាន់ក្រោយ។
បើយោងតាមប្រភពពីគេហទំព័រ Bleacher Report Football បានចេញផ្សាយថា Kylian Mbappé ខ្សែប្រយុទ្ធឆ្នើមវ័យក្មេងរបស់ក្រុមអ្នកមានបារាំង PSG បានក្លាយជាកីឡាករបាល់ទាត់រកប្រាក់ចំណូលបានខ្ពស់ជាងគេបំផុតសម្រាប់ឆ្នាំ ២០២២។ ខ្សែប្រយុទ្ធក្រុមជម្រើសជាតិបារាំងវ័យ២៣ឆ្នាំរូបនេះ បានសម្រេចចុះហត្ថលេខាបន្តកុងត្រារយៈពេល៣ឆ្នាំបន្ថែមទៀតជាមួយ PSG កាលពីខែឧសភាកន្លងទៅ ដែលធ្វើឱ្យរូបគេត្រូវបន្តរួមរស់នៅលើទឹកដី Parc des Princes រហូតដល់ឆ្នាំ ២០២៥។
ប្រភពពីគេហទំព័រ Bleacher Report Football បានបង្ហាញថា នៅក្នុងរដូវកាល ២០២២-២៣ ខ្សែប្រយុទ្ធ Kylian Mbappé រកចំណូលបានរហូតដល់១២៥លានដុល្លារ ដោយក្នុងនោះ ១០៥លានដុល្លារបានមកពីក្លិប PSG ហើយនិង ២០លានដុល្លារផ្សេងទៀតបានមកពីក្រុមហ៊ុនដៃគូឧបត្ថម្ភ។ ខណៈបច្ចុប្បន្នកីឡាកររូបនេះ ត្រូវបានឧបត្ថម្ភដោយម៉ាកយីហោធំៗក្នុងពិភពលោកមួយចំនួនក្នុងនោះរួមមាន Nike, Hublot, Electronic Arts, Oakley និង Christian Dior។
ដោយឡែក កំពូលខ្សែប្រយុទ្ធព័រទុយហ្គាល់ Cristiano Ronaldo របស់ក្រុម Manchester United ស្ថិតនៅលំដាប់ទី២ក្នុងបញ្ជីកីឡាករបាល់ទាត់រកចំណូលបានខ្ពស់បំផុតសម្រាប់ឆ្នាំ ២០២២ ដោយរូបគេរកចំណូលបាន ១១៣លានដុល្លារ ក្នុងនោះ ៥៣លានដុល្លារបានមកពីក្លិប និង៦០លានដុល្លារបានមកពីក្រុមហ៊ុនដៃគូឧបត្ថម្ភ។ ចំណែកឯកំពូលខ្សែប្រយុទ្ធអាហ្សង់ទីន Lionel Messi របស់ក្រុម PSG ស្ថិតលំដាប់ទី៣ ដោយរូបគេរកចំណូលបាន ១១០លានដុល្លារ ក្នុងនោះ ៦២លានដុល្លារបានមកពីក្លិប និង៤៨លានដុល្លារបានមកពីក្រុមហ៊ុនដៃគូឧបត្ថម្ភ៕
ចែករំលែកព័តមាននេះ