ខេត្តព្រៃវែង ៖ រថយន្តស៊េរីទំនើបមួយគ្រឿង ព្រោះតែព្យាយាមបួងចង្កូតគេចពីម៉ូតូបណ្ដាលឲ្យក្រឡាប់ផ្ងារពោះខ្លួនឯងផ្អើលអស់អ្នកស្រុកមកចោមរោមមើលយ៉ាងច្រើនកុះករកាលពីម៉ោង១១ព្រឹក ថ្ងៃទី២១ ខែកុម្ភៈ ឆ្នាំ២០១៧ នៅលើផ្លូវជាតិលេខ៨ ស្ថិតក្នុងភូមិពោធិ៍សាបាង ឃុំរាប ស្រុកពារាំង ខេត្តព្រៃវែង ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាកឡិចស៊ីស៤៧០ ពណ៌ខ្មៅ ពាក់ស្លាកលេខ កំពង់ចាម 2A-7394 បើកក្នុងទិសដៅពីកើតទៅលិច ពេលមកដល់ចំណុចកើតហេតុខាងលើស្រាប់តែរថយន្តវាក់អឺជាមួយម៉ូតូ១គ្រឿង ហើយក៏ជាន់ហ្វ្រាំងបួងចង្កូតមកខាងត្បូងគំនូសលឿង បណ្ដាលឲ្យជ្រុលចង្កូតក្រឡាប់នៅជញ្ចើមផ្លូវខាងត្បូងតែម្ដង ។
ក្រោយពេលកើតហេតុ អ្នកបើករថយន្តឈ្មោះ គង់ ឡុង ភេទប្រុស អាយុ៣៨ឆ្នាំ មានទីលំនៅភូមិជ្រៃផ្សារ ឃុំជ្រៃស្រុកស្វាយអន្ទរ ខេត្តព្រៃវែង បានប្រាប់ពលរដ្ឋដែលមកមើលថា ខ្លួនមិនមានរងរបួសឡើយ រួមទាំងប្រពន្ធឈ្មោះ ម៉េង ធារី អាយុ២៣ឆ្នាំ និងកូនឈ្មោះ គីម ឈែ ភេទស្រី អាយុ៤ឆ្នាំ ក៏មិនមានរបួសអ្វីដែរ ។
លោក ស៊ឹម កុសល អធិការនគរបាលស្រុកពារាំង បានប្រាប់ឲ្យដឹងថា ករណីគ្រោះថ្នាក់ចរាចរណ៍ខាងលើនេះ គឺមូលហេតុបណ្តាលមកពីរថយន្តខាងលើបើកគេចម៉ូតូដែលមិនស្គាល់ម៉ាក ហើយក៏ជ្រុលក្រឡាប់ប៉ះជើងបែបនេះទៅ តែមិនបង្កគ្រោះថ្នាក់ដល់អាយុជីវិតមនុស្សឡើយ គ្រាន់តែខូចខាតរថយន្តតែប៉ុណ្ណោះ ៕
ចែករំលែកព័តមាននេះ