រាជធានីភ្នំពេញ ៖ បច្ចុប្បន្ន មានស្ថាប័នហិរញ្ញវត្ថុជាច្រើនកំពុងធ្វើអាជីវកម្មដោយផ្ដល់កម្ចីដល់ប្រជាពលរដ្ឋ ពិសេសនៅតាមទីជនបទ និងតាមភូមិនានាទូទាំងខេត្ត-ក្រុងនៃព្រះរាជាណាចក្រកម្ពុជា ។ ស្ថាប័នហិរញ្ញវត្ថុមួយចំនួនបានតាំងខ្លួនជាមីក្រូហិរញ្ញវត្ថុ ខ្លះតាំងខ្លួនជាអង្គការ ដើម្បីជួយសម្រួលជីវភាពដល់ប្រជាពលរដ្ឋដែលកំពុងត្រូវការថវិកាជាបន្ទាន់ ។ ទោះជាយ៉ាងណា ប្រជាពលរដ្ឋគួរពិចារណាឱ្យបានច្បាស់ មុននឹងប្រើប្រាស់កម្ចីឥណទានពីស្ថាប័នហិរញ្ញវត្ថុ មិនថាហិរញ្ញវត្ថុនោះស្របច្បាប់ ឬមិនស្របច្បាប់ ។
លោក គា បូរាណ នាយកប្រតិបត្តិមីក្រូហិរញ្ញវត្ថុ អេ អឹម ខេ បានឱ្យដឹងថា បច្ចុប្បន្ននេះ មានស្ថាប័នមីក្រូហិរញ្ញវត្ថុ និងស្ថាប័នហិរញ្ញវត្ថុជាច្រើនកំពុងធ្វើប្រតិបត្តិការនៅកម្ពុជា។ ដូចនេះ ប្រជាពលរដ្ឋគួរតែមើលឱ្យច្បាស់ មុននឹងសម្រេចចិត្តប្រើប្រាស់កម្ចីឥណទានពីស្ថាប័នណាមួយ។ លោកថា ៖ « ខ្ញុំសូមឱ្យប្រជាពលរដ្ឋដែលជាអតិថិជនទាំងអស់ មុនពេលសម្រេចចិត្តប្រើឥណទាន គាត់គួរតែពិចារណាលើកត្តាមួយចំនួន ដូចជា តើគួរជ្រើសរើសយកស្ថាប័នបែបណាក្នុងការខ្ចីឥណទាន តែសម្រាប់ខ្ញុំវិញ ខ្ញុំលើកទឹកចិត្តគាត់ឱ្យរកស្ថាប័នណាដែលមានលក្ខណៈវិជ្ជាជីវៈ និងមានច្បាប់អនុញ្ញាតត្រឹមត្រូវពីធនាគារជាតិនៃកម្ពុជា ហើយរហូតមកដល់ពេលនេះ ប្រជាពលរដ្ឋមិនពិបាកស្វែងរកព័ត៌មានបន្ថែម
ទេ ។ ទី២ ប្រជាពលរដ្ឋគួរសួរឱ្យបានច្បាស់ពីតម្លៃដែលនឹងទទួល ព្រោះកន្លងមកមានការក្លែងបន្លំច្រើន ។ តួយ៉ាង ការផ្សព្វផ្សាយផ្សេង តែដល់ពេលជាក់ស្ដែង គឺតម្លៃផ្សេង ដែលនេះសំដៅទៅលើអត្រាការប្រាក់នៃឥណទាន » ។
លោកបន្តថា កត្តាដែលត្រូវគិតមួយទៀតនោះ គឺត្រូវគិតពីលទ្ធភាពនៃការសងត្រឡប់មកវិញ ។ អតិថិជនគួរគិតឱ្យបានច្បាស់ផងដែរ ពីបរិមាណដែលខ្ចីពីស្ថាប័នហិរញ្ញវត្ថុ តើគួរខ្ចីប៉ុន្មាន ទើបអាចមានលទ្ធភាពសងត្រឡប់មកវិញ ហើយសូមកុំសប្បាយចិត្តនៅពេលដែលស្ថាប័នហិរញ្ញវត្ថុផ្ដល់កម្ចីឱ្យច្រើននោះ ព្រោះថាបើគ្មានលទ្ធភាពសងមកវិញទេ នឹងកើតទៅជាបំណុលច្រើនលើសលប់ ដែលបង្កការពិបាក និងមានបញ្ហាដល់សង្គមផងដែរ ។ លោកនិយាយថា ៖ « ការខ្ចីបំណុលកាន់តែច្រើន ដោយមិនដឹងពីលទ្ធភាពនៃការសងត្រឡប់ទៅវិញទេនោះ នឹងធ្វើឱ្យបំណុលកាន់តែច្រើន ហើយអ្វីដែលពិសេស នឹងធ្វើឱ្យអតិថិជនរូបនោះប្រឈមមុខនឹងផ្លូវច្បាប់ផងដែរ »។
លោកបញ្ជាក់ផងដែរថា ការកើនឡើង និងការវិវត្តនៃវិស័យមីក្រូហិរញ្ញវត្ថុ វាអាស្រ័យទៅលើកត្តាធំៗពីរ គឺវិស័យកសិកម្ម ព្រោះសព្វថ្ងៃនេះ មីក្រូហិរញ្ញវត្ថុភាគច្រើនលើសលប់ ផ្តោតទៅលើវិស័យកសិកម្ម ។ ដូចនេះ បើសិនជាវិស័យកសិកម្មមានដំណើរការទៅល្អប្រសើរ ការលូតលាស់នៃវិស័យមីក្រូហិរញ្ញវត្ថុ ក៏មានការលូតលាស់លឿនជាងការប៉ាន់ស្មានដែរ ។ កត្តាមួយទៀត គឺទាក់ទងនឹងស្ថានភាពទូទៅនៃសេដ្ឋកិច្ច និងស្ថានភាពនយោបាយប្រទេសជាតិ ដើម្បីជំរុញកំណើនមីក្រូហិរញ្ញវត្ថុ ។
លោកមានប្រសាសន៍ថា ៖ « ក្រៅពីវិស័យកសិកម្ម មីក្រូហិរញ្ញវត្ថុក៏បានងាកមករកវិស័យពាណិជ្ជកម្ម ដែលមានសហគ្រាសខ្នាតតូច និងមធ្យម និងវិស័យសេវាកម្ម ហើយក៏មានមីក្រូហិរញ្ញវត្ថុមួយចំនួនទៀតផ្ដោតទៅលើវិស័យអចលនទ្រព្យផងដែរ ដូចជា ការផ្ដល់កម្ចីសម្រាប់ទិញដីធ្លី និងផ្ទះសម្បែង
ជាដើម ។ យ៉ាងណាក្តី នៅឆ្នាំ២០១៦ យើងអាចនិយាយបានថា ផលបត្តិឥណទានគ្រឹះស្ថានមីក្រូហិរញ្ញវត្ថុ ប្រមាណជា៤០% គឺផ្ដោតលើវិស័យកសិកម្ម ។ ដូចនេះយើងអាចប្រៀបធៀបឃើញថា វិស័យកសិកម្មនៅតែជាផ្នែកមួយយ៉ាងធំនៃផលបត្តិឥណទានសរុបក្នុងវិស័យមីក្រូហិរញ្ញវត្ថុ ។ ជាក់ស្ដែង សម្រាប់មីក្រូហិរញ្ញវត្ថុ AMK ផលបត្តិឥណទានក្នុងវិស័យកសិកម្មមានរហូតដល់៦០%នៃឥណទានសរុប ។ ដូចនេះ AMK ចាត់ទុកថា វិស័យកសិកម្ម ជាវិស័យចម្បង » ។
លោក បូរាណ បានបន្ថែមថា ក្នុងឆ្នាំ ២០១៧នេះ យុទ្ធសាស្ត្ររបស់មីក្រូហិរញ្ញវត្ថុAMK នឹងផ្សព្វផ្សាយ ព្រមទាំងពង្រឹងវិស័យថ្មីមួយដល់ប្រជាពលរដ្ឋ គឺសេវាកម្មធានារ៉ាប់រងជូនអតិថិជន ដោយក្នុងមួយឆ្នាំ អតិថិជនបង់ត្រឹមតែ២៥.០០០រៀលប៉ុណ្ណោះ ។ បើសិនជាអតិថិជនដែលទិញគោលនយោបាយធានារ៉ាប់រងនោះហើយ មានជំងឺរហូតដល់ចូលពេទ្យ ក្រុមហ៊ុនធានារ៉ាប់រងដែលជាដៃគូ នឹងចេញថ្លៃព្យាបាល២០.០០០រៀលក្នុងមួយថ្ងៃ ហើយឈឺមួយដង ក្រុមហ៊ុននឹងបង់ជូនរហូតដល់៦០ថ្ងៃ ដែលស្មើនឹងទឹកប្រាក់១.២០០.០០០រៀល។ ម្យ៉ាងទៀត បើមានគ្រោះថ្នាក់ដល់ជីវិត ឬពិការភាព បាត់បង់ការងារ ក្រុមហ៊ុននឹងបង់ជូន៧លានរៀល ។ លោកថា ៖ « នេះគ្រាន់តែជាការជួយសម្រួលមួយដល់អតិថិជន ព្រោះតាមការសិក្សារបស់ AMK មានអតិថិជនប្រមាណ៦០%តែងតែមានជំងឺឈឺថ្កាត់ ។ ដូចនេះហើយទើប AMK បង្កើតសេវានេះឡើងដើម្បីជួយពួកគាត់ » ៕
ចែករំលែកព័តមាននេះ