ខេត្តកំពង់ស្ពឺ ៖ ក្រោយពីសារព័ត៌មានជាច្រើន បានផ្សព្វផ្សាយពីទង្វើរបស់លោក សែម វុឌី នាយប៉ុស្តិ៍នគរបាលរដ្ឋបាលឃុំត្រែងត្រយឹង ធ្វើទារុណកម្មលើមនុស្ស(គថ្លង់)ទាំងយប់ពេលដៃកំពុងជាប់ខ្នោះរួចមក លេចឮព័ត៌មានថា ក្រោមបញ្ជាមេស្នងការរងនគរបាលខេត្តកំពង់ស្ពឺ…
ខេត្តកំពង់ស្ពឺ ៖ ក្រោយពីសារព័ត៌មានជាច្រើន បានផ្សព្វផ្សាយពីទង្វើរបស់លោក សែម វុឌី នាយប៉ុស្តិ៍នគរបាលរដ្ឋបាលឃុំត្រែងត្រយឹង ធ្វើទារុណកម្មលើមនុស្ស(គថ្លង់)ទាំងយប់ពេលដៃកំពុងជាប់ខ្នោះរួចមក លេចឮព័ត៌មានថា ក្រោមបញ្ជាមេស្នងការរងនគរបាលខេត្តកំពង់ស្ពឺ និងមនុស្សជំនិត៤នាក់បានអន្តរាគមន៍ទៅចរចាជាមួយម្តាយជនរងគ្រោះ ដើម្បីបញ្ចប់រឿងក្រៅប្រពន្ធ័តុលាការ ប៉ុន្តម្តាយជនរងគ្រោះនៅតែមានគោលជំហរ មិនចរចានោះទេ ដោយលោកស្រីយល់ថា ខ្លាចមានលើកក្រោយទៀត ។
បើតាមការបង្ហើបឱ្យដឹងព័ត៌មាន នៅព្រឹកថ្ងៃទី១៧ ខែកញ្ញា ឆ្នាំ២០២២នេះ លោកសម សាមួន ស្នងការនគរបាលខេត្តកំពង់ស្ពឺ បន្ទាប់ពីទទួលបានពាក្យបណ្តឹងម្តាយជនរងគ្រោះ និងបានឃើញសារព័ត៌មានជាច្រើនអង្គភាពធ្វើការផ្សព្វផ្សាយរឿងលោកនាយប៉ុស្តិឃុំត្រែងត្រយឹង ប្រើទណ្ឌកម្មលើមនុស្សគថ្លង់ទាំងដៃជាប់ខ្នោះនោះ ស្រាប់តែលោកស្នងការខេត្តបានចាត់មនុស្ស ជំនិតដើម្បីចរចាជាមួយម្តាយជនរងគ្រោះ ដើម្បីបង់លុយបញ្ចប់រឿងនេះក្រៅប្រពន្ធ័តុលាការ ដោយសារតែលោកនាយប៉ុស្តិ៍នគរបាលឃុំត្រែងត្រយឹង មានលុយកាក់ច្រើន ហើយជាមនុស្សជំនិតរបស់មេទៀតផង ទើបមានការស្ទុះស្ទារជួយអន្តរាគមន៍យ៉ាងនេះ ដែលទង្វើនេះហាក់បីដូចជាបន្លាចផ្លូវអារម្មណ៍របស់ដើមបណ្តឹងយ៉ាងខ្លាំង ។
ពាក់ព័ន្ធនិងការបង្ហើបរបស់ប្រភពខាងលើនេះដែរ លោកស្រី យូ ស៊ីណាត បានឱ្យដឹងតាមទូរស័ព្ទនៅព្រឹកថ្ងៃទី១៧ ខែកញ្ញា នេះដែរថា មានគេមកចរចារឿងនេះមែន ប៉ុន្តែលោកស្រីមិនយល់ព្រមនោះទេ លោកស្រីមានគោលជំហរ មិនដកពាក្យបណ្តឹងនោះទេដោយលោកស្រីសូមឱ្យសមត្ថកិច្ចជំនាញពាក់ព័ន្ធជួយរកយុត្តិធម៌ឱ្យកូនរបស់លោកស្រីដែលជាមនុស្ស (គថ្លង់)មានកាយសម្បទាមិនគ្រប់គ្រាន់ ។ លោកស្រីបន្តទៀតថា លើកទី០១ធ្វើបាបកូនលោកស្រីប៉ុណ្ណឹង បែកមាត់ ហើមមុខ ចុះបើថ្ងៃក្រោយទៀតបែកក្បាល ពិការ តើអ្នកណាទទួល ខុសត្រូវចិញ្ចឹមមើលថែ។
លោកស្រីបន្តថា លើសពីនេះទៅទៀតក្រុមមនុស្សដែលអះអាងខ្លួនថា ជាស្នងការរងបាននិយាយដាក់លោកស្រីថា ប្រហែលជាកូនរបស់លោកស្រីដើរដួលទេដឹងទើបមានរបួសបែបនេះ។ លោកស្រីចាត់ទុកថា ពាក្យសម្ដីរបស់ក្រុមនគរបាលដែលទៅជួបលោកស្រីដល់ផ្ទះនោះ និយាយមកហាក់បីដូចជាកាន់ជើងភាគីលោកមេប៉ុស្តិ៍យ៉ាងខ្លាំងដោយនិយាយម្តងហើយម្តងទៀតម្ដងជាពីរដងថា ឲ្យដកពាក្យបណ្ដឹងទៅហើយទទួលលុយកាក់ខ្លះៗដើម្បីបញ្ចប់រឿងក្រៅប្រព័ន្ធតុលាការទៅ។
ករណីដែលលោកមេប៉ុស្តិ៍វាយធ្វើបាបកូនលោកស្រីនេះ បើនៅត្រឹមស្នងការខេត្តនគរបាល ។ កូនលោកស្រីនិងលោកស្រីមិនបានទទួលភាពយុត្តិធម៌នោះទេ លោកស្រីនិងស្វះស្វែងរកពឹងពាក់អ្នកច្បាប់ដើម្បីធ្វើពាក្យបណ្ដឹងបន្តទៅក្រសួងមហាផ្ទៃបន្តទៀតម្យ៉ាងសកម្មភាពនិងការនិយាយស្តីរបៀបកំញើញរបៀបនេះប្រជាពលរដ្ឋស្លូតត្រង់ច្បាស់ជា។ រស់រងនូវភាពភ័យខ្លាចជាក់ជាមិនខាន។
លោកស្រីបន្តថា ចូលមកចាប់កូនលោកស្រីទាំងកណ្ដាលយប់វ៉ៃខ្នោះរុញចូលឡាន។ វាជារឿងមួយពេលទៅដល់កន្លែងដៃគោលលោកស្រីជាប់ខ្នោះវ៉ៃធ្វើបាបកូនលោកស្រីជាឬមួយ។ ដោយឡែក រឿងមួយទៀតកូនលោកស្រី គឺជាមនុស្សដែលមានកាយសម្បទាមិនគ្រប់គ្រាន់។គឺគរថ្លង់មានពិការភាព ហេតុអី្វបានជាថ្នាក់លើកាន់ជើងលោកមេប៉ុស្តិ៍ចាត់មនុស្សឲ្យមកនិយាយរបៀបនេះដាក់លោកស្រីទៅវិញ។
សូមំលឹកថា៖ លោក សែម វុឌី នាយប៉ុស្តិនគរបាលរដ្ឋបាលឃុំត្រែងត្រយឹងនៃស្រុកភ្នំស្រួច ខេត្តកំពង់ស្ពឺ បានរងបណ្តឹងថាបានវាយធ្វើទារុណ្ឌកម្មសួរចំម្លើយលើជនសង្ស័យ(គថ្លង់)ក្រោយចាប់វាយខ្នោះនាំខ្លួនទាំងកណ្តាលយប់ទៅកាន់ប៉ុស្តិនគរបាលរដ្ឋបាលឃុំត្រែងត្រយឹង គ្រាលដែលបុរស(គថ្លង)បានយកដុំថ្មគប់ដំបូលផ្ទះអ្នកបើកល្បែងជល់មាន់អនឡាញមួយកន្លែង។
លោកស្រី យូ ស៊ីណាត អាយុ៧០ឆ្នាំរស់នៅភូមិទី៥ ឃុំត្រែងត្រយឹង ស្រុកភ្នំស្រួចបាននិយាយថា នៅយប់ថ្ងៃទី១៣ ខែកញ្ញា ឆ្នាំ២០២២វេលាម៉ោងប្រមាណជា១០និង០០នាទីកូនប្រុសរបស់គាត់ឈ្មោះ គ្រុយ ធីយ៉ា អាយុ៤០ឆ្នាំបានយកដុំថ្មគប់ទៅលើដំបូលផ្ទះគេដែលកំពុងមានការជួបជុំលេងល្បែងជល់មាន់។ហើយការគប់នោះដោយសារតែកន្លែងដែលជួបជុំលេងជល់មាន់មានការហ៊ោរកញ្ជៀវបង្កសំឡេងរំខានដល់ដំណេករបស់គ្រួសារគាត់រាល់យប់។
ក្រោយកូនប្រុសរបស់គាត់គប់ដុំថ្មរួច ស្រាប់តែនៅម៉ោង១០និង៣០នាទីយប់ ក៏មានប៉ូលីស៤នាក់ជិះរថយន្តហាយឡិនឌ័រពណ៌ក្រហមមួយគ្រឿងមកដល់ផ្ទះហើយក៏បានចាប់វាយខ្នោះកូនប្រុសរបស់គាត់រុញចូលឡាននាំយកទៅប៉ុស្តិនគរបាលត្រែងត្រយឹងបាត់។លុះនាំខ្លួនទៅដល់ប៉ុស្តិ នាយប៉ុស្តិខាងលើព្រមទាំងកូនចៅក៏បានដាល់ទៅលើផ្ទៃមុខកូនប្រុសគាត់ទាំងដៃចាប់ខ្នោះជាច្រើនដៃបណ្តាលឱ្យដួលទៅលើដីនិងចាប់លើកឡើងមកវិញបង្ខំឱ្យផ្តិតមេដៃបញ្ចប់រឿង ហើយក៏បានដោះលែងមកផ្ទះវិញនៅម៉ោង១២និង៣០នាទីយប់ថ្ងៃដដែល។
លោកស្រី យូ សុីណាត ជាម្តាយបុរស(គរថ្លង់)ក៏បានបញ្ជាក់បន្ថែមថា ពេលដើរមកដល់ផ្ទះ គាត់បានឃើញផ្ទៃមុខកូនរបស់គាត់មានសភាពហើមជាំ និងបែកបបូរមាត់។ គ្រានោះ កូនប្រុសគាត់បានប្រាប់ពីសកម្មភាពដែលមេប៉ុស្តិ៍ និងគូកនបានវាយធ្វើបាប និងធ្វើទារុណកម្មទាំងដៃកំពុងជាប់ខ្នោះពេលចាប់យកទៅ។
គាត់ថាកូនប្រុសគាត់ត្រឹមតែទោសគប់ដុំថ្មលើដំបូលផ្ទះមិនដល់ថ្នាក់ចាប់គ្រៀកវាយខ្នោះនោះទេហើយក៏មិនដល់វាយធ្វើទារុណនោះដែរម្យ៉ាងកូនគាត់ក៏មានពិការភាពផងដែរ។ គាត់សុំឱ្យផ្តល់ភាពយុត្តិធម៌ដល់កូនប្រុសពិការភាពរបស់គាត់ដោយឱ្យមេប៉ុស្តិនៃឃុំត្រែងត្រយឹងចេញមុខទទួលខុសត្រូវលើរឿងនេះ ហើយក៏សុំឱ្យអាជ្ញាធរមានសមត្ថកិច្ចបង្ក្រាបល្បែងស៊ីសងគ្រប់ប្រភេទដែលកំពុងបើកលេងគគ្រឹកគគ្រេង ស្រែកហ៊ោបង្កការរំខានដល់ដំណេកពលរដ្ឋក្នុងពេលយប់ផងដែរ។
ពាក់ពន្ធ័និងការប្តឹងចោទប្រកាននេះលោក សែម វុឌី នាយប៉ុស្តិ៍ត្រែងត្រយឹងបានប្រាប់តាមទូរសព្ទ័នៅថ្ងៃទី១៥ខែកញ្ញាឆ្នាំ២០២២នេះថា លោកអត់បានវាយធ្វើបាបនិងធ្វើទារុណកម្មទេព្រោះលោកក៏ដឹងដែរថា បុរសដែលបានឃាត់មកនោះ មានកាយសម្បទារមិនគ្រាន់(គ) តែអ្វីដែលលោកចាប់យកមក គឺដើម្បីធ្វើកិច្ចសន្យាបញ្ឈប់មិនឱ្យប្រព្រឹត្តដូច្នេះទៀត ខណៈសកម្មភាពបែបនេះកើតឡើងច្រើនដងមកហើយ៕
ចែករំលែកព័តមាននេះ