រាជធានីភ្នំពេញ ៖ ក្រោយពីរាជរដ្ឋាភិបាលបានសម្រេចឱ្យធនាគារអេស៊ីលីដា ភីអិលស៊ី ផ្លាស់ប្តូរនិមិត្តសញ្ញា (Logo) រូបហង្ស ដើម្បីកុំឱ្យច្រឡំជាមួយក្រសួងសេដ្ឋកិច្ច និងហិរញ្ញវត្ថុរួចមក ធនាគារអេស៊ីលីដាបានស្វះស្វែង និងខិតខំរចនាឡូហ្គោថ្មី ហើយនៅថ្ងៃទី១៨ កុម្ភៈ ក្រសួងពាណិជ្ជកម្ម ក៏បានយល់ព្រមឱ្យធនាគារអេស៊ីលីដា ប្រើនិមិត្តសញ្ញាថ្មីដែលខ្លួនរចនានេះផងដែរ ។ ការផ្លាស់ប្តូរនិមិត្តសញ្ញាថ្មីនេះ មិនមែនផ្លាស់ត្រឹមតែនៅការិយាល័យប៉ុណ្ណោះទេ តែត្រូវផ្លាស់ទាំងអស់ ទាំងនៅទូអេធីអឹម និងកាតផ្សេងៗ ព្រមទាំងធនាគារអេស៊ីលីដា និងមីក្រូហិរញ្ញវត្ថុអេស៊ីលីដា នៅក្រៅប្រទេសថែមទៀត ។ ដូចនេះ ការចំណាយលើការផ្លាស់ប្តូរនេះ ក៏អស់ច្រើនដែរ ដែលនាំឲ្យប៉ះពាល់ដល់ប្រាក់ចំណេញរបស់ខ្លួន ។
ថ្លែងនៅក្នុងសន្និសីទសារព័ត៌មានមួយក្នុងពិធីប្រជុំនាយក នាយិកាគ្រប់សាខាពីការផ្លាស់ប្តូរឡូហ្គោថ្មី លោកបណ្ឌិត អុិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ថា ទាក់ទងនឹងការផ្លាស់ប្តូរ និមិត្តសញ្ញាថ្មី ធនាគារអេស៊ីលីដា ភីអិលស៊ី គ្រោងនឹងចំណាយប្រមាណ៣,៥លានដុល្លារអាមេរិក ដោយក្នុងនោះ១លានដុល្លារសម្រាប់ផ្លាស់ប្តូរ ដោះស្លាកចាស់ចេញ ដាក់ស្លាកថ្មី ហើយក្រៅពីនោះ មានការផ្លាស់ប្តូរនិមិត្តសញ្ញា នៅតាមទូអេធីអឹមនានា ព្រមទាំងនៅវិសាកាត និងកាតផ្សេងៗ របស់ធនាគារទៀត ។
លោកមានប្រសាសន៍ថា ៖ « ការខាតបង់សម្រាប់ធនាគារអេស៊ីលីដា គឺនៅពេលដែលយើងត្រូវការដោះស្លាកចាស់ ដាក់ស្លាកថ្មីនោះ គឺត្រូវការចាយលុយ ។ ជាក់ស្ដែង គ្រាន់តែនិមិត្តសញ្ញាដែលបំពាក់នៅការិយាល័យកណ្ដាល ទាំងមុខ និងក្រោយ ត្រូវចំណាយអស់ប្រមាណ៣០ម៉ឺនដុល្លារ ហើយបើបូកសរុបសាខានៅទូទៅប្រទេសគិតតែលើនិមិត្តសញ្ញាសុទ្ធ គឺត្រូវចំណាយ១លានដុល្លារអាមេរិក » ។
លោកបន្តថា ក្រៅពីនិមិត្តសញ្ញាដែលបំពាក់នៅតាមការិយាល័យអេស៊ីលីដាហើយ ក៏មានកាត និងប័ណ្ណផ្សេងៗទៀតផងដែរ ដែលត្រូវការបោះពុម្ពនៅក្រៅប្រទេស ហើយបើសរុបទាំងអស់ ទាំងការបោះពុម្ព និងការផ្លាស់ប្តូរនិមិត្តសញ្ញា ត្រូវចំណាយមិនតិចជាង៣,៥លានដុល្លារអាមេរិកនោះទេ ។ យ៉ាងណាក៏ដោយ លោកមានប្រសាសន៍ថា ៖ « បើទោះជាមានគម្រោងផ្លាស់ប្តូរកាត និងប័ណ្ណឥណពន្ធនានាក៏ដោយ តែអតិថិជននៅតែអាចបន្តប្រើប្រាស់កាតចាស់បានដដែល មិនទាន់មានការផ្លាស់ប្តូរភ្លាមៗទេ លុះត្រាតែកាតថ្មីបោះពុម្ព និងបញ្ជូនមកដល់ ទើបមានការប្រែប្រួល » ។
លោកបន្ថែមថា ការផ្លាស់ប្តូរនិមិត្តសញ្ញាថ្មីរបស់ធនាគារអេស៊ីលីដា ភីអិលស៊ី មិនមែនផ្លាស់តែនៅក្នុងប្រទេសកម្ពុជានោះទេ ចំពោះធនាគារអេស៊ីលីដា នៅប្រទេសឡាវ និងមីក្រូហិរញ្ញវត្ថុ អេស៊ីលីដា នៅប្រទេសមីយ៉ាន់ម៉ា ក៏នឹងត្រូវផ្លាស់ប្តូរដែរ ប៉ុន្តែគ្រាន់តែត្រូវការពេលវេលាយូរជាងនៅកម្ពុជា ព្រោះតាមច្បាប់ប្រទេសគេ ការស្នើសុំអ្វីមួយ ត្រូវការពេលយូរ មិនដូចនៅកម្ពុជានោះទេ ។
លោកបញ្ជាក់ថា ៖ « ការផ្លាស់ប្តូរនិមិត្តសញ្ញានេះដែរ យើងមិនធ្វើឱ្យអតិថិជនមានការអាក់អន់ចិត្ត ឬខាតបង់ជាមួយយើងនោះទេ គឺយើងនឹងប្រើប្រាស់ការចំណាយផ្ទាល់របស់យើងទៅលើការផ្លាស់ប្តូរនេះដោយយើងនឹងមិនមានបន្ថែមការប្រាក់ពីអតិថិជននោះទេ។ យ៉ាងណាមិញ ចំពោះនិមិត្តសញ្ញាថ្មីនេះដែរ យើងឃើញថា មានការពេញចិត្តពីសំណាក់អតិថិជនរបស់យើង តាមរយៈបណ្ដាញសង្គមហើយសម្រាប់បុគ្គលិកនិយោជិតរបស់យើងវិញ ក៏ពួកគាត់ពេញចិត្តនូវអ្វីដែលយើងបានកំពុងធ្វើរួមគ្នាដែរ » ។
បើតាមលោកបណ្ឌិតថា ចាប់តាំងពីធនាគារអេស៊ីលីដា ភីអិលស៊ី បើកដំណើរការរហូតមកដល់ពេលនេះ ធនាគារបានចូលរួមចំណែកបង់ពន្ធជូនរដ្ឋប្រមាណជាង២០០លានដុល្លារអាមេរិក ហើយក្នុងឆ្នាំ២០១៦កន្លងទៅ ប្រមាណ៤៧លានដុល្លារអាមេរិក ខណៈឆ្នាំ២០១៧នេះ ធនាគារអេស៊ីលីដា ក៏នឹងបង់ពន្ធមិនតិចជាង៥០លានដុល្លារអាមេរិកដែរ ។
គួរបញ្ជាក់ថា នៅឆ្នាំ២០១៧នេះ ធនាគារអេស៊ីលីដា គ្រោងនឹងរកប្រាក់ចំណេញឱ្យបាន១៣៤លានដុល្លារអាមេរិក ដូចនេះក្រោយពីមានការចំណាយលើការផ្លាស់ប្តូរនិមិត្តសញ្ញា ថ្មីនេះ ប្រាក់ចំណេញរបស់ខ្លួន អាចនឹងមានការប្រែប្រួលបន្ដិចបន្ដួច ៕
ចែករំលែកព័តមាននេះ