ខេត្តកំពង់ឆ្នាំង ៖ បន្ទាប់ពីមានការតវ៉ាជាបន្តបន្ទាប់របស់ប្រជាពលរដ្ឋរស់នៅជាប់មាត់ច្រាំងទន្លេ ក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង កន្លងមកនេះ
ខេត្តកំពង់ឆ្នាំង ៖ បន្ទាប់ពីមានការតវ៉ាជាបន្តបន្ទាប់របស់ប្រជាពលរដ្ឋរស់នៅជាប់មាត់ច្រាំងទន្លេ ក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង កន្លងមកនេះ នៅព្រឹកថ្ងៃទី២០ ខែកុម្ភៈ ឆ្នាំ២០១៧នេះ នៅសាលាបុណ្យភូមិចុងកោះ មានកិច្ចប្រជុំមួយ របស់គណៈកម្មការរៀបចំអភិវឌ្ឍន៍ច្រាំងទន្លេ ក្នុងកំពង់ឆ្នាំង និងប្រជាពលរដ្ឋ អ្នកភូមិចុងកោះដែលនឹងត្រូវបន្លាស់ទីទៅរស់នៅលើដីថ្មី។ ប្រជាពលរដ្ឋទាំងនោះបានលើកឡើងថា ពួកគាត់មិនតវ៉ានឹងការអភិវឌ្ឍន៍របស់អាជ្ញាធរខេត្តនោះទេ តែសូមឲ្យមានការដោះស្រាយឲ្យបានសមស្រប អាចទទួលយកបាន ដូចជាសុំឲ្យអាជ្ញាធរខេត្តជួយចេញថ្លៃរុះរើលំនៅឋានរបស់ពួកគាត់ ដែលត្រូវទៅតាំងទីលំនៅថ្មី ទើបពួកគាត់ព្រមចាកចេញទៅកាន់ទីលំនៅថ្មី ដែលតម្រូវឲ្យប្រជាពលរដ្ឋជួយបង់រំលោះថ្លៃចាក់ដីចំនួន១ពាន់ដុល្លារក្នុង១ប្លង់។
ចំពោះប្រជាពលរដ្ឋ ដែលបំបែកគ្រួសារ មានសៀវភៅគ្រួសារបែកអស់ហើយ តើពួកគាត់អាចទទួលយកដីថ្មីនោះបានឬអត់ ចំណុចមួយទៀតចំពោះសាលាបុណ្យភូមិចុងកោះនេះ ខេត្តមិនទាន់ចង្អុលទីតាំងត្រូវរុះរើទៅនៅទីកន្លែងណា អត់ឃើញមានដោះស្រាយ និងចំណុចចុងក្រោយ ប្រជាពលរដ្ឋក្រីក្របំផុតគ្មានលទ្ធភាព បង់រំលោះទៅនៅដីថ្មីនោះទេ តើអាជ្ញាធរខេត្តគិតយ៉ាងម៉េច។ ឆ្លើយតបនឹងសំណូមពរនេះ លោក ស៊ុន សុវណ្ណរិទ្ធ អភិបាលរងខេត្ត និងជាប្រធានគណៈកម្មការរៀបចំអភិវឌ្ឍន៍ច្រាំងទន្លេក្រុងកំពង់ឆ្នាំងបានលើកឡើងថា ចំពោះការស្នើសុំឲ្យអាជ្ញាធរខេត្តដោះស្រាយថ្លៃរុះរើផ្ទះគឺ សូមបញ្ជាក់ថា កាលពីដំបូងឡើយ យើងបានឯកភាពគ្នាហើយថា ព្រមចាកចេញទៅទីតាំងថ្មី ដោយបង់រំលោះក្នុងដីមួយប្លង់ទំហំ ៥គុណនឹង២០ម៉ែត្រ ក្នុងតម្លៃ ៣.៤០០ដុល្លារ ហើយអាជ្ញាធរខេត្តនឹងត្រូវចេញថ្លៃរុះជូនប្រជាពលរដ្ឋ ចាប់ពី៤០០ដល់១២០០ដុល្លារ តាមទំហំផ្ទះតូចធំ។
តែក្រោយមក ដោយសារតែយល់ថាប្រជាពលរដ្ឋភាគច្រើនគ្មានលទ្ធភាព អាជ្ញាធរខេត្តបានឯកភាពជាមួយក្រុមហ៊ុន ដោយសុំឲ្យក្រុមហ៊ុន យកតែថ្លៃចាក់ដី ក្នុង១ប្លង់១ពាន់ដុល្លារតែប៉ុណ្ណោះ។ ដូចច្នេះប្រជាពលត្រូវសល់ប្រាក់ចំនួន ២.៤០០ដុល្លារទៀតពីការបន្លាស់ទីទៅតាំងទីលំនៅថ្មី ហេតុនេះប្រាក់២.៤០០ដុល្លារដែលនៅសល់នេះគឺស្មើនឹងអាជ្ញាធរខេត្តបង្វែរទៅជាថ្លៃរុះរើជូនបងប្អូនប្រជាពលរដ្ឋវិញ។ ចំពោះប្រជាពលរដ្ឋបំបែកគ្រួសារ លោកសុំឲ្យទៅជួបជាមួយគណៈកម្មាការដើម្បីប្រាប់គាត់ពីបញ្ហានេះ។ចំពោះសាលាបុណ្យភូមិវិញ ខេត្តមិនបានស្នើសុំឲ្យរុះរើទេ តែសុំឲ្យកែច្នៃសាលាបុណ្យនេះទៅជាកន្លែងទេសចរណ៍ នៃកន្លែងទីសក្ការៈវិញ។
ដោយឡែកប្រជាពលរដ្ឋក្រីក្របំផុតគ្មានលទ្ធភាព អាជ្ញាធរបានគិតគូរហើយ តែមិនមែនអ្នកណាក៏អត់លទ្ធភាពនោះទេ អាជ្ញាធរខេត្តនឹងគិតពីបញ្ហានេះ ថាតើគួរឲ្យគាត់ទៅនៅកន្លែងណា។ ចំពោះបញ្ហាទាំងអស់នេះ ពិសេសបញ្ហាស្នើសុំដោះស្រាយថ្លៃរុះរើផ្ទះ លោកនឹងយកព័ត៌មាននេះទៅដាក់ជូនឯកឧត្តមអភិបាលខេត្ត ដើម្បីពិភាក្សាគ្នាសម្រេចលទ្ធផលបែបណានឹងជម្រាបជូននៅពេលក្រោយ។ ជុំវិញបញ្ហានេះ មតិខាងក្រៅខ្លះថា បើគ្មានដំណោះស្រាយជួយចេញថ្លៃរុះរើលំនៅឋាននោះទេ ប្រជាពលរដ្ឋរស់នៅតាមមាត់ទន្លេក្នុងភូមិចុងកោះ ពិតជាមិនឯកភាពឡើយ ប៉ុន្តែក៏មានអ្នកខ្លះលួចប្រាប់ដែរថា អ្នកតវ៉ាខ្លះបានព្រមព្រៀងជាមួយគណៈកម្មការហើយតែបែរជាចេញមុខតវ៉ាទៅវិញ៕
ចែករំលែកព័តមាននេះ