ខេត្តស្វាយរៀង ៖ ឈ្មួញវៀតណាមនាំគ្នាដឹកត្រីជាច្រើនមុខពីប្រទេសខ្លួន ចូលមកលក់នៅក្នុងផ្សារទូទាំងខេត្តស្វាយរៀងដោយឃើញមានត្រីក្រហម ត្រីប្រា ត្រីរ៉ស់ ត្រីអណ្តែង ត្រីឆ្ពឹន ត្រីទីឡាបយ៉ា និងត្រីឌៀប ហើយបានប្រមូលទិញត្រីពីខ្មែរ ទៅប្រទេសវៀតណាមវិញ គឺមានត្រីរ៉ស់ ត្រីឆ្លាត ត្រីកេះ និងអន្ទង់ ។
ទាក់ទិនករណីនេះដែរ កាលពីវេលាម៉ោង១១ និង៣០នាទីព្រឹកថ្ងៃទី២០ កុម្ភៈ នេះ ប្រជាពលរដ្ឋដែលជាអ្នកលក់ត្រីក្នុងផ្សារវាលយន្ត ក្រុងស្វាយរៀង បានឱ្យដឹងថា ជាច្រើនខែមកហើយ ដែលឈ្មួញជនជាតិវៀតណាមបានដឹកត្រីចិញ្ចឹមពីប្រទេសវៀតណាមចូលមកដាក់លក់ផ្ទាល់ នៅតាមចិញ្ចើមថ្នល់ ខាងលិចផ្សារវាលយន្ត ធ្វើឱ្យប៉ះពាល់ដល់ការលក់ដូររបស់អាជីវករលក់ត្រីជនជាតិខ្មែរដែលដាក់លក់ត្រីនៅខាងក្នុងផ្សារវាលយន្ត មិនអាចប្រកួតប្រជែងតម្លៃទីផ្សារ ជាមួយឈ្មួញជនជាតិវៀតណាម ដែលគេដឹកត្រីមកដាក់លក់ផ្ទាល់ ។
ពួកឈ្មួញដើរប្រមូលទិញត្រីស្រែពីខ្មែរយកទៅប្រទេសវៀតណាមវិញ ក្នុងមួយថ្ងៃៗរាប់សិបតោន ពុំដែលឃើញមានសមត្ថកិច្ចណាសួរនាំអ្វីឡើយ ជាពិសេសវៀតណាមដឹកត្រីពីប្រទេសវៀតណាម យកមកដាក់លក់ផ្ទាល់ធ្វើឲ្យបះពាល់ដល់ការរកស៊ីរបស់ប្រជាពលរដ្ឋខ្មែរ ដែលរកស៊ីលក់ត្រីក្នុងផ្សារទូទាំងក្រុងស្រុកខេត្តស្វាយរៀង។
នៅវេលាម៉ោង១១ និង៣០នាទីព្រឹក គឺនៅចំណុចភូមិរោងបន្លែសង្កាត់ស្វាយរៀង ក្រុងស្វាយរៀង គេឃើញរថយន្តដឹកត្រី មកពីស្ទឹងស្លូត ខេត្តព្រៃវែង ដឹកត្រីមកលក់ឱ្យជនជាតិវៀតណាម ដើម្បីដឹកយកទៅប្រទេសវៀតណាម រាប់សិបតោន មិនឃើញមានមន្ត្រីជំនាញណាម្នាក់ មកសួរនាំឡើយ គឺជនជាតិវៀតណាមបោះតង់ ធ្វើរោងប្រមូលទិញត្រីខ្មែរដោយរលូន ។
ក្រុមអ្នកលក់ត្រីខ្មែរ បានសំណូមពរដល់អាជ្ញាធរ គួរមានវិធានការ កុំឱ្យជនជាតិវៀតណាមដឹកត្រីមកលក់ផ្ទាល់បែបនេះ បើអនុញ្ញាតិឲ្យនាំត្រីចូល មេត្តាឱ្យយកមកលក់ឲ្យអាជីវករខ្មែរអ្នកលក់បន្តទើបកូនខ្មែរមានមុខរបរ និងមិនពិបាកប្រកួតប្រជែងតម្លៃទីផ្សារ ជាមួយវៀតណាម ។
ទាក់ទិនករណីខាងលើនេះ មិនអាចសុំការបំភ្លឺពីមន្ត្រីជលផលបានទេនៅល្ងាចថ្ងៃដដែលនេះ រីឯម្ចាស់ផ្សារវាលយន្តក៏មិនអាចរកការបំភ្លឺបានដែរ ។
ចែករំលែកព័តមាននេះ