ចាប់ខ្លួនមន្ត្រីអង្គការសហការការពារសម្បត្តិធនធានធម្មជាតិ៧នាក់
ខេត្តពោធិ៍សាត់ ៖ មន្ត្រីអង្គការសហការការពារសម្បត្តិធនធានធម្មជាតិ៧នាក់ត្រូវបានសមត្ថកិច្ចចាប់ខ្លួនបញ្ជូនទៅសាលាដំបូងខេត្តកាលពីរសៀលថ្ងៃទី១៩ ខែកុម្ភៈ ឆ្នាំ២០១៧ …
ខេត្តពោធិ៍សាត់ ៖ មន្ត្រីអង្គការសហការការពារសម្បត្តិធនធានធម្មជាតិ៧នាក់ត្រូវបានសមត្ថកិច្ចចាប់ខ្លួនបញ្ជូនទៅសាលាដំបូងខេត្តកាលពីរសៀលថ្ងៃទី១៩ ខែកុម្ភៈ ឆ្នាំ២០១៧ បន្ទាប់ពីមានពាក្យបណ្ដឹងរបស់ប្រជាពលរដ្ឋពីរគ្រួសារថាបានធ្វើសកម្មភាពកំហែងយកប្រាក់ពួកគាត់ដឹកឈើធ្វើផ្ទះនិងអុស ។
ជនសង្ស័យទាំង៧នាក់មាន ១-ឈ្មោះ កែវ សារុន ភេទប្រុស អាយុ៧៨ឆ្នាំ, ២-ឈ្មោះ សំ សារ៉ាត់ ភេទប្រុស អាយុ៤៨ឆ្នាំ, ៣-ឈ្មោះ សុខ សារឿន ភេទប្រុស អាយុ៣៧ឆ្នាំ ។ ទាំង៣នាក់មានទីលំនៅស្រុកក្រគរ ខេត្តពោធិ៍សាត់ ។ ៤-ឈ្មោះ ជា សាក់ ភេទប្រុស អាយុ៣៦ឆ្នាំ, ៥-ឈ្មោះ សាក់ ថូ ភេទប្រុស អាយុ៣៧ឆ្នាំ, ៦-ឈ្មោះ ឡាយ សាវឿន ភេទប្រុស អាយុ៤១ឆ្នាំ និង ៧-ឈ្មោះ សុខ សុខុម ភេទប្រុស អាយុ៥៦ឆ្នាំ ។ ទាំង៤នាក់មានទីលំនៅស្រុកបរិបូរណ៍ ខេត្តកំពង់ឆ្នាំង ។
លោកវរៈសេនីយ៍ទោ ម៉ូ លីដា ប្រធានការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តពោធិ៍សាត់ បានឲ្យដឹងថា ការឃាត់ខ្លួនជនសង្ស័យទាំង៧នាក់នេះគឺយោងតាមពាក្យបណ្ដឹងរបស់ប្រជាពលរដ្ឋពីរគ្រួសារ រស់នៅភូមិខ្សាច់ល្អិត ឃុំអន្សារចំបក់ ស្រុកក្រគរ ទី១-ឈ្មោះ ប៊ិត បឿ ភេទប្រុស អាយុ៤៨ឆ្នាំ និងទី២-ឈ្មោះអ៊ុម រុន ភេទប្រុស អាយុ៥៧ឆ្នាំ ដែលបានចោទប្រកាន់ថា កាលពីវេលាម៉ោង៧ និង៣០នាទីល្ងាច ថ្ងៃទី១៧ ខែកុម្ភៈ ឆ្នាំ២០១៧ ក្រុមខ្យល់ព្យុះខាងលើនេះបានឃាត់គោយន្ដដឹកឈើធ្វើផ្ទះ និងដឹកអុសរបស់ពួកគាត់នៅចំណុចជំរំតាឈឿន និងចំណុចថ្មខែល ស្ថិតក្នុងភូមិខ្សាច់ល្អិត ឃុំអន្សារចំបក់ ស្រុកក្រគរ ហើយបានដកយកម៉ាស៊ីនត្រង់ស៊ីន័រ១គ្រឿង ។ នៅពេលពួកគាត់អង្វរសុំវិញ ពួកគេបានទារលុយចំនួន១០ម៉ឺនរៀលដើម្បីជាថ្នូរ ហើយក្រោយមកនៅសល់ត្រឹម៨ម៉ឺនរៀល ។ នៅពេលពួកគាត់ឲ្យលុយគ្រប់ចំនួនហើយ ពួកគេក៏ចេញដំណើរទៅមុខទៀត ដោយបោះសំដីថាលោកឯងចង់ទៅប្ដឹងអ្នកណាក៏ប្ដឹងទៅ ព្រោះពួកគេជាអង្គការសហការការពារសម្បត្តិធនធានធម្មជាតិ ។
លោកប្រធានការិយាល័យបន្តថា បន្ទាប់ពីទទួលពាក្យបណ្ដឹងភា្លម នៅថ្ងៃទី១៨ កុម្ភៈ សមត្ថកិច្ចស្រុកក្រគរ បានចាត់វិធានការចុះស្រាវជ្រាវ និងឃាត់ខ្លួនជនសង្ស័យទាំង៧នាក់នេះជាបន្ទាន់ ។ សមត្ថកិច្ចបានឆែកឃើញមានលិខិតបញ្ជាបេសកកម្មចុះហត្ថលេខាដោយឈ្មោះ ហួន ច័ន្ទថុន សុទ្ទតែជាអគ្គនាយកអង្គការសហការការពារសម្បត្តិធនធានធម្មជាតិ ប៉ុន្តែហួសសុពលភាពហើយ ហើយឈ្មោះ កែវ សារុន ប្រធានស្នាក់ការខេត្ត បានចេញបេសកកម្មបន្តពេញមួយឆ្នាំ២០១៧ ។
លោក ម៉ូ លីដា មានប្រសាសន៍ថា ការឃាត់ខ្លួនក្រុមអង្គការខ្យល់ព្យុះខាងលើនេះ ជាការបង្ក្រាបកុងត្រូលជជុះអនាធិបតេយ្យដែលតែងតែដើរធ្វើសកម្មភាពកំហែងយកប្រាក់ពីប្រជាពលរដ្ឋដឹកឈើធ្វើផ្ទះ និងដឹកអុសគ្រប់ទីកន្លែង ។ គេមិនដឹងថា ក្រុមអង្គការត្បាញអាយនេះបានជួយការពារធនធានធម្មជាតិអ្វីខ្លះដល់ជាតិនោះទេ ព្រោះកន្លងមកឃើញតែដើរធ្វើសកម្មភាពបែបនេះគ្រប់ខេត្តក្រុង ។
ក្រោយពេលចាប់ខ្លួន ជនសង្ស័យទាំង៧នាក់ ត្រូវបានកសាងសំណុំរឿងបញ្ជូនទៅសាលាដំបូងកាលពីរសៀលថ្ងៃទី១៩ កុម្ភៈ ដើម្បីឲ្យស្ថាប័នតុលាការចាត់ការបន្តតាមនីតិវិធី ៕
ចែករំលែកព័តមាននេះ