រាជធានីភ្នំពេញ ៖ ផ្សារមូលបត្រកម្ពុជាអភិវឌ្ឍន៍ទៅបាន ត្រូវការភាពរឹងមាំទាំងផ្នែកតម្រូវការ និងផ្នែកផ្គត់ផ្គង់ ។ ផ្នែកផ្គត់ផ្គង់សំដៅលើចំនួនភាគហ៊ុនចុះបញ្ជីដោយក្រុមការងារ …
រាជធានីភ្នំពេញ ៖ ផ្សារមូលបត្រកម្ពុជាអភិវឌ្ឍន៍ទៅបាន ត្រូវការភាពរឹងមាំទាំងផ្នែកតម្រូវការ និងផ្នែកផ្គត់ផ្គង់ ។ ផ្នែកផ្គត់ផ្គង់សំដៅលើចំនួនភាគហ៊ុនចុះបញ្ជីដោយក្រុមការងារជំរុញការចុះបញ្ជី Listing Incubator Program ដែលបាននិងកំពុងខិតខំធ្វើការជាមួយក្រុមហ៊ុនសក្តានុពលជាច្រើន ពិសេសក្រុមហ៊ុនខ្នាតតូចនិងមធ្យម ដើម្បីជំរុញការចុះបញ្ជីនៅលើផ្សារមូលបត្រ។ ចំណែកផ្នែកតម្រូវការ គឺសំដៅលើចំនួនវិនិយោគិន ពិសេសវិនិយោគិនសកម្ម ហើយផ្សារមូលបត្រកម្ពុជា បានខិតខំយ៉ាងខ្លាំងក្នុងការទាក់ទាញវិនិយោគ ។ ជាក់ស្តែងដូចជា ពិព័រណ៍ផ្សារភាគហ៊ុនកម្ពុជា «My First Stock» ថ្ងៃនេះជាដើម ។ នេះបើយោងតាមការលើកឡើងរបស់អគ្គនាយកនៃក្រុមហ៊ុនផ្សារមូលបត្រកម្ពុជា ។
ក្នុងពិធីបើកសម្ពោធពិព័រណ៍ផ្សារភាគហ៊ុនកម្ពុជា «My First Stock» កាលពីថ្ងៃទី១៩ កុម្ភៈ នៅផ្សារទំនើបអុីអន លោក ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា មានប្រសាសន៍ថា ការចូលរួមវិនិយោគនៅក្នុងផ្សារមូលបត្រ មិនត្រឹមតែជម្រើសវិនិយោគសក្តានុពលក្នុងផែនការហិរញ្ញវត្ថុគ្រួសារ និងផ្ទាល់ខ្លួនប៉ុណ្ណោះទេ ថែមទាំងជាការចូលរួមនៅក្នុងការអភិវឌ្ឍសេដ្ឋកិច្ចជាតិផងដែរ ដោយហេតុថា ទីផ្សារមូលបត្រ គឺជាវិស័យបំពេញឱ្យគ្នានឹងវិស័យធនាគារ ហើយក៏ជាសរសៃឈាមនៃសេដ្ឋកិច្ចផងដែរ ។
លោកបន្តថា ៖ « យើងសង្កេតឃើញថានៅប្រទេសទាំងអស់ស្ទើរពាសពេញពិភពលោកគឺសុទ្ធតែមានផ្សារភាគហ៊ុន ជាឧទាហរណ៍ ប្រទេសក្នុងតំបន់ទន្លេមេគង្គ រួមមាន ថៃ ឡាវ វៀតណាម និងមីយ៉ាន់ម៉ា សុទ្ធតែមានផ្សារភាគហ៊ុន ។ ព្រមជាមួយនឹងការចូលរួមអភិវឌ្ឍសេដ្ឋកិច្ចជាតិ សាធារណជន ឬវិនិយោគ ក៏ទទួលបាននូវអត្ថប្រយោជន៍ជាច្រើន ដូចជា មានជម្រើសក្នុងការវិនិយោគ កាត់បន្ថយហានិភ័យក្នុងការវិនិយោគ ទទួលបាននូវចំណេញមូលធន មានសិទ្ធិក្នុងការរួមចំណែកសម្រេចចិត្ត ។ នៅក្នុងក្រុមហ៊ុនទទួលបានភាគលាភ និងងាយស្រួលក្នុងការបំលែងជាសាច់ប្រាក់ ព្រមទាំងបង្កើននូវឱកាសការងារក្នុងស្រុក នៅពេលដែលក្រុមហ៊ុនទទួលបានដើមទុនរយៈពេលវែងដើម្បីពង្រីកនូវប្រតិបត្តិការអាជីវកម្មរបស់ខ្លួន » ។
លោកបណ្ឌិត ហ៊ាន សាហ៊ីប ប្រធានក្រុមប្រឹក្សាភិបាលនៃក្រុមហ៊ុនផ្សារមូលបត្រកម្ពុជាមានប្រសាសន៍ថា ទន្ទឹមនឹងការផ្សព្វផ្សាយដល់សាធារណជន វិនិយោគិនសក្តានុពល ការជំរុញក្រុមហ៊ុនសក្តានុពលឱ្យចុះបញ្ជី និងការអភិវឌ្ឍទីផ្សារឱ្យកាន់តែស៊ីជម្រៅ និងទូលំទូលាយ គឺជាកត្តាចាំបាច់ដែលត្រូវបំពេញបន្ថែមដើម្បីអនុញ្ញាតឱ្យផ្សារមូលបត្រកម្ពុជាធ្វើដំណើរទៅមុខប្រកបដោយនិរន្តរភាព ។ ក្នុងន័យនេះ រាជរដ្ឋាភិបាលកម្ពុជាបានជំរុញ និងលើកទឹកចិត្តដល់បណ្តាសហគ្រាសនានាឱ្យមកចុះបញ្ជីនៅផ្សារមូលបត្រ ពិសេសបានជំរុញដល់សហគ្រាសសាធារណៈឱ្យចុះបញ្ជីចូលផ្សារមូលបត្រ ក្នុងគោលដៅមិនត្រឹមតែជំរុញដល់ការអភិវឌ្ឍទីផ្សារប៉ុណ្ណោះទេ ថែមទាំងដើម្បីជំរុញដល់ការការធ្វើឯកជនភាវូបនីយកម្ម ការបង្កើនប្រសិទ្ធភាពការងារ បង្កើនផលិតភាព និងការអភិវឌ្ឍផលិតកម្ម ។
លោក ហុង សុខហួរ អគ្គនាយកផ្សារមូលបត្រកម្ពុជា ថ្លែងថា ផ្សារមូលបត្រកម្ពុជានឹងរៀបចំឱ្យមានវិធីសាស្ត្រជួញដូរផ្ទាល់ប្រភេទបញ្ជាទីផ្សារ និងការដំឡើង ដែលកំណត់ថ្លៃពី៥ទៅ១០% ដោយគ្រោងនឹងដាក់ឱ្យដំណើរការក្នុងពេលឆាប់ៗខាងមុខនេះ ហើយយន្តការទាំងនេះនឹងអាចជួយបង្កើនទំហំជួញដូរ អនុញ្ញាតឱ្យវិនិយោគិនអាចកេងចំណេញពីការឡើងចុះនៃថ្លៃបានច្រើនជាងមុន ក៏ដូចជាបង្កើនសន្ទនីភាពទីផ្សារ ។
លោកបន្តថា ៖ « យើងក៏បាននិងកំពុងសិក្សាអំពីលទ្ធភាពនៃការតភ្ជាប់ការជួញដូរជាមួយផ្សារហ៊ុននៅប្រទេសជិតខាង ដូចជាប្រទេសថៃជាដើម ។ ប្រសិនបើរាជរដ្ឋាភិបាល ជាពិសេស គណៈកម្មការមូលបត្រអនុញ្ញាតនោះ វិនិយោគិនបរទេសអាចទិញលក់ភាគហ៊ុនយើង ដោយប្រើគណនីដែលគេមានស្រាប់ ហើយវិនិយោគិនកម្ពុជាក៏អាចទិញលក់ភាគហ៊ុនបរទេស ដោយប្រើគណនីដែលយើងមានស្រាប់ដែរ ដូច្នេះ ជើងមេឃវិស័យមូលបត្រយើងកាន់តែធំ ។ ទន្ទឹងគ្នានេះ យើងកំពុងសិក្សាពីលទ្ធភាពដើម្បីអនុញ្ញាតឱ្យក្រុមហ៊ុនដែលចុះបញ្ជីនៅយើង អាចទៅចុះបញ្ជីនៅផ្សារគេ ហើយក្រុមហ៊ុនដែលចុះបញ្ជីនៅផ្សារគេ អាចមកចុះបញ្ជីនៅផ្សារយើងផងដែរ » ៕
ចែករំលែកព័តមាននេះ