សិក្ខាសាលាស្តីអំពី”ថ្មីៗលើសអំពីវេជ្ជសាស្ត្រមូលដ្ឋាន”
រាជធានីភ្នំពេញ៖ នៅព្រឹកថ្ងៃទី២០ កុម្ភៈ មន្ទីរពេទ្យកាល់ម៉ែត បានបើកសិក្ខាសាលាស្តីពី”ថ្មីៗលើសអំពីវេជ្ជសាស្ត្រមូលដ្ឋាន”ក្រោមអធិបតី លោកសាស្ត្រាចារ្យគង់ សត្យា
រាជធានីភ្នំពេញ៖ នៅព្រឹកថ្ងៃទី២០ កុម្ភៈ មន្ទីរពេទ្យកាល់ម៉ែត បានបើកសិក្ខាសាលាស្តីពី”ថ្មីៗលើសអំពីវេជ្ជសាស្ត្រមូលដ្ឋាន”ក្រោមអធិបតី លោកសាស្ត្រាចារ្យគង់ សត្យា អគ្គនាយករងមន្ទីរពេទ្យកាល់ម៉ែត និងលោកDr.Mamoru Yamashita (CEO,KIshokai Medical Corporaction) មកពីប្រទេសជប៉ុន។
សិក្ខាសាលាស្តីអំពី”ថ្មីៗលើសអំពីវេជ្ជសាស្ត្រមូលដ្ឋាន ទស្សនៈវិស័យឯកទេសសម្ភព និងវេជ្ជសាស្ត្រនៃការជួសជុលបង្កើតកោសិកាថ្មី” ដែលបានសហការរៀបចំឡើងដោយសាកលវិទ្យាល័យ Nagoya ប្រទេសជប៉ុននិងមន្ទីរពេទ្យកាល់ម៉ែតនៅកម្ពុជា។
លោកសាស្ត្រាចារ្យ គង់ សត្យា អគ្គនាយករងមន្ទីរពេទ្យកាល់ម៉ែតបានមានប្រសាសន៍ថា ប្រធានបទនៃសិក្ខាសាលានេះត្រូវបានជ្រើសរើសស្របគ្នាទៅនឹងការយកចិត្តទុកដាក់នៃការថែទាំសុខភាពនាពេលបច្ចុប្បន្នដែលប្រទេសទាំងពីរកម្ពុជា ជប៉ុនកំពុងប្រឈមមុខនឹងការការពារ ការត្រួតពិនិត្យនិងការព្យាបាលជំងឺដោយកម្រិតបច្ចេកទេសជំនាញកាន់តែទំនើបឈានមុខក្នុងប្រព័ន្ធនៃការគ្រប់គ្រងព្យាបាលផ្នែកសម្ភពនិងរោគស្ត្រី ។ លោកសាស្ត្រចារ្យបានបន្តថា ពិសេសជាងនេះទៅទៀតបច្ចេកទេសជំនាញនៃការបណ្តុះបណ្តាលអាចជួយឲ្យយើងរកឃើញនូវជំងឺមហារីករោគស្ត្រី ជម្ងឺមហារីកមាត់ស្បូនរួមទាំងការថែទាំស្ត្រីមានផ្ទៃពោះ សព្វថ្ងៃនេះជំងឺមហារីកកំពុងតែដើរតួជួរមុខគេនៃព្រះរាជាណាចក្រកម្ពុជាយើង ដែលក្រសួងសុខាភិបាលកំពុងធ្វើការយកចិត្តទុកដាក់យ៉ាងខ្លាំងបំផុត ។
ជាមួយគ្នានេះដែរការថែទាំសម្រាប់ស្ត្រីមានផ្ទៃពោះនិងការព្យាលបាលជំងឺមហារីករោគស្ត្រីអាចកាត់បន្ថយនូវអត្រាមរណៈ និងជាការបង្ការជំងឺប្រកបដោយគុណភាព និងប្រសិទ្ធភាពខ្ពស់ ដោយសារវិទ្យាសាស្ត្រកាន់តែរីកចម្រើន ការផលិតឧបករណ៍កាន់តែទំនើប ដែលទាមទារឲ្យវេជ្ជបណ្ឌិតទាំងឡាយត្រូវអភិវឌ្ឍន៍បន្ថែមទាំងចំណេះដឹងនិងបច្ចេកវិទ្យាថ្មីដើម្បីដើរទាន់ការរីកចម្រើននៃសាកលលោក។
លោកសាស្ត្រាចារ្យគង់ សត្យា បានមានប្រសាសន៍ទៀតថា សិក្ខាសាលាដ៏មានសារៈសំខាន់នេះ មានតួនាទីជាវេទិកាគំរូសម្រាប់កិច្ចសហប្រតិតបត្តិការរវាងប្រទេសទាំងពីរកម្ពុជា ជប៉ុន ដែលនឹងនាំឲ្យមានការកែលម្អនៅក្នុងប្រព័ន្ធគ្រប់គ្រង ការព្យាបាលផ្នែកសម្ភពនិងរោគស្ត្រីតាមបែបវិទ្យាសាស្ត្រនៃការថែទាំសម្រាប់ស្ត្រីមានផ្ទៃពោះ និងការព្យាបាលជំងឺមហារីករោគស្ត្រីដើម្បីផ្លាស់ប្តូរបទពិសោធន៍ក្នុងចំណោមគ្រូពេទ្យឯកទេស កម្ពុជា-ជប៉ុន ៕
ចែករំលែកព័តមាននេះ