បោកក្បាលនឹងថ្នល់ជាតិស្លា.ប់យ៉ាងអាណោចអាធ័ម
ខេត្តបាត់ដំបង ៖ បុរសម្នាក់បានដួលបោកក្បាលនឹងផ្លូវជាតិលេខ៥៧ ស្ថិតក្នុងភូមិគីឡូ៣៨ ឃុំត្រែង ស្រុករតន:មណ្ឌល បណ្ដាលឲ្យស្លា.ប់ភ្លាមៗ ខណៈបុរសរូបនេះ …
ខេត្តបាត់ដំបង ៖ បុរសម្នាក់បានដួលបោកក្បាលនឹងផ្លូវជាតិលេខ៥៧ ស្ថិតក្នុងភូមិគីឡូ៣៨ ឃុំត្រែង ស្រុករតន:មណ្ឌល បណ្ដាលឲ្យស្លាប់ភ្លាមៗ ខណៈបុរសរូបនេះជិះម៉ូតូជ្រុលទៅបុករថយន្តកាលពីវេលាម៉ោង៧ និង២៥នាទីយប់ ថ្ងៃទី១៩ ខែកុម្ភៈ ឆ្នាំ២០១៧ ។
លោក ឃុំ សៅណយ នាយផ្នែកនគរបាលសណ្ដាប់ធ្នាប់ បានឲ្យដឹងថា ជនរងគ្រោះឈ្មោះ ដុំ ស្រី ភេទប្រុស អាយុ៥០ឆ្នាំ រស់នៅភូមិ-ឃុំកើតហេតុខាងលើ ជិះម៉ូតូម៉ាកហុងដាឌ្រីម ពាក់ស្លាកលេខ បន្ទាយមានជ័យ 1A-9286 ។
មន្ត្រីដដែលបានបន្តថា គេមិនស្គាល់ម៉ាករថយន្តដែលជនរងគ្រោះជិះម៉ូតូបុកនោះទេ តែគេគ្រាន់តែដឹងថា រថយន្ត ធ្វើដំណើរពីកើតទៅលិចបញ្ច្រាសទិសគ្នាជាមួយអ្នកជិះម៉ូតូ ។
លោក ឃុំ សៅណយ បានបញ្ជាក់ថា បើតាមប្រភពព័ត៌មាន គឺជនរងគ្រោះមានអាការ:ស្រវឹងដល់កម្រិត ហើយបានជិះម៉ូតូទៅបុកចំពីចំហៀងរថយន្តបណ្ដាលឲ្យដួលបោកក្បាលស្លាប់ភ្លាមៗតែម្ដង រីឯរថយន្តមិនត្រូវបានគេស្គាល់ម៉ាកទេ ព្រោះបបានបើករត់បាត់ទាំងយប់ ។
សាក្សីដែលបានឃើញហេតុការណ៍នេះបានឲ្យដឹងថា ជនរងគ្រោះស្រវឹងដល់កម្រិតជិះម៉ូតូរេពេញថ្នល់ ព្រោះគេឃើញផឹកស៊ីជាមួយបក្សពួកតាំងពីព្រឹករហូតមក ។ ប្រភពបញ្ជាក់ថា ពេលនោះជនរងគ្រោះបានជិះម៉ូតូត្រឡប់ទៅផ្ទះ លុះជិះដល់ចំណុចខាងលើ ស្រាប់តែរេចង្កូតឆ្លងទ្រូងថ្នល់ជ្រុលទៅបុកចំចំហៀងរថយន្ត ដែលទំនងបុកចំកង់ក្រោយ ទើបបណ្ដាលឲ្យដួលបោកក្បាលនឹងថ្នល់ស្លាប់តែម្ដង ចំណែករថយន្តបន្ថែមល្បឿនបើករត់បាត់ ។
លោក ម៉ែន បូរី នាយផ្នែកដំណោះស្រាយការិយាល័យចរាចរណ៍ខេត្ត បានឲ្យដឹងថា មន្ត្រីជំនាញ នៃអធិការនគរបាលស្រុករតន:មណ្ឌល បានចុះទៅពិនិត្យកន្លែងកើតហេតុនោះភ្លាមៗ ដើម្បីធ្វើការវាស់វែង បើទោះជារថយន្តបានបើករត់បាត់ក្ដី ។ លោកថា ពេលនេះមន្ត្រីជំនាញកំពុងធ្វើការស្រាវជ្រាវស្វែងរករថយន្ត ខណ:ម៉ូតូជនរងគ្រោះត្រូវនាំយកទៅរក្សាទុកនៅអធិការស្រុកបណ្ដោះអាសន្ន ដើម្បីសួរនាំ និងធ្វើការស្រាវជ្រាវបន្តទៀត ៕
ចែករំលែកព័តមាននេះ