ខេត្តកំពង់ធំ ៖ ជនសង្ស័យដែលត្រូវបានកម្លាំងសមត្ថកិច្ចឧទ្យានុរក្សក្រុមចល័តអន្តរាគមន៍ធ្វើការបង្ក្រាបបានដែលកំពុងធ្វើសកម្មភាពលួចអារឈើនៅក្នុងដែនជម្រកសត្វព្រៃឡង់។ លោក តុប កក្កដា ប្រធានមន្ទីរបរិស្ថានខេត្តកំពង់ធំ បានប្រាប់ឲ្យដឹងនៅព្រឹកថ្ងៃទី១៩ ខែកុម្ភៈ ឆ្នាំ២០១៧នេះថា ជនសង្ស័យដែលត្រូវបានកម្លាំងសមត្ថកិច្ចឧទ្យានុរក្សក្រុមចល័តអន្តរាគមន៍ធ្វើការឃាត់ខ្លួនបាន ខណៈកំពុងតែធ្វើសកម្មភាពលួចចូលកាត់ដើមឈើមួយដ៏ធំដែលមានមុខកាត់០,៩០ម៉ែត្រ រួមជាមួយវត្ថុតាង មានម៉ាស៊ីនត្រង់ស៊ីន័រ១គ្រឿង កាលពីវេលាម៉ោង៨និង១៥នាទីយប់ ថ្ងៃទី១៨ ខែកុម្ភៈ ឆ្នាំ២០១៧ នៅចំណុចអូរក្បាលរាំ ស្ថិតក្នុងដែនជម្រក សត្វព្រៃព្រៃឡង់ ស្រុកសណ្តាន់ ខេត្តកំពង់ធំ។
ជនសង្ស័យឈ្មោះ ផាត ទិត្យ ភេទប្រុស អាយុ២៥ឆ្នាំ រស់នៅភូមិបាជ័យ ឃុំសណ្តាន់ ស្រុកសណ្តាន់ ខេត្តកំពង់ធំ នៅចំពោះមុខសមត្ថកិច្ចជនសង្ស័យបានសារភាពថាដោយសារ ខ្លួនអត់លុយចាយក៏បានទៅខ្ចីលុយរបស់លោកថៅកែម្នាក់ឈ្មោះ ភា រៀ រស់នៅភូមិឃុំជាមួយគ្នាចំនួន៤០ម៉ឺនរៀល ដោយសន្យាថានឹងចូលទៅអារឈើក្នុងព្រៃឡង់ដើម្បីទូទាត់កាត់សងលុយដែលបានខ្ចីគាត់ ហើយលោកថៅកែរូបនោះក៏បានប្រគល់ឲ្យនូវរណាយន្ត១គ្រឿង និងប្រេងសាំង១កាន គ្នា២នាក់ចូលទៅអារឈើ។
នៅពេលដែលអារដើមឈើទាលធំ១ដើមរលំ កំពុងតែរៀបចំច្រៀកស្រាប់តែសមត្ថកិច្ចទៅចាប់ ឃើញដូច្នេះគ្នាគេម្នាក់ទៀតដែលជាអ្នកចាំបោសអាចម៍រណាឈ្មោះ សាន ឃើញទាន់ក៏រត់គេចខ្លួនបាត់ទៅ នៅសល់តែរូបគេត្រូវសមត្ថកិច្ចឃាត់ខ្លួនតែម្តង។ ពាក់ព័ន្ធនឹងករណីខាងលើ លោកប្រធានមន្ទីរបន្តថាដោយសារតែព្រៃឡង់មានទំហំធំ ផ្លូវចេញចូលក្នុងព្រៃមានច្រើនរាប់មិនអស់ ចំណែកសមត្ថកិច្ចជំនាញមានគ្នាតិច ហើយជនសង្ស័យបានប្តូររូបភាពពីការធ្វើសកម្មភាពលួចចូលអារឈើពេលថ្ងៃ មកធ្វើនៅពេលយប់វិញ។
នៅពេលធ្វើសកម្មភាពពួកគេមានអ្នកកាន់អាយកូមរង់ចាំមើលផ្លូវ ព្រមទាំងមានអាវុធកែច្នៃដាក់តាមខ្លួនទៀតផង បើសមត្ថកិច្ចយើងខ្វះការប្រុងប្រយ័ត្នច្បាស់ជាគ្រោះថ្នាក់ ដែលជាហេតុធ្វើឲ្យការបង្ក្រាបជួបបញ្ហាលំបាកជាខ្លាំង ដូចជាករណីនេះជាដើមទំរាំតែចាប់បាន កម្លាំងសមត្ថកិច្ចយើងត្រូវលូនក្នុងព្រៃពេលយប់ងងឹតពីចម្ងាយទំរាំចូលទៅចាប់បាននោះ។ ជនសង្ស័យម្នាក់នេះត្រូវបានកសាងសំណុំរឿងបញ្ជូនទៅកាន់តុលាការដើម្បីចាត់ការតាមផ្លូវច្បាប់។
ជុំវិញបញ្ហាខាងលើនេះ ប្រជាពលរដ្ឋក៏បានសំណូមពរដល់ស្ថាប័នតុលាការខេត្តកំពង់ធំ សូមមេត្តាធ្វើការស្រាវជ្រាវចាប់ខ្លួនមេខ្លោងដែលនៅពីក្រោយខ្នង នៃការឲ្យចូលទៅកាប់ទន្ទ្រានព្រៃឡង់នេះឲ្យបាន យកមកធ្វើការផ្តន្ទាទោសចំពោះមុខច្បាប់ឲ្យបានតឹងរ៉ឹងបំផុត ពីព្រោះពួកនេះគឺជាឧក្រិដ្ឋជនបំផ្លាញព្រៃឈើ បើមិនដូច្នោះទេនោះគឺមិនអាចថែរក្សា និងការពារព្រៃដែលនៅសេសសល់បន្តិចបន្តួចនេះឲ្យបានគង់វង្សនោះឡើយ៕
ចែករំលែកព័តមាននេះ