ខេត្តប៉ៃលិន ៖ រហូតមកដល់ពេលនេះ សកម្មភាពជីកកកាយដីភ្នំបានកម្រើកឡើងវិញហើយ បន្ទាប់ពីស្ងប់ស្ងាត់មួយរយៈពេលដែលភាគច្រើនគេសង្កេតឃើញការជីកកកាយភ្នំនេះ ប៉ះចំកន្លែងដែលនៅក្បែរៗផ្លូវថ្នល់
ខេត្តប៉ៃលិន ៖ រហូតមកដល់ពេលនេះ សកម្មភាពជីកកកាយដីភ្នំបានកម្រើកឡើងវិញហើយ បន្ទាប់ពីស្ងប់ស្ងាត់មួយរយៈពេលដែលភាគច្រើនគេសង្កេតឃើញការជីកកកាយភ្នំនេះ ប៉ះចំកន្លែងដែលនៅក្បែរៗផ្លូវថ្នល់ជាតិតែម្តង ។ ខណៈពេលភ្ញៀវទេសចរជាតិ និងអន្តរជាតិធ្វើដំណើរចេញចូលទៅមកគេរិះគន់យ៉ាងខ្លាំងទៅអាជ្ញាធរខេត្ត ក៏ដូចជាមន្ទីរពាក់ព័ន្ធ ដោយមិនចេះការពារសោភ័ណភាពនោះទេ ។
ជាក់ស្តែងកាលពីថ្ងៃទី១៧ ខែកុម្ភៈ ឆ្នាំ២០១៧ នេះ មានសកម្មភាពជីកកកាយដីភ្នំមួយកន្លែង ស្ថិតនៅជាប់ខាងឆ្វេង បណ្តោយផ្លូវជាតិលេខ៥៧ ក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានពីប្រជាពលរដ្ឋបានឱ្យដឹងថា បន្ទាប់ពីសារព័ត៌មាន និងទូរទស្សន៍បានចុះផ្សាយជាញឹកញាប់ពាក់ព័ន្ធនឹងការជីកកកាយដីភ្នំលក់ ក៏ដូចជាយកទៅអភិវឌ្ឍន៍ផ្លូវថ្នល់ ធ្វើសាលារៀន វត្តអារ៉ាមជាដើម ដោយគេមិនឃើញជីកកកាយភ្នំដែលនៅជ្រៅផុតពីភ្នែកមនុស្សនោះឡើយ គឺនាំគ្នាយកគ្រឿងចក្រទៅជីកកកាយដីភ្នំនៅក្បែរៗផ្លូវថ្នល់យ៉ាងបើកចំហរទៅវិញ ។ ប្រភពបន្តទៀតថា ជាក់ស្តែងភ្នំជាច្រើននៅចំណុចភ្នំដោះក្រមុំ ក្នុងភូមិក្ងោ ក ឃុំស្ទឹងកាច់ ត្រូវបានអាជ្ញាធរយកគ្រឿងចក្រទៅជីកយ៉ាងក្រហេងក្រហូងបាត់អស់រូបរាងដើម ដោយជីកភ្នំនេះបន្តិច ភ្នំនោះបន្តិច លុះពេលភ្ញៀវជាតិ និងអន្តរជាតិបើកបរម៉ូតូ ឬរថយន្តក្បែរនោះ គេមើលទៅមិនសមភ្នែកទាល់តែសោះ ។
រហូតមកដល់ពេលនេះ ស្រាប់តែភ្នំដ៏ស្រស់ស្អាតជាទីទាក់ទាញភ្នែកភ្ញៀវទេសចរ បែរជាត្រូវគេជីកកកាយធ្វើឱ្យបាត់បង់អស់សោភ័ណភាពក្រុង ហើយបាត់បង់ទ្រង់ទ្រាយដើម ថែមទាំងអាក្រក់មើលទៀតផង ។ ម្យ៉ាងវិញទៀត នៅក្នុងខេត្តប៉ៃលិន មានភ្នំជាច្រើនដែលនៅជ្រៅៗ ឆ្ងាយពីផ្លូវជាតិ ឬឆ្ងាយពីភ្នែក គួរណាស់ទៅជីកកកាយយកដីកន្លែងនោះវិញ ទើបមិនប៉ះពាល់ដល់វិស័យទេសចរ ។
ចែករំលែកព័តមាននេះ