លួចលាក់លេងយ៉ាងទ្រហឹងអឹងកង ទីបំផុតបង្ក្រាបបានហើយ
រាជធានីភ្នំពេញ ៖ សង្វៀនជល់មាន់លួចលាក់មួយកន្លែងនៅភូមិ ឡកំបោ សង្កាត់ស្វាយប៉ាក ត្រូវបានកម្លាំង នគរបាលខណ្ឌឫស្សីកែវ ចុះបង្ក្រាប កាលពីវេលាម៉ោង១១ និង២០នាទីព្រឹក
រាជធានីភ្នំពេញ ៖ សង្វៀនជល់មាន់លួចលាក់មួយកន្លែងនៅភូមិ ឡកំបោ សង្កាត់ស្វាយប៉ាក ត្រូវបានកម្លាំង នគរបាលខណ្ឌឫស្សីកែវ ចុះបង្ក្រាប កាលពីវេលាម៉ោង១១ និង២០នាទីព្រឹក ថ្ងៃទី១៩ ខែកុម្ភ ឆ្នាំ២០១៧ ដោយមានការចូលរួមសហការពីនគរបាលប៉ុស្តិ៍នានា ព្រមទាំងសណ្តាប់ធ្នាប់ សាលាខណ្ឌផងដែរ ។
ប្រភពព័ត៌មានឲ្យដឹងថា ទីតាំងសង្វៀនជល់មាន់នេះបានបើកលេងចល័តលួចលាក់ ដោយក្រុមអ្នកញៀនមាន់បានណាត់គ្នាមកជល់ក្នុងដីឡូតិ៍ខាងលើយ៉ាងពពាក់ពពួន តែថ្ងៃសៅរិ៍ និងថ្ងៃអាទិត្យ តែប៉ុណ្ណោះ ។
ប្រភពឲ្យដឹងទៀតថា មុនពេលសមត្ថកិច្ចចុះទៅដល់ គេឃើញក្រុមអ្នកភ្នាល់មាន់បានពពាក់ពពួនគ្នាចាប់ មាន់យ៉ាងទ្រហឹងអឹងកង ។ ខណៈនោះសមត្ថកិច្ចខណ្ឌឫស្សីកែវក៏បានចុះទៅធ្វើការឡោមព័ទ្ធ ធ្វើឲ្យក្រុមអ្នកលេងមាន់រត់ប្រសាចចោលម៉ូតូ ។
សមត្ថកិច្ចនគរបាលបានឲ្យដឹងថា មនុស្ស៥នាក់ត្រូវបានឃាត់ខ្លួន ព្រមទាំងមាន់៥ក្បាល, ម៉ូតូ១៣គ្រឿង ព្រមទាំងជញ្ជីង ខ្នាយមាន់ ត្រូវបានសមត្ថកិច្ចដកហូតបាន ហើយបញ្ជូនមកកាន់អធិការដ្ឋាននគរបាលខណ្ឌ ដើម្បីសាកសួរ និងចាត់ការតាមច្បាប់ ៕
ចែករំលែកព័តមាននេះ