ខេត្តមណ្ឌលគិរី៖ បនល្បែងបញ្ជល់មាន់ ឬគេហៅថា បក្សីកីឡា និងល្បែងចាក់អាប៉ោង ត្រូវបានមហាជនរាយការណ៏ថា កំពុងបើកឲ្យជនជាតិខ្មែរចូលលេង យ៉ាងអនាធិបតេយ្យជ្រកក្រោមស្លាកកាស៊ីណូ
ខេត្តមណ្ឌលគិរី៖ បនល្បែងបញ្ជល់មាន់ ឬគេហៅថា បក្សីកីឡា និងល្បែងចាក់អាប៉ោង ត្រូវបានមហាជនរាយការណ៏ថា កំពុងបើកឲ្យជនជាតិខ្មែរចូលលេង យ៉ាងអនាធិបតេយ្យជ្រកក្រោមស្លាកកាស៊ីណូ Hoang Dieu គ្មានការរំខានពីអាជ្ញាធរឡើយ ហើយសង្វៀនជល់មាន់នេះត្រូវគេដឹងថា លោកប៊ូ សំអុល នាយប៉ុស្តិ៍ការពារព្រំដែនគោកឡាប៉ាខេ ចំណុះឲ្យវរៈសេនាតូចនគរបាលការពារព្រំដែនគោកលេខ៦២១ ជាអ្នកប៉ាវផ្តាច់ពីម្ចាស់កាស៊ីណូ ដើម្បីឲ្យជនជាតិខ្មែរចូលលេងដោយសេរី ។
កាស៊ីណូដែលទើបចាប់ផ្តើមដំណើរការឈ្មោះ HOAN GIEU មានទីតាំងក្បែរមាត់ច្រកទ្វារអន្តរជាតិឡាប៉ាខេ ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា បានបើកដំណើរការតាំងពីដើមឆ្នាំ២០១២ ។ ប្រភពបានឲ្យដឹងទៀតថា ក្នុង១អាទិត្យសង្វៀនជល់មាន់ខាងលើ បើកលេងបីថ្ងៃ គឺថ្ងៃអង្គារ ថ្ងៃព្រហស្បតិ៍ និងថ្ងៃសៅរ៍ ។
ប្រភពបានបន្តថា រាល់ថ្ងៃដែលគេបើកលេង គឺមានជនជាតិខ្មែរមិនតិចជាង១០០នាក់នោះទេ ដែលបានយកមាន់ទៅជល់ជាមួយជនជាតិវៀតណាម ឬជល់ជាមួយជនជាតិខ្មែរគ្នាឯង ដោយមានភ្នាល់ដាក់លុយក្នុងមួយគូៗចាប់ពី៥០០ដុល្លារ ទៅ៥០០០ដុល្លារ។ មិនត្រឹមល្បែងជល់មាន់ទេដែលបានបូមលុយពីខោប៉ាវជនជាតិខ្មែរ នៅមានល្បែងអាប៉ោងមួយមុខទៀត ដែលបានធ្វើឲ្យអ្នករស់នៅខេត្តមណ្ឌលគិរី ខ្លះបានចាញ់អស់រលីងពីខ្លួន។ ការបើកឲ្យមានជនជាតិខ្មែរចូលលេងល្បែងក្នុងកាស៊ីណូបែបនេះ គឺផ្ទុយទៅនឹងច្បាប់ ដែលរាជរដ្ឋាភិបាលសម្រេចអនុញ្ញាតឲ្យមានតែជនបរទេសប៉ុណ្ណោះ ដែលមានសិទ្ឋិចូលលេងល្បែងក្នុងកាស៊ីណូនៅតាមព្រំដែន។ ប្រភពបានបញ្ជាក់ទៀតថា កាស៊ីណូ Hoang Dieu ដែលបើកឲ្យជនជាតិខ្មែរចូលលេងតាមចិត្តបែបនេះ គឺមានការប៉ាវផ្តាច់ដោយលោកប៊ូ សំអុល នាយប៉ុស្តិ៍ការពារព្រំដែន ។
ទង្វើរបស់លោកនាយប៉ុស្តិ៍ព្រំដែនគោកឡាប៉ាខេខាងលើនេះ គឺបាននិងកំពុងប្រឆាំងទៅនឹងគោលនយោបាយភូមិឃុំមានសុវត្ថិភាព របស់រាជរដ្ឋាភិបាលដែលបានដាក់ចេញ សម្រាប់ឲ្យអាជ្ញាធរថ្នាក់ក្រោមជាតិ ចុះបង្ក្រាបនិងបង្ការមិនឲ្យមានបទល្មើសល្បែងស៊ីសងក្នុងភូមិឃុំរបស់ខ្លួនគ្រប់គ្រង។
សូមបញ្ជាក់ថា កន្លងមកកាស៊ីណូ Hoang Dieu ត្រូវបានលោកព្រះរាជអាជ្ញារងអមសាលាដំបូងខេត្ត ដឹកនាំកម្លាំងកងរាជអាវុធហត្ថខេត្ត អាវុធហត្ថស្រុក នឹងអាវុធហត្ថស្នាក់ការសន្តិសុខ ចុះទៅត្រួតពិនិត្យ និងផ្អាកដំណើរការបណ្តោះអាសន្នផងដែរ កាលពីថ្ងៃទី៣១ មិនា ២០១៦។
ក្នុងប្រតិបត្តិការពេលនោះ លោកចេង សូរិយា មេបញ្ជាការរងកងរាជអាវុធហត្ថខេត្ត ដែលចុះប្រតិបត្តិការករណីលើខាងលើបានឲ្យដឹងថា កាស៊ីណូនេះបានហួសច្បាប់អនុញ្ញាតតាំងពីខែធ្នូ ២០១៥ មកម្ល៉េះ ប៉ុន្តែថៅកែកាស៊ីណូនៅតែបន្តអនុញ្ញាតឲ្យភ្ញៀវចូលលេង។ លោកបានបន្តថា នៅពេលសមត្ថកិច្ចសុំត្រួតពិនិត្យច្បាប់អនុញ្ញាត តំណាងរបស់កាស៊ីណូ បានយកច្បាប់ដែលហួសសុពលភាពមកបង្ហាញ រួមជាមួយនឹងលិខិតស្នើសុំច្បាប់ថ្មីមួយច្បាប់ ដែលចុះថ្ងៃខែកាលពីខែមករា ២០១៦ មកឲ្យសមត្ថកិច្ចពិនិត្យមើល ខណៈច្បាប់អនុញ្ញាតថ្មីមិនទាន់ធ្លាក់មកទេ។ ដូច្នេះកាស៊ីណូនេះ មិនខុសពីកាស៊ីណូខុសច្បាប់ឡើយ ព្រោះមិនទាន់មានច្បាប់អនុញ្ញាតថ្មីធ្លាក់មកផង តែម្ចាស់កាស៊ីណូនោះហ៊ានឲ្យភ្ញៀវចូលលេងពេញៗ នេះជាការបញ្ជាក់បន្ថែមរបស់លោកមេបញ្ជាការរងអាវុធហត្ថខេត្ត។
ចំណែក លោក សាន សុភៈ ព្រះរាជអាជ្ញាររងអមសាលាដំបូងខេត្តមណ្ឌលគិរីបានឲ្យដឹងថា នៅពេលនេះ យើងគ្រាន់តែចុះមកពិនិត្យនឹងធ្វើស្ថិតិចំពោះជនបរទេសដែលចូលមកលេងក្នុងកាស៊ីណូខាងលើ ថាតើមានច្បាប់ត្រឹមត្រូវដែរ ឬក៍អត់? ។ ចំពោះចំណាត់ការយ៉ាងណានោះ មិនត្រូវបានលោក សាន សុភៈ បញ្ជាក់ឲ្យដឹងនោះទេ ព្រោះសមត្ថកិច្ចកំពុងធ្វើការបន្ត។ ក្នុងសកម្មភាពចុះត្រួតពិនិត្យច្បាប់របស់កាស៊ីណូដែលមានឈ្មោះ HOANG DIEU គេសង្កេតឃើញមានជនវៀតណាមទាំងស្រីប្រុស ក្មេងចាស់ប្រមាណជិត៣០០នាក់ កំពុងសម្ងំលេងល្បែងរាប់សិបមុខក្នុងកាស៊ីណូយ៉ាងកងរំពង មិនត្រឹមតែប៉ុណ្ណោះគេក៏ឃើញមានវត្តមានជនជាតិខ្មែរចូលទៅលេងល្បែងក្នុងកាស៊ីណូខាងលើដែរ តែអ្នកខ្លះរត់ចេញក្រៅអស់មួយចំនួនធំ ។
ប្រភពដែលកោះសន្តិភាពទទួលបាននិងទុកចិត្តបំផុតបានឲ្យដឹងថា ក្នុងចំណោមជនជាតិវៀតណាមប្រមាណ៣០០នាក់នោះ ភាគច្រើនពួកគេចូលមកលេងល្បែងដោយខុសច្បាប់ គឺមានចំនួនតិចតួចណាស់ ដែលចូលមកលេងស្របច្បាប់ ព្រោះជនជាតិវៀតណាមទាំងនោះ មិនមានលិខិតឆ្លងដែន ។ ប្រជាពលរដ្ឋដែលរស់នៅជិតកាស៊ីណូនឹងច្រកព្រំដែនខាងលើបាននិយាយថា ជារៀងរាល់ថ្ងៃ គេតែងឃើញមានរថយន្តប្រភេទកូរ៉េពីរគ្រឿង បានដឹកជញ្ជូនជនជាតិវៀតណាម តាមច្រកទ្វេរភាគីឡាប៉ាខេ ទៅកាស៊ីណូ HOANG DIEU ដែលមានចម្ងាយប្រមាណតែ២០០ម៉ែត្រពីដងប៉ារាស់ព្រំដែន។ ប្រជាពលរដ្ឋបានបន្តថា មិនមែនមានតែជនជាតិវៀតណាមទេ ដែលចូលមកលេងល្បែងនៅក្នុងកាស៊ីណូនេះ សូម្បីជនជាតិខ្មែរទាំងប្រុសទាំងស្រី ក៏និយមចូលទៅលេងល្បែងនៅកាស៊ីណូហ្នឹងដែរ ហើយភាគច្រើនជនជាតិខ្មែរប្រុសៗចូលទៅលេងល្បែងបញ្ជល់មាន់ស្ទើររាល់ថ្ងៃ ។
ក្រុមអ្នកតាមដានស្ថានការណ៏សង្គមបានលើកឡើងថា ការអនុញ្ញាតឲ្យជនជាតិដទៃឆ្លងដែនចូលមកប្រទេសកម្ពុជាដោយសេរី មិនមានច្បាប់ទម្លាប់បែបនេះ គឺកំពុងធ្វើឲ្យប្រទេសជាតិប្រឈមនឹងបញ្ហាជាច្រើនដូចជាខាតបង់ថវិកាបង់ចូលជាតិ ព្រោះនៅពេលមានជនជាតិបរទេសណាម្នាក់ ត្រូវការចូលមកលេងនៅក្នុងប្រទេសកម្ពុជាត្រូវទិញសំបុត្រចូលដើម្បីសម្គាល់អត្តសញ្ញាណ ធ្វើឲ្យកើតមានបទល្មើសឆក់ ប្លន់ លួច បញ្ហាអសន្តិសុខនានានិងសណ្នាប់ធ្នាប់ ព្រោះសមត្ថកិច្ចមិនអាចកំណត់អត្តសញ្ញាណរបស់ជនបរទេសទាំងនោះថា ពួកគេជាប់ពាក់ព័ន្ឋជាមួយនឹងអំពើខុសច្បាប់ដែរ ឬយ៉ាងណា?
ការចេញចូលដោយសេរីរបស់ក្រុមអ្នកញៀនល្បែងទាំងនោះ ក៏បានធ្វើឲ្យប៉ះពាល់ដល់សន្តិសុខមួយចំនួន ត្បិតអាចមានជនឱកាសនិយមមួយចំនួន បន្លំចូលមកប្រព្រឹត្តបទល្មើសនានាលើទឹកដីខ្មែរ ព្រោះតែគ្មានការត្រួតពិនិត្យពីសមត្ថកិច្ច។
មហាជនដែលតាមដានសកម្មភាពចេញ-ចូលរបស់ជនជាតិវៀតណាម ដែលចូលមកលេងល្បែងនៅកាស៊ីណូ HOANG DIEU បានរិះគន់នគរប៉ុស្តិ៍ច្រកទ្វេរភាគីព្រំដែនឡាប៉ាខេ និងមន្ត្រីជំនាញនានា ដែលមានតួនាទីយាមកាមនៅច្រកព្រំដែននោះថា ព្រោះតែប្រយោជន៏បុគ្គល អស់លោកបែរជាភ្លេចគិតពីបញ្ជា ដែលអាចកើតមានជាយថាហេតុ ។ ប្រជាពលរដ្ឋបានសំណូមពរដល់លោក តូច យ៉ុន ស្នងការនគរបាលខេត្តមណ្ឌលគិរី គួរចាត់វិធានការចំពោះមន្ត្រីរបស់លោកផង ព្រោះភាពអសកម្មរបស់មន្ត្រីក្រោមឱវាទរបស់លោកស្នងការ មិនមែនទើបតែកើតមាននោះទេ គឺមានរាប់ខែឆ្នាំមកហើយតាំងពីកាស៊ីណូ HOANG DIEU បើកដំណើរការមក៕
ចែករំលែកព័តមាននេះ