រាជធានីភ្នំពេញ ៖ កាលពីឆ្នាំ២០១៥ និង២០១៦ មានគម្រោងខុនដូ និងអគារជាច្រើនត្រូវបានប្រកាសសាងសង់នៅកម្ពុជា ជាពិសេសនៅរាជធានីភ្នំពេញ ក្នុងនោះគម្រោងដែលប្រកាសសាងសង់ច្រើនជាងគេ ជាគម្រោងខុនដូ និងអគារការិយាល័យ ។ រហូតមកដល់ពេលនេះ មានគម្រោងចំនួនតូចបានពន្យារការសាងសង់ ឬលុបចោលតែម្ដង តែក៏មានគម្រោងមួយចំនួនធំនៅតែបន្តការអភិវឌ្ឍរបស់ខ្លួនដដែល ។
លោក ឌឹត ចណ្ណា អគ្គនាយកក្រុមហ៊ុនអចលនទ្រព្យឡាក់គី បានឱ្យដឹងថា បច្ចុប្បន្ននេះវិស័យខុនដូ មិនទាន់មានអ្វីជាបញ្ហាចោទនៅឡើយទេ ព្រោះតាមការសង្កេតជាក់ស្ដែង ការលក់គម្រោងខុនដូ និងអគារនៅតែមានជាបន្តបន្ទាប់ គ្រាន់តែមិនមមាញឹកច្រើនដូចកាលពីអំឡុងឆ្នាំ២០១៥ និងឆ្នាំ២០១៦ ។
លោកនិយាយថា ៖ « តាំងពីចុងឆ្នាំ២០១៦រហូតដល់ដើមឆ្នាំ២០១៧នេះ ទីផ្សារខុនដូ មិនទាន់មានការប្រែប្រួលប៉ុន្មានទេ តែគម្រោងថ្មីៗដូចជាខុនដូ និងអគារផ្សេងៗជាដើម មិនទាន់មានប្រកាសសាងសង់ច្រើនដូចមុន ។ ដោយឡែកបើនិយាយពីការលក់គម្រោងវិញ នៅឆ្នាំ ២០១៧នេះក៏មិនទាន់មានអ្វីប្រែប្រួលដែរ បើធៀបនឹងឆ្នាំ២០១៦កន្លងទៅ គឺម្ចាស់គម្រោងនៅតែបន្តលក់គម្រោងដដែល » ។
បើទោះជាយ៉ាងណាក្តី តាំងពីចុងឆ្នាំ ២០១៦ រហូតមកដល់បច្ចុប្បន្ន មានគម្រោងមួយចំនួនបានប្រកាសពន្យារ និងលុបចោលតែម្ដង ក្នុងហេតុផលផ្សេងៗ ។ លោក ឌឹត ចណ្ណា ក៏បាននិយាយផងដែរថា ទាក់ទងនឹងរឿងនឹងគម្រោងខ្លះ ដោយអ្នកវិនិយោគមើលឃើញថា ទីផ្សារហាក់ចង្អៀត មិនអាចទៅរួច ក៏ប្រកាសលុបចោលឬពន្យារ ដោយទុកលុយវិនិយោគលើវិស័យផ្សេងៗដែលកំពុងមានសក្ដានុពល ។ ក្នុងចំណោមគម្រោងប្រកាសផ្អាក ឬលុបចោលមួយចំនួនទៀត អាចមិនមានទុនគ្រប់គ្រាន់ក្នុងការបន្តឬសាងសង់ ជាក់ស្ដែងមានតែដី តែមិនមានប្រភពទុនច្បាស់ជាដើម ។ មួយវិញទៀត ក៏ទាក់ទងនឹងសន្ទុះនៃការលក់របស់គាត់ផងដែរ ។
ទោះជាយ៉ាងណា លោក ឌឹត ចណ្ណា បានបញ្ជាក់ថា សកម្មភាពនៃដំណើរការរបស់ខុនដូ នៅកម្ពុជានាពេលបច្ចុប្បន្ននេះ ដូចជាមិនមានផលប៉ះពាល់ដល់វិស័យខុនដូទាំងមូលទេ ព្រោះបើដឹងថាខ្លួនទៅមិនរួច ហើយឈប់នោះ តែបើដឹងថាទៅមិនរួចហើយ នៅតែប្រឹងទៀតនោះ ទីបំផុតវានឹងមានបញ្ហាកាន់តែធំ ។
លោកឧកញ៉ា នួន រឹទ្ធី អគ្គនាយកក្រុមហ៊ុន អចលនទ្រព្យ Khmer Foundation Appraisals បានឱ្យដឹងថា ជាការពិតណាស់បច្ចុប្បន្ននេះ ការលក់គម្រោងខុនដូនៅកម្ពុជា មានការធ្លាក់ចុះមែន ហើយការធ្លាក់ចុះនេះដោយសារតែការដាក់តម្លៃខ្ពស់លើសពីតម្លៃទីផ្សារជាក់ស្ដែងនៅកម្ពុជា។ លោកនិយាយថា ៖« អ្នកលក់មិនបានគិតថាខុនដូអភិវឌ្ឍន៍នៅស្រុកខ្មែរ តែមិនបានដាក់តម្លៃឱ្យសមនឹងតម្លៃស្រុកខ្មែរ បែរជាក់តម្លៃនៅទីផ្សារអន្តរជាតិ ដូចជានៅចិន ឬសិង្ហបុរីទៅវិញ អីចឹង ហើយទើបការលក់មានភាពយឺតយ៉ាវ » ។
លោកបន្តថា សព្វថ្ងៃនេះបើក្រឡេកមើលពីតម្លៃខុនដូនៅកម្ពុជា ដែលមានតម្លៃចាប់ពី ៣,៥ម៉ឺនទៅ៦ឬ៧ម៉ឺនដុល្លារនៅតែលក់បានជាធម្មតា តែបើតម្លៃខ្ពស់ៗជាងនេះពិបាកលក់ និងមិនសូវមានអ្នកទិញនោះទេ ។ ម្យ៉ាងទៀតការលក់ខុនដូមួយចំនួនមិនដាច់នោះ ដោយសារតែអតិថិជននៅរង់ចាំមើលពេលខុនដូនោះ សាងសង់រួច ទើបទិញតាមក្រោយ ។
លោក ប៉ូ អ៊ាវគង់ អ្នកគ្រប់គ្រងទូទៅនៃក្រុមហ៊ុនអចលនទ្រព្យ Advance Real Estateបានឱ្យដឹងដែរថា ពិតជាមានការលុបចោលនូវគម្រោងខុនដូមួយចំនួនមែន តែតួលេខប៉ុន្មាននោះ មិនទាន់ដឹងច្បាស់នៅឡើយទេ ។ បើសិនជាការលុបចោលគម្រោងអភិវឌ្ឍន៍នេះកាន់តែច្រើននោះ វាក៏នឹងធ្វើឱ្យប៉ះពាល់មួយចំនួនដល់វិស័យខុនដូនេះដែរ ហើយរាជរដ្ឋាភិបាលក៏គួរតែមានច្បាប់សម្រាប់ចងដល់អ្នកអភិវឌ្ឍន៍ដើម្បីកុំឱ្យមានករណីបែបហ្នឹងកើតឡើងជាបន្តបន្ទាប់ទៀត ។
លោកបន្តថា បញ្ហាក្នុងវិស័យខុនដូនៅកម្ពុជា វាបានកើតឡើងតាំងតែពីពាក់កណ្ដាល និងចុងឆ្នាំ ២០១៦មកម្ល៉េះ ដោយសារតែមានគម្រោងខ្លះដែលទទួលបានអាជ្ញាប័ណ្ណ មិនសូវជាសម្រុកធ្វើប៉ុន្មានទេ គឺនៅធ្វើយឺតៗ ដែលខុសពីការសន្យាជាមួយអតិថិជនថា នឹងបញ្ចប់នៅពេលនេះ ឬនៅពេលនោះ ។
គួររំលឹកថា តម្លៃគម្រោងខុនដូមួយចំនួននៅកម្ពុជា ប្រហាក់ប្រហែលនឹងតម្លៃផ្ទះល្វែង និងវីឡានៅតាមបុរីមួយចំនួននៅជាយក្រុង តែយ៉ាងណា ក៏ពលរដ្ឋនៅតែគាំទ្រផ្ទះល្វែង ឬវីឡាជាងខុនដូដែរ ។
លោកប៉ូ អ៊ាវគង់ បញ្ជាក់ថា ៖ « រឿងនេះជាការពិតហើយ ព្រោះឥរិយាបថរបស់ប្រជាពលរដ្ឋកម្ពុជាមកលើខុនដូ មិនទូលំទូលាយនៅឡើយទេ គឺថាពួកគាត់នៅតែស្រលាញ់ និងចង់រស់នៅផ្ទះល្វែងផ្ទាល់ដី និងជាលក្ខណៈកម្មសិទ្ធិឯកជន ដែលខុសពីរស់នៅជាសហកម្មសិទ្ធិ ។ ម្យ៉ាងទៀតការស្នាក់នៅផ្ទះល្វែង ឬវីឡាអាចនៅបានគ្នាច្រើន និងអាចសង់ឡើងលើបន្តទៀតបាន តែបើនៅខុនដូ មានតែ១បន្ទប់ ឬ ២បន្ទប់ប៉ុណ្ណោះ » ៕
ចែករំលែកព័តមាននេះ