ខេត្តសៀមរាប ៖ កម្លាំងអធិការដ្ឋាននគរបាលស្រុកស្វាយលើសហការជាមួយនគរបាលមូលដ្ឋាន បានធ្វើការចុះបង្ក្រាបករណីល្បែងស៊ីសងខុសច្បាប់(ជល់មាន់)លួចលាក់មួយកន្លែង ស្ថិតនៅក្នុងព្រៃ ខណៈពួកគេបានឃើញសមត្ថកិច្ចទៅដល់នាំគ្នារត់បាតជើងសព្រាតអស់តែម្តង ប៉ុន្តែបន្សល់ទុកនៅវត្ថុតាងមួយចំនួនធំ រួចយកមកទុកនៅអធិការស្រុកជាបណ្តោះអាសន្ន ។
ក្នុងប្រតិបត្តិការបង្ក្រាបករណីល្បែងស៊ីសងខុសច្បាប់(ជល់មាន់)នេះបានធ្វើឡើងនៅវេលាម៉ោង១១និង៣០នាទីព្រឹកថ្ងៃទី១៧ ខែកុម្ភៈ ឆ្នាំ២០១៧ ស្ថិតនៅក្នុងភូមិត្រពាំងខ្នា ឃុំស្វាយលើ ស្រុកស្វាយលើ ខេត្តសៀមរាប ។
លោកវរសេនីយ៍ត្រី ស៊ុន អេង អធិការនគរបាលស្រុកស្វាយលើបានឱ្យដឹងថា មុននិងឈានដល់ការបង្ក្រាបក្រុមអ្នកញៀនល្បែងប្រជល់មាន់នេះ គឺសមត្ថកិច្ចបានធ្វើការស្រាវជ្រាវ ជាច្រើនលើកមកហើយ ទើបឈានដល់ការបង្ក្រាប ដោយសារតែក្រុមអ្នកញៀនល្បែងនេះ តែងតែនាំគ្នាចល័តទីតាំងជល់មាន់ជារៀងរហូត ជាពិសេសពេលម៉ោង១១តែម្តង ដែលជាពេលវេលារបស់សមត្ថកិច្ចយើងសម្រាកពេលបាយថ្ងៃត្រង់តែម្តង ។
លោកបានបន្តថា បន្ទាប់ពីកម្លាំងយើងតាមដានឃើញទាន់ ខណៈពេលនោះពួកញៀនល្បែងទាំងអស់នោះ ក្រឡេងឃើញកម្លាំងយើងភ្លាមៗក៏នាំគ្នារត់បាតជើងសព្រាត ពីចម្ងាយ ធ្វើឱ្យពួកយើងតាមចាប់មិនបាន ។
ក្នុងកិច្ចប្រតិបត្តការណ៍ខាងលើនេះ សមត្ថកិច្ចនគរបាលរបស់លោកបានចាប់បានតែវត្ថុតាងមានដូចជា ជញ្ជើងថ្លឹងមាន់ចំនួន០១គ្រឿង មាន់ជល់០២ក្បាល ម៉ូតូចំនួន០៨គ្រឿង ។
បច្ចុប្បន្នវត្ថុតាងទាំងអស់ត្រូវបានយកមករក្សាទុកនៅអធិការដ្ឋាននគរបាលស្រុកស្វាយលើ ដើម្បីឱ្យម្ចាស់ចូលខ្លួនមកធ្វើកិច្ចសន្យាអប់រំ បើករណីនៅមិនរៀងចាលទេ សមត្ថកិច្ចនគរបាលយើងនិងអនុវត្តតាមវិធានការច្បាប់ ៕
ចែករំលែកព័តមាននេះ