ស្ត្រីម្នាក់ឈឺពោះឆ្លងទន្លេ ហើយត្រូវបានប្តីដឹកតាមម៉ូតូយកទៅមន្ទីរពេទ្យមិនទាន់ ក៏បានឈប់ម៉ូតូឆ្លងទន្លេនៅតាមផ្លូវបានកូនស្រីម្នាក់ បង្កអោយមានការភ្ញាក់ផ្អើល
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ស្ត្រីម្នាក់ឈឺពោះឆ្លងទន្លេ ហើយត្រូវបានប្តីដឹកតាមម៉ូតូយកទៅមន្ទីរពេទ្យមិនទាន់ ក៏បានឈប់ម៉ូតូឆ្លងទន្លេនៅតាមផ្លូវបានកូនស្រីម្នាក់ បង្កអោយមានការភ្ញាក់ផ្អើលដល់បងប្អូនប្រជាពលរដ្ឋ ក៏ដូចជារថយន្តសាមុយ ចេញអន្តរាគមន៍ជួយទៅសង្គ្រោះភ្លាមៗផងដែរ កាលពីវេលាម៉ោង១១និង៣០នាទីយប់ ថ្ងៃទី១៤ ខែកញ្ញា ឆ្នាំ២០២២ ជិតស្ថានីយបូមទឹកស្អុយបឹងត្របែក ផ្លូវ២៧១ ស្ថិតក្នុងសង្កាត់ផ្សារដើមថ្កូវ ខណ្ឌចំការមន។
សេចក្តីរាយការណ៍បន្តថា ស្ត្រីសម្រាលកូនតាមផ្លូវខាងលើនេះ មានឈ្មោះ ឃឹម ដាលីន អាយុ២៦ឆ្នាំ មុខរបរកម្មកររោងចក្រផលិតនំ ស្នាក់នៅភូមិមិត្តភាព១ សង្កាត់ព្រែកឯង ខណ្ឌច្បារអំពៅ។
បើតាមសម្ដីស្ត្រីជាម្តាយបង្កើតរបស់ជនរងគ្រោះដែលសម្រាលកូននៅតាមផ្លូវ បានអោយដឹងថា មុនពេលកើតហេតុ កូនស្រីរបស់គាត់បានឈឺពោះឆ្លងទន្លេ ហើយពេលនោះបុរសជាប្តីក៏បានដឹកប្រពន្ធតាមម៉ូតូ ដោយមានគ្នា៣នាក់ ចេញពីសង្កាត់ព្រែកឯង ខណ្ឌច្បារអំពៅ គោលបំណងទៅសម្រាលនៅមន្ទីរពេទ្យបង្អែកឬស្សីស្រស់ តែពេលទៅដល់មន្ទីរពេទ្យបង្អែកឬស្សីស្រស់ ស្រាប់តែមន្ទីរពេទ្យលិចទឹក។
ម្តាយស្ត្រីរងគ្រោះបន្តទៀតថា ពេលនោះពួកគាត់ក៏បន្តដឹកជនរងគ្រោះទៅមន្ទីរពេទ្យបង្អែកច្បារអំពៅវិញ លុះពេលទៅដល់មន្ទីរពេទ្យបង្អែកច្បារអំពៅពេទ្យក៏អត់ទទួល ដោយសារតែកូនក្នុងផ្ទៃអត់គ្រប់គីឡូ ទើបពួកគាត់បានដឹកបន្តដើម្បីយកមកមន្ទីរពេទ្យរុស្ស៊ីបន្តទៀត ប៉ុន្តែពេលដឹកមកដល់ជិតស្ថានីយបូមទឹកស្អុយបឹងត្របែក ដោយតែស្ត្រីរងគ្រោះឈឺពោះខ្លាំងពេកមិនអាចទ្រាំបាន ក៏បានឈប់ម៉ូតូអែបចិញ្ចើមផ្លូវសម្រាលបានកូនស្រីម្នាក់ចេញមកក្រៅដោយសុវត្ថិភាពតែម្តងទៅ។
ពាក់ព័ន្ធក្នុងហេតុការណ៍ខាងលើនេះដែរ បង្កអោយមានការភ្ញាក់ផ្អើលដល់បងប្អូនប្រជាពលរដ្ឋ នាំគ្នាជួយយកអាសាស្ត្រីរងគ្រោះ និងបានទាក់ទងហៅរថយន្តសាមុយអោយមកសង្គ្រោះជនរងគ្រោះទៅមន្ទីរពេទ្យផងដែរ។
ក្រោយពេលកើតហេតុ ស្ត្រីរងគ្រោះ និងកូនតូច ត្រូវបានរថយន្តសាមុយឯកជន មកជួយដឹកយកទៅមន្ទីរពេទ្យរុស្ស៊ី ដើម្បីអោយក្រុមគ្រួសារពេទ្យជួយសង្គ្រោះស្ត្រីខាងលើ៕
ចែករំលែកព័តមាននេះ