ខ្លាចាប់គោស៊ីសម្ងំ ឆ្មាស៊ីត្រីអាំងជាន់កដកស្លាប
ខេត្តស្ទឹងត្រែង ៖ ពលរដ្ឋម្នាក់នៅភូមិអន្លង់ស្អំ ឃុំអន្លង់ជ្រៃ ស្រុកថាឡាបរិវ៉ាត់ នៅរសៀលថ្ងៃទី១៦ ខែកុម្ភៈ បានសម្រេចដាក់ពាក្យប្តឹងប្រធានការិយាល័យអន្តរាគមន៍
ខេត្តស្ទឹងត្រែង ៖ ពលរដ្ឋម្នាក់នៅភូមិអន្លង់ស្អំ ឃុំអន្លង់ជ្រៃ ស្រុកថាឡាបរិវ៉ាត់ នៅរសៀលថ្ងៃទី១៦ ខែកុម្ភៈ បានសម្រេចដាក់ពាក្យប្តឹងប្រធានការិយាល័យអន្តរាគមន៍នៃស្នងការដ្ឋាននគរបាលខេត្ត និងលោក គង់ ផាន់ណា ក្រុមប្រឹក្សាស្រុកថាឡាបរិវ៉ាត់ ដោយចោទថា រួមគ្នាប្រើហិង្សាបណ្តាលឱ្យគាត់បែកក្បាលកាលពីរសៀលថ្ងៃទី១៥ ខែកុម្ភៈ នៅតាមផ្លូវជាតិលេខ៩ ក្នុងស្រុកថាឡាបរិវ៉ាត់ ។
លោក ញ៉ែម វ៉ា អាយុ៣៧ឆ្នាំ បានសរសេរក្នុងពាក្យបណ្តឹងចុះថ្ងៃទី១៦ ខែកុម្ភៈ ដាក់ចូលទៅកងរាជអាវុធហត្ថខេត្ត អះអាងថា ខ្លួនគាត់ជាជនរងគ្រោះស្នើសុំសមត្ថកិច្ចជួយរកយុត្តិធម៌លើករណីហិង្សាដោយចេតនា ប្រព្រឹត្តនៅផ្លូវជាតិលេខ៩ ក្នុងស្រុកថាឡាបរិវ៉ាត់ កាលពីរសៀលថ្ងៃទី១៥ ខែកុម្ភៈ ។ ពាក្យបណ្តឹងបានចោទលោកវរសេនីយ៍ទោ សំរិទ្ធ សុកសេដ្ឋា ប្រធានការិយាល័យអន្តរាគមន៍នៃស្នងការដ្ឋាននគរបាលខេត្ត និងលោក គង់ ផាន់ណា ក្រុមប្រឹក្សាស្រុកថាឡាបរិវ៉ាត់ ថាបានប្រើកាំភ្លើងខ្លីភ្ជង់គុម្ពត្រចៀកគំរាមបាញ់ និងប្រើខ្នោះដៃវាយក្បាលគាត់បណ្តាលឱ្យបែកហូរឈាម ដោយសារខឹងសម្បាខណៈបើករថយន្តព្យាយាមតាមកាក់ម៉ូតូដឹកឈើរបស់គាត់ ។
លោក ញ៉ែម វ៉ា បានរៀបរាប់ទៀតថា នៅវេលាម៉ោងជាង២រសៀលថ្ងៃទី១៥ ខែកុម្ភៈ គាត់បានដឹកឈើមូលក្រាក់តាមម៉ូតូ ដើម្បីដោះស្រាយ ជីវភាពគ្រួសារ ។ លុះទៅដល់ចំណុចខាងលើ លោក សំរិទ្ធ សុកសេដ្ឋា បានបើករថយន្តស៊ីរ៉ែនកាក់ឱ្យឈប់ ហើយគាត់បានសុំសម្រុះសម្រួលដោយជូនកាតទូរស័ព្ទ៥ដុល្លារ តែលោកប៉ូលិសមិនព្រមយក។
ពេលនោះគាត់ក៏បន្តដំណើរទៅមុខ ទៀត ហើយលោកប៉ូលិសក៏បន្តដេញ កាក់ដដែល រហូតឈានទៅប្រើហិង្សា ដោយលោក គង់ ផាន់ណា ក្រុមប្រឹក្សាស្រុក ជាអ្នកចាប់ក្រៀកកពីក្រោយ ហើយលោក សំរិទ្ធ សុកសេដ្ឋា ជាអ្នកយកខ្នោះវាយក្បាល ព្រមទាំងដកកាំភ្លើងខ្លីពីចង្កេះភ្ជង់គុម្ពត្រចៀក គំរាមបាញ់បំបែកក្បាលថែមទៀត ។ បន្ទាប់មក ដោយឃើញមនុស្សផ្អើលឈូឆរទៅមើល ទើបលោកប៉ូលិសរូបនោះយកកាំភ្លើងខ្លីស៊កចង្កេះវិញ ។
ទាក់ទងនឹងបញ្ហាខាងលើ លោកប៉ូលិសនិយាយថា អ្នកដឹកឈើតាមម៉ូតូមួយចំនួនបានផ្គើន និងប្រើប្រាស់សម្តីមិនសមរម្យដាក់សមត្ថកិច្ចគ្រាចុះអនុវត្តភារកិច្ច ។ សម្រាប់អ្នកប្រកបរបរដឹកឈើតាមម៉ូតូកន្លងមក យល់ឃើញថាពួកគាត់ជាពលរដ្ឋដឹកឈើបន្តិចបន្តួចគ្រាន់ដោះស្រាយជីវភាព អ្នកខ្លះក៏មានការមួម៉ៅដែរព្រោះអស់លុយពីហោប៉ៅ ដោយសារសមត្ថកិច្ចតាមផ្លូវកាក់ទារលុយគ្រប់គ្នា រួមទាំងអ្នកកាន់ប័ណ្ណសារព័ត៌មានមួយក្តាប់តូចទៀតផង ។ ដោយសារអង្វរមិនស្តាប់ក៏តែងទាស់សម្តីគ្នា ហើយនេះជាដើមចមរវាងសមត្ថកិច្ច និងពលរដ្ឋដឹកឈើ ។
ប្រភពពីមហាជនក៏បានលើកឡើងដែរថារឿងផលប្រយោជន៍បន្តិចបន្តួចអាចអប់រំ និងលើកលែងដល់ពលរដ្ឋខ្លះទៅ ពុំគួរប្រើហិង្សាក្នុងនាមជាថ្នាក់ដឹកនាំសមត្ថកិច្ចម្នាក់ទៅលើពលរដ្ឋបែបនេះទេ ។
ស្នងការនគរបាលខេត្តស្ទឹងត្រែង លោក ម៉ៅ តារា តែងប្រជុំផ្សព្វផ្សាយអប់រំដល់មន្ត្រីនគរបាលគ្រប់រូប ត្រូវលើកកម្ពស់ស្មារតីយកចិត្តទុកដាក់ខ្ពស់លើបញ្ហាអសន្តិសុខសង្គម ប្រឆាំងរាល់បទល្មើសកើតមានក្នុងស្រុក-ក្រុង ខេត្ត ដើម្បីធានាជូននូវសន្តិសុខ សុវត្ថិភាពដល់ពលរដ្ឋ។ ជាងនេះទៀត លោកបានបញ្ជាដាច់ខាតមិនឱ្យមានមន្ត្រីនគរបាលរូបណាចតរថយន្តដាក់កុងត្រូលជជុះ ឬពួនស្ទាក់យកលុយជាថ្នូរនឹងការរដោះលែងបទល្មើសនោះដែរ ហើយសម្រាប់ពលរដ្ឋក្រីក្រដឹកឈើតាមម៉ូតូដោះស្រាយជីវភាព លោករឹតតែមិនអនុញ្ញាតឱ្យមន្ត្រីនគរបាលប៉ះពាល់ថែមទៀត ។ ដូច្នេះរឿងរ៉ាវដែលបានកើតឡើង មានតែបុគ្គលនគរបាលមួយចំនួនដែលមានចរិតរឹងរូសមិនគោរព
បញ្ជា ។
នេះបើតាមការឱ្យដឹងពីមន្ត្រីនគរបាលគំរូមួយរូប ។ លោកស្នងការ ម៉ៅ តារា បញ្ជាក់ថា ករណីនេះលោកកំពុងចាត់ការតាមនីតិវិធីហើយ បើរកឃើញថាមន្ត្រីនគរបាលរូបនោះបានប្រព្រឹត្តដូចបណ្តឹងមែន និងចាត់ការតាមវិន័យរបស់នគរបាលជាតិ ។
លោក អៀង វ៉ាន់ឌី មេបញ្ជាការកងរាជអាវុធហត្ថខេត្ត បានប្រាប់កាលពីព្រឹកថ្ងៃទី១៧ ខែកុម្ភៈថា អង្គភាពលោកបានទទួលសំណុំរឿងនេះហើយ ។ លោក ហូ សំអុល មន្ត្រីសម្របសម្រួលអង្គការអាដហុកប្រចាំខេត្តស្ទឹងត្រែងបានបញ្ជាក់ថា ប្រសិនបើដូចការលើកឡើងខាងលើ ករណីនេះជាការរំលោភសិទ្ធិមនុស្សធ្ងន់ធ្ងរហើយព្រោះក្នុងនាមគាត់ជាមន្ត្រីអនុវត្តច្បាប់ បើគាត់យល់ឃើញថាជនម្នាក់នោះប្រព្រឹត្តខុសច្បាប់ស្តីពីព្រៃឈើ គាត់ត្រូវធ្វើតាមនីតិវិធីច្បាប់ ។ ដូច្នេះគាត់មិនត្រូវវ៉ៃគេនោះទេ ហើយបើទាក់ទិននឹងផ្លូវច្បាប់ កាលណាគាត់វ៉ៃគេ គាត់ខុសច្បាប់អុីចឹងព្រះរាជអាជ្ញា លោកត្រូវបើកការស៊ើបអង្កេត ៕
ចែករំលែកព័តមាននេះ