លោក គឹម សុខ ត្រូវបាននាំទៅឃុំខ្លួននៅពន្ធនាគារព្រៃស
រាជធានីភ្នំពេញ ៖ ចៅក្រមស៊ើបអង្កេតសាលាដំបូងរាជធានីភ្នំពេញ លោក រស់ ពិសិដ្ឋ នៅរសៀលថ្ងៃទី១៧ កុម្ភៈ ឆ្នាំ២០១៧ បានសម្រេចចេញដីកាបង្គាប់ឲ្យឃុំខ្លួនលោក
រាជធានីភ្នំពេញ ៖ ចៅក្រមស៊ើបអង្កេតសាលាដំបូងរាជធានីភ្នំពេញ លោក រស់ ពិសិដ្ឋ នៅរសៀលថ្ងៃទី១៧ កុម្ភៈ ឆ្នាំ២០១៧ បានសម្រេចចេញដីកាបង្គាប់ឲ្យឃុំខ្លួនលោក គឹម សុខ អ្នកឃ្លាំមើលបញ្ហាសង្គមនិងនយោបាយ បន្ទាប់ព្រះរាជអាជ្ញារងលោក សៀង សុខ បានចោទប្រកាន់ពីរបទល្មើស គឺញុះញង់ឲ្យប្រព្រឹត្តបទល្មើសប៉ះពាល់ធ្ងន់ធ្ងរ ដល់សន្តិសុខសង្គមតាមមាត្រ៤៩៤. មាត្រា៤៩៥ និងបទបរិហារកេរ្តិ៍ជាសាធារណៈមាត្រា៣០៥នៃច្បាប់ព្រហ្មទណ្ឌ ។
តុលាការបានចំណាយពេលប្រមាណជាង៣ ម៉ោងក្នុងការសាកសួរ ហើយត្រូវបានបញ្ជូនទៅឃុំខ្លួនក្នុងពន្ធនាគារព្រៃសហើយ តាមបណ្តឹងមេធាវីតំណាងដោយអាណត្តិរបស់សម្តេចតេជោ ហ៊ុន សែន នាយករដ្ឋមន្ត្រី ដែលចោទគណបក្សប្រជាជនកម្ពុជាថា ជាអ្នកសម្លាប់លោកបណ្ឌិត កែម ឡី ។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញបានបញ្ជាក់ថា លោក រស់ ពិសិដ្ឋ ជាចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនលោក គឹម សុខ កាលពីរសៀលថ្ងៃទី១៧ កុម្ភៈ បន្ទាប់ពីលោកព្រះរាជអាជ្ញារង សៀង សុខ សម្រេច ចោទប្រកាន់ចំនួនពីរបទល្មើស ។
លោក លី សុផាន់ណា បញ្ជាក់ថា អយ្យការបានបញ្ជូនសំណុំរឿង និងជនសង្ស័យទៅចៅក្រមស៊ើបសួរ និងបានបញ្ចប់នីតិវិធីបង្ហាញខ្លួន លើកដំបូង និងពិភាក្សាដេញដោលរួចមក ចៅក្រមសម្រេចឃុំខ្លួនបណ្តោះអាសន្នលើជនត្រូវចោទឈ្មោះ គឹម សុខ ។
មានការកត់សម្គាល់ថា មានអ្នកគាំទ្រលោក គឹម សុខ រាប់រយនាក់មកប្រមូលផ្តុំគ្នាឃ្លាំមើលការសម្រេចរបស់តុលាការនៅជុំវិញអគារសាលាដំបូង ។ ទោះបីបែបណា ក្រុមសមត្ថកិច្ច បានប្រើល្បិចដើម្បីបាននាំខ្លួនលោក គឹម សុខ ទៅពន្ធនាគារដោយបានយករថយន្តចំនួន២គ្រឿង មកដាក់បញ្ឆោតនៅទ្វារមុខមួយគ្រឿង និងទ្វារក្រោយមួយគ្រឿង ។ នៅពេលលោក គឹម សុខ ត្រូវបាននាំខ្លួនចុះពីបន្ទប់ចៅក្រមតាមជណ្តើរយន្តសមត្ថកិច្ចបាននាំខ្លួនជនជាប់ចោទចូលរថយន្តខាងទ្វារក្រោយ តែបើកចេញ ដោយរថយន្តដាក់នៅទ្វារមុខឆ្ពោះទៅកាន់ពន្ធនាគារព្រៃស ។ ពេលសមត្ថកិច្ចបញ្ជូនចូលរថយន្តលោក គឹម សុខ មិនបាននិយាយអ្វីទេ ក្រៅតែពីអ្នកគាំទ្រនៅខាងក្រៅស្រែកឡូឡា ។
ការចូលបំភ្លឺនៅតុលាការរបស់លោក គឹម សុខ នៅថ្ងៃទី១៧ កុម្ភៈនេះ គឺបន្ទាប់ពីបរាជ័យដាក់លិខិតសុំពន្យារពេលចូលឆ្លើយបំភ្លឺមុនមួយថ្ងៃនៃដីកាកោះឲ្យបង្ហាញខ្លួន ។ ប៉ុន្តែសំណើរបស់លោកត្រូវតុលាការច្រានចោលភ្លាមៗ តែប៉ុន្មានម៉ោងប៉ុណ្ណោះ ។
កាលពីថ្ងៃទី១៣ ខែកុម្ភៈ លោក សៀង សុខ តំណាងអយ្យការបានចេញដីកាកោះឲ្យលោក គឹម សុខ ចូលខ្លួនបំភ្លឺតបទៅនឹងបណ្ដឹងសម្តេចតេជោ ហ៊ុន សែន ។ លោក គី តិច ដែលមេធាវីតំណាងដោយអាណត្តិរបស់នាយករដ្ឋមន្ត្រី បានប្ដឹងលោក គឹម សុខ ដោយសំអាងថា លោក គឹម សុខ បានចោទថា បក្សប្រជាជនកម្ពុជា ជាអ្នកបញ្ជាឲ្យបាញ់សម្លាប់លោកបណ្ឌិត កែម ឡី ដែលលោក គឹម សុខ លើកឡើងកាលពីថ្ងៃទី១១ ខែកុម្ភៈ ។ ក្នុងសំណុំរឿងព្រហ្មទណ្ឌនេះដែរ លោកមេធាវី គី តិច ដោយអាណត្តិតំណាងសម្តេចតេជោ ហ៊ុន សែន ទាមទារសំណងជំងឺចិត្តចំនួន៥០ម៉ឺនដុល្លារ ។
លោក គឹម សុខ ដែលរងការប្ដឹងផ្ដល់បានលើកឡើងថា មូលហេតុនៃសំណើសុំពន្យារពេល គឺដោយសារលោករកមេធាវីតតាំងតាមផ្លូវច្បាប់មិនទាន់បាន ។ ម្យ៉ាងទៀត ដីកាកោះរបស់លោក សៀង សុខ នេះ បង្គាប់ដោយប្រញាប់ពេក ដែលមិនអាចទុកពេលឲ្យលោករកមេធាវីបានទាន់ពេល ។
លោក គឹម សុខ បានថ្លែងនៅមុខអគារតុលាការថា កម្លាំងស្លៀកពាក់ស៊ីវិលជាច្រើននាក់បានតាមដានលោករាល់ថ្ងៃ ។ ក្នុងពេលជាមួយគ្នានេះដែរ មេធាវីតំណាងដោយអាណត្តិរបស់សម្តេចតេជោ ហ៊ុន សែន បានយកបណ្ដឹងមួយថ្មីទៀត ប្ដឹងលោក គឹម សុខ កាលពីព្រឹកថ្ងៃទី១៦ កុម្ភៈ ។ បណ្ដឹងដាច់ដោយឡែកមួយទៀតនេះ ត្រូវបានលោក គី តិច បញ្ជាក់ថា លោកប្ដឹងពីបទថា លោក គឹម សុខ បរិហារកេរ្តិ៍រាជរដ្ឋាភិបាលថា បានរៀបចំជាប្រព័ន្ធក្នុងការសម្លាប់មនុស្ស ៕
ចែករំលែកព័តមាននេះ