ដំណើររបស់លោក គឹម សុខ ឆ្ពោះមកសាលាដំបូងតាមដីកាកោះ
រាជធានីភ្នំពេញ ៖ តាំងពីម៉ោង៨ព្រឹក លោក គឹម សុខ អ្នកឃ្លាំមើលបញ្ហាសង្គម និងនយោបាយនៅកម្ពុជា បានធ្វើដំណើរដោយថ្មើរជើងចេញពី វត្តចាស់
រាជធានីភ្នំពេញ ៖ តាំងពីម៉ោង៨ព្រឹក លោក គឹម សុខ អ្នកឃ្លាំមើលបញ្ហាសង្គម និងនយោបាយនៅកម្ពុជា បានធ្វើដំណើរដោយថ្មើរជើងចេញពី វត្តចាស់ ក្នុងសង្កាត់ជ្រោយចង្វា បំណងឆ្ពោះទៅតុលាការរាជធានីភ្នំពេញ តាមដីកាកោះរបស់អយ្យការអមសាលាដំបូងរាជធានីដោយមានព្រះសង្ឃជាងដប់អង្គ រួមទាំងស្ថាបនិកបណ្តាញព្រះសង្ឃឯករាជ្យដើម្បីយុតិ្តធម៌សង្គម ព្រះតេជគុណ ប៊ុត ប៉ុនតិញ និងពលរដ្ឋនៅតាមដងផ្លូវរាប់សិបនាក់ផ្សេងទៀតក៏ចូលរួមអមដំណើរអ្នកវិភាគរូបនេះដើរឆ្ពោះទៅតុលាការដូចគ្នា ។
តាមគន្លងផ្លូវថ្មើរជើងប្រមាណជិត៦គីឡូម៉ែត្រ លោក គឹម សុខ បានចំណាយពេលជិត៣ម៉ោងទម្រាំទៅដល់សាលាដំបូងរាជធានីភ្នំពេញដោយនៅតាមផ្លូវលោកត្រូវដើរឆ្លងកាត់ស្ពានជ្រោយចង្វា មុខស្ថានទូតអាមេរិក និងមុខទីស្តីការគណៈរដ្ឋមន្ត្រី ខណៈលោកបានឈប់សម្រាកនៅលើសួនច្បារ ទល់មុខសាកលវិទ្យាល័យជាតិគ្រប់គ្រង និងឈប់សម្រាកនៅមុខទីស្តីការគណៈរដ្ឋមន្ត្រីបន្តិចផងដែរ មុនពេលទៅដល់តុលាការរាជធានីភ្នំពេញ នៅវេលាម៉ោង១១ថ្ងៃត្រង់ ។ ដែលការធ្វើដំណើររបស់លោកក៏មានការរារាំងពីក្រុមសន្តិសុខខណ្ឌជ្រោយចង្វាផងដែរ ។ នៅទីនោះមានមនុស្សរាប់រយនាក់កំពុងរង់ចាំនៅមុខតុលាការក្រុង ដោយស្រែកអបអរលើកទឹកចិត្តជូនលោក គឹម សុខ រហូតដល់តុលាការក្រុងបិទរបងទ្វារដែក ញែកហ្វូងអ្នកគាំទ្រឲ្យនៅខាងក្រៅ និងលោក គឹម សុខ ត្រូវបាននាំចូលទៅក្នុងតុលាការ ។
សំឡេងគាំទ្រ និងហ្វូងមហាជនអមដំណើរដ៏ច្រើនបែបនេះ ត្រូវបានលោក គឹម សុខ ថ្លែងថា ជាការសបញ្ជាក់ពីការយល់ដឹងរបស់ពលរដ្ឋ ដែលគាំទ្រគំនិតរួមរួបជាតិរបស់លោក ផ្ទុយបញ្ច្រាសពីផ្នត់គំនិតរបស់គណបក្សប្រជាជនកម្ពុជា ។ សម្រាប់លោក គឹម សុខ ដំណើរចូលច្រកតុលាការត្រូវបានអ្នកតាមដានថា អាចប្រឈមនឹងការចាប់ដាក់ពន្ធនាគារ ព្រោះលោកគ្មានថវិកា និងគ្មានចេតនាបង់ប្រាក់សងជំងឺចិត្តរាប់ម៉ឺនដុល្លារតាមការទាមទាឡើយ ។ លោក គឹម សុខ បញ្ជាក់ថា លោកបានត្រៀមខ្លួនរួចហើយ ប្រសិនបើលោកអាចនឹងបាត់បង់ជីវិត ក្នុងបុព្វហេតុ ទាមទារឲ្យមានដំណើរផ្លាស់ប្តូរប្រជាធិបតេយ្យនៅកម្ពុជា ។ លោកយល់ថា ការស្លាប់នឹងរំលាយត្រឹមតែរូបកាយលោកប៉ុណ្ណោះ តែគំនិតនៃការផ្លាស់ប្តូរកម្ពុជា នឹងមិនស្លាប់ទៅជាមួយលោកនោះទេ ៕
ចែករំលែកព័តមាននេះ