ការវាយប្រហារបំផ្ទុះរថយន្តមួយកើតមានកាលពីថ្ងៃទី១៦ កុម្ភៈ ក្នុងតំបន់ក្រុងបាដាដបណ្តាលឱ្យមនុស្សស្លាប់យ៉ាងតិច៥២នាក់និងរបួសជាច្រើនសិបនាក់ ។ នោះជាការវាយប្រហារយ៉ាងបង្ហូរឈាមបំផុតមួយនៅរដ្ឋធានីអីុរ៉ាក់នាដើមឆ្នាំនេះ ។
ការវាយប្រហារនោះជាលើកទី៣នៅក្រុងបាដាដរយៈពេលមិនប៉ុន្មានថ្ងៃប្រកាសទទួលខុសត្រូវដោយក្រុមជីហាដរដ្ឋអ៊ិស្លាមជាគោលដៅនៃការវាយលុកធំមួយរបស់កងទ័ពអីុរ៉ាក់ចាប់តាំងពីពាក់កណ្តាលខែតុលា ឆ្នាំ២០១៦មកដើម្បីកម្ចាត់ក្រុមភេរវកម្មនោះចេញពីទីក្រុងម៉ូសស៊ុល ជាទីតាំងធំចុងក្រោយរបស់គេនៅអីុរ៉ាក់ ។
អ្នកទទួលខុសត្រូវម្នាក់នៃក្រសួងមហាផ្ទៃអីុរ៉ាក់បញ្ជាក់ប្រាប់ AFP ថា ការផ្ទុះយ៉ាងខ្លាំងកើតមាននាវេលារសៀលក្នុងតំបន់លក់រថយន្តនៃសង្កាត់បាយ៉ាអា ភាគខាងត្បូងក្រុងបាដាដ។ នៅកន្លែងវាយប្រហារគេឃើញរថយន្តជាច្រើនសិបគ្រឿងត្រូវភ្លើងឆេះ ខណៈលើដីដាសដោយឈាម ។ ការផ្ទុះពិតជាខ្លាំងហើយតុល្យការជនរងគ្រោះអាចមានខ្ពស់ជាងនេះទៀត ។
ប្រភពព័ត៌មានមន្ទីរពេទ្យអះអាងពីមនុស្សស្លាប់៥២នាក់ និងរបួសជាង៥០នាក់ ។ កន្លែងវាយប្រហារស្ថិតលើទីលានធំទូលាយមួយប្រើជាទីផ្សារលក់រថយន្តជជុះ រួចទីនោះជាកន្លែងប្រមូលផ្តុំមនុស្សច្រើនរយនាក់រកស៊ីលក់រថយន្តហើយតថ្លៃគ្នាជាមួយបណ្តាអ្នកទិញ ។
ក្រុមរដ្ឋអ៊ិស្លាមប្រកាសទទួលខុសត្រូវចំពោះការវាយប្រហារនោះ ដោយអះអាងថាសំដៅលើការប្រមូលផ្តុំមនុស្សរបស់ពួកស៊ីអីុត ។ ការផ្ទុះកើតមានក្នុងសង្កាត់តែមួយដែលរងការវាយប្រហារកាលពីថ្ងៃទី១៤ កុម្ភៈ បណ្តាលឱ្យមនុស្សស្លាប់៤នាក់ ។ នាថ្ងៃទី១៥ កុម្ភៈ ក្រុមរដ្ឋអ៊ិស្លាមប្រកាសទទួលខុសត្រូវលើការវាយប្រហារអត្តឃាតមួយក្នុងសង្កាត់ស៊ីអីុត HABIBIYA ជិតសង្កាត់សាដ្រស៊ីធីភាគខាងជើងក្រុងបាដាដ បណ្តាលឱ្យមនុស្សស្លាប់១១នាក់ ៕
ចែករំលែកព័តមាននេះ