បើករំលោ.ភភ្លើងស្តុបយ៉ាងលឿន ជ្រុលបុកម៉ូតូរបួសធ្ងន់២នាក់
រាជធានីភ្នំពេញ ៖ រថយន្តដឹកមាន់១គ្រឿងអាងតែយប់ស្ងាត់បើកបរមិនគោរពច្បាប់ចរាចរណ៍ បើករំលោ.ភភ្លើងស្តុបទាំងមិនបន្ថយល្បឿន ជ្រុលទៅបុកម៉ូតូ១គ្រឿងពេញទំហឹង …
រាជធានីភ្នំពេញ ៖ រថយន្តដឹកមាន់១គ្រឿងអាងតែយប់ស្ងាត់បើកបរមិនគោរពច្បាប់ចរាចរណ៍ បើករំលោភភ្លើងស្តុបទាំងមិនបន្ថយល្បឿន ជ្រុលទៅបុកម៉ូតូ១គ្រឿងពេញទំហឹង បណ្ដាលឲ្យរងរបួសធ្ងន់២នាក់ កាលពីវេលាម៉ោង១១ និង១០នាទីយប់ថ្ងៃទី១៦ ខែកុម្ភៈ ឆ្នាំ២០១៧ ត្រង់ចំណុចស្តុបម៉ុងឫទ្ធី ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តក៉ូរេដឹកមាន់ ពណ៌ខៀវ ពាក់ស្លាកលេខ 2AH-3021 បើកដោយបុរសម្នាក់ និងកម្មកររួមដំណើរ៤នាក់ទៀត សរុប៥នាក់ បើកតាមផ្លូវម៉ុងឫទ្ធី ទិសដៅពីលិចទៅកើតក្នុងល្បឿនលឿន លុះមកដល់ចំណុចកើតហេតុ ដោយសារតែរថយន្តខាងលើមិនគោរពភ្លើងស្តុប ហើយបើករំលោភភ្លើងស្តុបក្នុងល្បឿនលឿនក៏បានជ្រុលទៅបុកម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ ភ្នំពេញ 1FG-7291 ជិះដោយបុរស២នាក់ តាមផ្លូវហាណូយ ក្នុងទិសដៅពីជើងទៅត្បូង ពេញទំហឹង បណ្ដាលឲ្យម៉ូតូអូសប្រហែល១០ម៉ែត្រទើបរថយន្តឈប់ស្ងៀមនៅមួយកន្លែង ចំណែកឯអ្នកម៉ូតូរងរបួសធ្ងន់ទាំង២នាក់ ។
ក្រោយពេលកើតហេតុ ជនរងគ្រោះទាំង២នាក់ត្រូវបានបញ្ជូនទៅកាន់គ្លីនិក រស្មី ចំណែកអ្នកបើកបររថយន្តត្រូវសមត្ថកិច្ចឃាត់ខ្លួននាំទៅអធិការដ្ឋាននគរបាលខណ្ឌសែនសុខ ដើម្បីរង់ចាំជំនាញចរាចរណ៍ក្រុងទៅធ្វើការវាស់វែង អូសរថយន្ត និងម៉ូតូ ទៅរក្សាទុកនៅស្នងការដ្ឋាននគរបាលរាជធានី ដើម្បីដោះស្រាយនៅពេលក្រោយ ៕
ចែករំលែកព័តមាននេះ