សហរដ្ឋអាមេរិក ៖ អាមេរិកជាប្រទេសដ៏ល្អមួយ ព្រោះតែការប្តេជ្ញារបស់ពួកគេក្នុងការ ទទួលយកជនអន្តោប្រវេសន៍ដែលមានទេពកោសល្យ។ ទាំងនេះគឺជាអ្វីដែលលោក Nandan Nilekani ដែលជាសហស្ថាបនិកនៃក្រុមហ៊ុន Infosys Technologies នឹងប្រាប់ដល់លោកប្រធានាធិបតី Trump ប្រសិនបើមានឱកាស ។
លោកបាននិយាយថា៖ «ប្រសិនបើអ្នកចង់រក្សាឲ្យសហរដ្ឋអាមេរិកមានភាពប្រកួតប្រជែង អ្នកត្រូវតែទទួលយកមនុស្សដែលមានទេពកោសល្យពីបរទេស »។
Infosysគឺជាក្រុមហ៊ុនផ្តល់សេវាកម្មផ្នែកធនធានមនុស្សធំជាងគេលេខ២របស់ប្រទេសឥណ្ឌា ដោយមានអតិថិជនធំរបស់ពួកគេគឺសហរដ្ឋអាមេរិក ។ ទិដ្ឋាការH-1Bរបស់អាមេរិកអនុញ្ញាតឲ្យសហគ្រាសបច្ចេកវិទ្យាជាច្រើនផ្តល់ការងារអាមេរិកដល់ជនជាតិឥណ្ឌា ។
ប៉ុន្តែរដ្ឋាភិបាលរបស់លោក Trump ពេលនេះកំពុងតែពិចារណាកែទម្រង់លើទិដ្ឋាការនេះ។ លេខាធិការផ្នែកសារព័ត៌មានរបស់អាមេរិក លោក Sean Spicer បាននិយាយក្នុងខែមករាថា លោកTrump នឹងបន្តចង់ធ្វើកំណែទម្រង់លើទិដ្ឋាការH-1Bនេះ និងទិដ្ឋាការដទៃទៀត ដើម្បីធ្វើកំណែទម្រង់លើការធ្វើអន្តោប្រវេសន៍ ប៉ុន្តែការធ្វើកំណែទម្រង់នោះ អាចនឹងប៉ះពាល់ដល់ពលករជនជាតិឥណ្ឌាខ្លាំងជាងគេ ។
ប្រទេសឥណ្ឌា ជាប្រភពធំជាងគេនៃពលករជំនាញខ្ពស់សម្រាប់វិស័យបច្ចេកវិទ្យារបស់អាមេរិក ។ យោងទៅតាមទិន្នន័យរបស់រដ្ឋាភិបាលអាមេរិកបានឲ្យដឹងថា ៧០%នៃទិដ្ឋាការH-1B គឺបានទៅលើជនជាតិឥណ្ឌា ។
លោកNilekaniបានបន្តថា ៖ « ក្រុមហ៊ុនឥណ្ឌាបានធ្វើអ្វីជាច្រើនដើម្បីជួយដល់ក្រុមហ៊ុនអាមេរិកឲ្យកាន់តែមានភាពប្រកួតប្រជែង ហើយខ្ញុំគិតថាវាគួរតែបន្តទៅទៀត » ។
លើសពីនេះទៀត ការចូលរូមរបស់ឥណ្ឌាក្នុងវិស័យនេះ ជាពិសេសក្នុងតំណែងខ្ពស់បានចូលក្នុងកម្រិតមួយយ៉ាងខ្លាំង។ នាយកប្រតិបត្តិរបស់ Google និង Microsoft ក្នុងពេលបច្ចុប្បន្ននេះគឺសុទ្ធតែបានចាប់កំណើតក្នុងប្រទេសឥណ្ឌាប៉ុន្តែលោកNilekani បានអះអាងថា ប្រទេសឥណ្ឌានៅតែអាចទទួលបានអត្ថប្រយោជន៍ពីការទប់ស្កាត់ក្រោមផែនការ «អាមេរិកទីមួយ» ឬ «America First» របស់លោកTrump នេះ ហើយប្រសិនបើវិស្វករដែលមានទេពកោសល្យរបស់ឥណ្ឌាមិនអាចទៅកាន់សហរដ្ឋអាមេរិកនោះ ពួកគេនឹងនៅក្នុងប្រទេសឥណ្ឌា ។
លោកបាននិយាយថា៖ «បញ្ហាទិដ្ឋាការនេះតែងតែកើតមានឡើងក្នុងសហរដ្ឋអាមេរិករាល់ប៉ុន្មានឆ្នាំម្តង ជាពិសេសក្នុងកំឡុងពេលបោះឆ្នោត ។ តាមពិតទៅបញ្ហានេះមានតែពន្លឿនការអភិវឌ្ឍក្នុងឥណ្ឌា ព្រោះមនុស្សជាច្រើនធ្វើការក្នុងប្រទេស »។
លោក Nilekani បានបន្តទៀតថា ប្រជាជនវ័យក្មេងដ៏ច្រើនរបស់ប្រទេសគឺកាន់តែចង់ធ្វើការក្នុងប្រទេសរបស់ខ្លួនថែមទៀតផង ។ លោកបាននិយាយថា៖«វាជាគោលនយោបាយឥណ្ឌាទីមួយ » ៕
ចែករំលែកព័តមាននេះ