រាជធានីភ្នំពេញ ៖ ក្រុមប្រតិភូវិនិយោគចិនចំនួន១៧រូបបានចូលជួបថ្នាក់ដឹកនាំក្រសួងទេសចរណ៍ កាលពីថ្ងៃទី១៥ កុម្ភៈ កន្លងមក ដើម្បីរាយការណ៍អំពីគម្រោងវិនិយោគដ៏ធំទាក់ទងនឹងវិស័យទេសចរណ៍នៅកម្ពុជា ។ នេះបើយោងតាមមន្ត្រីជាន់ខ្ពស់ក្រសួងទេសចរណ៍ ។
នៅក្នុងជំនួបនោះ គណៈប្រតិភូចិនបានស្នើសុំក្រសួងទេសចរណ៍ចំនួន៣ចំណុច រួមមាន ៖
១-សូមការគាំទ្រចំពោះគម្រោងវិនិយោគទេសចរណ៍នៅកម្ពុជា ។
២-សូមអញ្ជើញលោករដ្ឋមន្ត្រី និងប្រតិភូទៅចូលរួមសន្និសីទទេសចរណ៍ពិភពលោក នៅទីក្រុងប៉េកាំង ប្រទេសចិន នៅថ្ងៃទី៣០ ឧសភា ឆ្នាំ២០១៧ ខាងមុខ ។
៣-សូមអញ្ជើញលោករដ្ឋមន្ត្រីធ្វើជាប្រធានកិត្តិយសនៃសហព័ន្ធអន្តរជាតិអភិបាលក្រុង ។
ជាការឆ្លើយតប លោក ថោង ខុន រដ្ឋមន្ត្រីក្រសួងទេសចរណ៍ បានសម្ដែងនូវសេចក្តីរីករាយ និងសូមគាំទ្រចំពោះគម្រោងវិនិយោគដ៏ធំរបស់ចិន ។ ទោះបីយ៉ាងណា លោកក៏បានអំពាវនាវដល់ក្រុមវិនិយោគចិន ធ្វើការឲ្យបានជិតស្និទ្ធជាមួយក្រសួង ស្ថាប័ន និងអាជ្ញាធរពាក់ព័ន្ធ ដើម្បីជំរុញ និងអនុវត្តគម្រោងវិនិយោគវិស័យទេសចរណ៍នៅកម្ពុជាឲ្យទទួលបានជោគជ័យ ។
លោករដ្ឋមន្ត្រីថ្លែងថា ៖ « រាល់គម្រោងវិនិយោគគឺត្រូវធានា និងគោរពឲ្យបាននូវគោលការណ៍បរិស្ថាន ភាពស្អាត និងបៃតង ដើម្បីធ្វើឲ្យកម្ពុជាក្លាយជាគោលដៅទេសចរណ៍លំដាប់ពិភពលោក ប្រកបដោយភាពទាក់ទាញ ភាពស្អាត និងបៃតង »។
ទន្ទឹមនឹងនោះ លោករដ្ឋមន្ត្រីក៏បានជម្រាបជូនគណៈប្រតិភូថា ក្នុងឆ្នាំ២០១៦កន្លងទៅ កម្ពុជាទទួលបានទេសចរអន្តរជាតិចំនួន៥លាននាក់ កើនឡើង៥ភាគរយ ធៀបនឹងឆ្នាំ២០១៥ ក្នុងនោះទទួលបានទេសចរចិនចំនួន៨៣ម៉ឺននាក់ ស្ថិតក្នុងលំដាប់ទី២នៃទីផ្សារទេសចរសំខាន់ៗ ទាំង១០ ។ តាមការព្យាករ ឆ្នាំ២០២០កម្ពុជានឹងអាចទទួលបានទេសចរអន្តរជាតិយ៉ាងតិច ៧លាននាក់ និងទាក់ទាញទេសចរចិនឲ្យបានយ៉ាងតិច២លាននាក់ ។
លោករដ្ឋមន្ត្រីបន្តថា ដើម្បីសម្រេចតាមផែនការនេះ ក្រសួងទេសចរណ៍បានរៀបចំផែនការយុទ្ធសាស្ត្រអភិវឌ្ឍន៍ទេសចរណ៍ ២០១២-២០២០ និងបានដាក់ចេញនូវផែនការយុទ្ធសាស្ត្រទីផ្សារទេសចរណ៍កម្ពុជា ។ ចំពោះទីផ្សារទេសចរចិន ក្រសួងក៏បានត្រៀមលក្ខណៈរួចជាស្រេច ក្នុងការទទួលទេសចរចិន និងអ្នកវិនិយោគចិន ដោយបានដាក់ចេញនូវផែនការយុទ្ធសាស្ត្រទាក់ទាញទេសចរចិន និងសៀវភៅសស្តីពី «China Ready» ។
លោករដ្ឋមន្ត្រីបន្ថែមថា ដើម្បីទាក់ទាញទេសចរអន្តរជាតិ ឲ្យមកទស្សនាកម្ពុជាឲ្យបានកាន់តែច្រើន ទាមទារឲ្យមានការបង្កើតនិងអភិវឌ្ឍន៍ផលិតផលទេសចរណ៍ថ្មីៗជាច្រើនទៀត ហើយការងារនេះចាំបាច់ត្រូវមានការវិនិយោគពីបរទេស ពិសេសពីប្រទេសចិន លើវិស័យទេសចរណ៍ ដូចជា មណ្ឌលកម្សាន្តទេសចរណ៍ រមណីយដ្ឋានទេសចរណ៍ សណ្ឋាគារ រីហ្សត ភោជនីយដ្ឋាន កន្លែងទិញទំនិញ (Shopping) មធ្យោបាយដឹកជញ្ជូនទេសចរណ៍ អាកាសយានដ្ឋានអន្តជាតិ កំពង់ផែ និងហេដ្ឋារចនាសម្ព័ន្ធទេសចរណ៍ជាច្រើនទៀត ធ្វើយ៉ាងណាទាក់ទាញទេសចរឲ្យស្នាក់នៅបានយូរ ចាយច្រើន និងមកទស្សនាច្រើនដង ។ ទេសចរអន្តរជាតិដែលមកកម្ពុជា គេចង់ចាយវាយច្រើន តែកន្លែងខ្លះ គឺយើងនៅពុំទាន់មានលទ្ធភាពទាក់ទាញទេសចរឲ្យចាយច្រើននៅឡើយ ។
ក្នុងនោះដែរ ក្រសួងទេសចរណ៍ក៏បានបង្ហាញជូនគណៈប្រតិភូចិនអំពីគម្រោងអភិវឌ្ឍន៍ទេសចរណ៍នៅខេត្តកំពតផងដែរ ៕
ចែករំលែកព័តមាននេះ