ខេត្តបាត់ដំបង ៖ ខ្សែភាពយន្តខ្នាតធំលំដាប់អន្តរជាតិរឿង«មុនដំបូងខ្មែរក្រហមសម្លាបប៉ាខ្ញុំ»ដែលដឹកនាំថតដោយតារាសម្ដែងដ៏ល្បីរបស់ក្រុមហ៊ុនភាពយន្តហូលីវូដ លោកស្រីអេនចេលីណា ជោលី
ខេត្តបាត់ដំបង ៖ ខ្សែភាពយន្តខ្នាតធំលំដាប់អន្តរជាតិរឿង«មុនដំបូងខ្មែរក្រហមសម្លាបប៉ាខ្ញុំ»ដែលដឹកនាំថតដោយតារាសម្ដែងដ៏ល្បីរបស់ក្រុមហ៊ុនភាពយន្តហូលីវូដ លោកស្រីអេនចេលីណា ជោលី សហការជាមួយផលិតកម្ម«បូផាណា»នឹងចាក់បញ្ចាំងជាលើកដំបូងជាសាធារណៈនៅខេត្តបាត់ដំបង នាព្រលប់ថ្ងៃទី២៣ កុម្ភ: ២០១៧ ។ នេះបើយោងតាមសេចក្ដីជូនដំណឹងរបស់អាជ្ញាធរខេត្តបាត់ដំបង ។
នៅក្នុងលិខិតជូនដំណឹងចុះថ្ងៃទី១៥ កុម្ភៈ២០១៧ អភិបាលខេត្តបាត់ដំបងលោកច័ន្ទ សុផល ឱ្យដឹងថា ដើម្បីឆ្លើយតបទៅនឹងទឹកចិត្តចូលរួម និងការគាំទ្ររបស់ប្រជាពលរដ្ឋ និងអាជីវករនៅក្នុងខេត្តបាត់ដំបង លោកស្រីអេនចេលីណា ជោលី ដែលជាផលិតករ និងលោកប៉ាន់ រទ្ធី នឹងនាំយកខ្សែភាពយន្តខ្នាតធំរឿង«មុនដំបូងខ្មែរក្រហមសម្លាបប៉ាខ្ញុំ»ជាខ្សែភាពយន្តប្រវត្តិសាស្ត្រដែលថតលើទឹកដីខេត្តបាត់ដំបង ក្នុងអំឡុងឆ្នាំ២០១៦កន្លងទៅ ចាក់បញ្ចាំងជាសាធារណនៅបរិវេណសួនច្បារនាគបាញ់ទឹក ស្ថិតចំកណ្ដាលក្រុងបាត់ដំបង ដើម្បីចែកជូនពលរដ្ឋខេត្តបាត់ដំបង ចូលរួមទស្សនាដំបូងគេ នៅវេលាម៉ោង៦និង៣០នាទីល្ងាចថ្ងៃទី២៣ កុម្ភៈ ។
ភាពយន្តរឿង«មុនដំបូងខ្មែរក្រហមសម្លាប់ប៉ាខ្ញុំ»គឺជាខ្សែភាពយន្តខ្នាតធំលំដាប់អន្តរជាតិ ដែលសាច់រឿងស្ទើរទាំងស្រុង បានបង្ហាញពីសង្គ្រាមនៅក្នុងអំឡុងសម័យសាធារណរដ្ឋខ្មែរ(របបលន់ នល់) និងរបបកម្ពុជាប្រជាធិបតេយ្យ(របបខ្មែរក្រហម) ។ ខ្សែភាពយន្តនេះដឹកនាំថតដោយតារាសម្ដែង និងជាផលិតករដ៏ល្បីរបស់ក្រុមហ៊ុនភាពយន្តហូលីវូដ លោកសអេនចេលីណា ជោលី សហការជាមួយលោកប៉ាន់ រិទ្ធី នាយកផលិតកម្ម«បូផាណា»ដែលបានថតនៅក្នុងឆ្នាំ២០១៦កន្លងទៅនៅលើទឹកដីខេត្តបាត់ដំបង ។
លោកច័ន្ទ សុផល អភិបាលខេត្តបាត់ដំបង នៅក្នុងលិខិតជូនដំណឹងឱ្យដឹងថា ខ្សែភាពយន្តប្រវត្តិសាស្ត្ររឿង«មុនដំបូងខ្មែរក្រហមសម្លាប់ប៉ាខ្ញុំ»នេះ គឺមានការចូលរួមសហការយ៉ាងផុសផុលពីប្រជាពលរដ្ឋ និងក្រុមអាជីវករ រួមទាំងមន្ត្រីនានា នៅក្នុងក្រុងបាត់ដំបងផង ទាំងការចូលរួមសម្ដែង ទាំងការចូលរួមលើកទឹកចិត្ត និងការផ្ដល់ទីតាំងសម្រាប់ថត ទើបធ្វើឱ្យខ្សែភាពយន្តលំដាប់អន្តរជាតិមួយនេះដំណើរការថតបានបញ្ចប់ដោយជោគជ័យ ។
ជាមួយនឹងការចាក់បញ្ចាំងខ្សែភាពយន្តប្រវត្តិសាស្ត្រជាលើកដំបូងនៅក្នុងខេត្តបាត់ដំបងនេះ តាមរយៈលិខិតជូនដំណឹងរបស់រដ្ឋបាលខេត្តបាលដំបង ដោយយោងតាមសំណូមពរពីភាគីក្រុមហ៊ុនផលិតខ្សែភាពយន្តគឺលោកស្រីអេនចេលីណា ជោលីដែលជាផលិតករ និងលោកប៉ាន់ រិទ្ធី នាយកផលិតកម្ម«បូផាណា» ។ ដោយសារតែខ្សែភាពយន្តរឿង«មុនដំបូងខ្មែរក្រហមសម្លាបប៉ាខ្ញុំ»នេះ មិនទាន់បានចាក់បញ្ចាំងនៅតាមរោងភាពយន្តនានានៅសហរដ្ឋអាមេរិក នៅសហភាពអឺរ៉ុប និងនៅប្រទេសនានានៅលើពិភពលោកនៅឡើយ ទើបភាគីក្រុមហ៊ុនបានសុំរក្សាសិទ្ធិ មិនអនុញាតឱ្យអ្នកចូលរួមទស្សនាប្រើឧបករណ៍ថតរូបគ្រប់ប្រភេទ រួមទាំងទូរស័ព្ទដៃផងថតចម្លងពេលកំពុងចាក់បញ្ចាំងឡើយ ។ ក្នុងករណីរកឃើញថា បុគ្គលណាដែលបានលួចថតចម្លងខ្សែភាពយន្តពេលកំពុងចាក់បញ្ចាំង ក្រុមការងាររបស់ក្រុមហ៊ុនសុំសិទ្ធិដកហូតយកឧបករណ៍ទាំងនោះដោយមិនប្រគល់ជូនម្ចាស់ដើមវិញឡើយ ។
លិខិតជូនដំណឹងរបស់រដ្ឋបាលខេត្តបាត់ដំបងនោះ សង្ឃឹមថាប្រជាពលរដ្ឋ និងអាជីវករទាំងអស់នឹងចូលរួមទស្សនាឱ្យបានច្រើនកុះករ និងគោរពសេចក្ដីណែនាំជាក់ជាមិនខាន ៕
ចែករំលែកព័តមាននេះ