រឿងដដែល…ដឹកឈើកណ្តាលអធ្រាត្របំបាក់ស្ពានដែកទៀតហើយ
ខេត្តកំពត ៖ តាមសេចក្តីរាយការណ៍ពីនគរបាលប៉ុស្តិ៍រដ្ឋបាលឃុំតាកែន ស្រុកឈូកបានឲ្យដឹងថា កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី
ខេត្តកំពត ៖ តាមសេចក្តីរាយការណ៍ពីនគរបាលប៉ុស្តិ៍រដ្ឋបាលឃុំតាកែន ស្រុកឈូកបានឲ្យដឹងថា កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី
ខេត្តកំពត ៖ តាមសេចក្តីរាយការណ៍ពីនគរបាលប៉ុស្តិ៍រដ្ឋបាលឃុំតាកែន ស្រុកឈូកបានឲ្យដឹងថា កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១៥ ខែកុម្ភៈ រថយន្តយីឌុបមួយគ្រឿងម៉ាកហ៊ីយ៉ាន់ដាយ ពណ៌ស ចំណុះ៨តោន ពាក់ផ្លាកលេខ ភ្នំពេញ ៣B-៥៧៤៥ ដែលដឹកឈើពេញទ្រុងឆ្លងកាត់ស្ពានដែកស្ទឹងកោះស្លា ស្ថិតក្នុងភូមិស្រកានាគ ឃុំតាកែន ស្រុកឈូក បានបណ្តាលឲ្យបាក់ស្ពានទៅមុខលែងរួចនៅជាប់គាំងលើស្ពាន និងបណ្តាលឲ្យកកស្ទះដល់ចរាចរណ៍លើផ្លូវលំក្រួសក្រហមមួយខ្សែនេះ ។
ប្រភពដដែលឲ្យដឹងទៀតថា មកដល់វេលាម៉ោង៩ព្រឹកថ្ងៃទី១៥ ខែកុម្ភៈ កម្លាំងសមត្ថកិច្ចខាងរដ្ឋបាលព្រៃឈើកំពត កំពុងរើឈើដែលនៅលើរថយន្តដើម្បីស្ទូចយករថយន្តចេញពីលើស្ពាន នាំយកមកកាន់រដ្ឋបាលព្រៃឈើកំពត ។ ឈើដែលផ្ទុកលើរថយន្តនេះ បើតាមមន្ត្រីរដ្ឋបាលព្រៃឈើថា មានជាច្រើនម៉ែត្រគូប ។
ប្រភពព័ត៌មានពីប្រជាពលរដ្ឋនៅតំបន់ខាងលើ បានខ្សឹបប្រាប់កោះសន្តិភាពដោយមិនឲ្យបញ្ចេញឈ្មោះថា មុនពេលកើតហេតុឃើញរថយន្តធំៗ ដឹកឈើចេញទៅមុនរួចអស់ពីរគ្រឿងហើយ និងបានឆ្លងផុតពីស្ពានដែកនេះដោយសុវត្ថិភាព ។ បន្ទាប់មក ទើបរថយន្តមួយគ្រឿងនេះបើកមកតាមក្រោយ ដោយមានមន្ត្រីរដ្ឋបាលព្រៃឈើម្នាក់នាំផ្លូវផងដែរ ។ លុះមកដល់លើស្ពានដែកបេឡេតន៍នេះក៏ស្រុតស្ពាន បណ្តាលឲ្យរថយន្តចំតិតគូទជាប់លើស្ពានទៅមុខលែងរួច ។ ភ្លាមៗមន្ត្រីរដ្ឋបាលព្រៃឈើដែលនាំផ្លូវប្រកូកប្រកាសថា ចាប់រថយន្តដឹកឈើខុសច្បាប់បានមួយគ្រឿង ដែលដឹកឲ្យបាក់ស្ពានដែកនៅចំណុចខាងលើ ។
ពាក់ព័ន្ធនឹងករណីនេះ កោះសន្តិភាពបានភ្ជាប់ទូរស័ព្ទទៅលោក ជួន សារ៉ា នាយរងខណ្ឌរដ្ឋបាលព្រៃឈើកំពត ដើម្បីសុំឲ្យបំភ្លឺករណីដែលបានកើតឡើង តែលោកនាយរងខណ្ឌប្រាប់ថា លោកជាប់ប្រជុំមិនអាចបំភ្លឺបានទេ សុំឲ្យទាក់ទងទៅលោក កង គឹមលី នាយខណ្ឌវិញ តែទូរស័ព្ទលោកនាយខណ្ឌរូបនេះ ហៅចូលជាច្រើនដងគ្មានអ្នកទទួល ។
គួររំឭកថា កន្លងមកដោយសារតែរថយន្តឈ្មួញរកស៊ីដឹកឈើខុសច្បាប់នៅលើផ្លូវលំមួយខ្សែនេះ ក៏ធ្លាប់បាក់ស្ពានដែកអស់មួយមកហើយហើយនេះគឺជាលើកទី២ហើយដែលស្ពានបាក់ដោយសារឈ្មួញរកស៊ីឈើខុសច្បាប់ ផ្ទុកឈើលើសចំណុះ ។ លើកនេះទៀត ប្រជាពលរដ្ឋចាំមើលថា តើសមត្ថកិច្ចជំនាញមានវិធានការយ៉ាងណាចំពោះជនល្មើស ដែលធ្វើឲ្យខូចខាតស្ពានដោយសារតែការរកស៊ីខុសច្បាប់នេះ ។
តាមប្រភពព័ត៌មានពីប្រជាពលរដ្ឋដែលសុំមិនបញ្ចេញឈ្មោះបានឱ្យដឹងថា ក្បួនរថយន្តដឹកឈើបំផ្លាញស្ពាននេះក៏មានកម្លាំងកងរាជអាវុធហត្ថស្នាក់ការសន្តិសុខនៅចំណុចខាងលើ នាំផ្លូវរថយន្តនេះដែរ ។ ក្រោយពីមានករណីបាក់ស្ពានលើកទី១ គេឃើញការដឹកឈើដោយរថយន្តធំៗបានផ្អាកសកម្មភាពដឹកឆ្លងកាត់តំបន់នេះតែ១៥ថ្ងៃគត់ ។
បន្ទាប់មកនៅតែមានសកម្មភាពដឹកឈើតាមផ្លូវនេះដដែល ដោយសារមានការបើកភ្លើងខៀវពីកម្លាំងស្នាក់ការសន្តិសុខកងរាជអាវុធហត្ថនៅទីនោះ ។
ប្រភពពីមន្ត្រីខណ្ឌរដ្ឋបាលព្រៃឈើកំពត បានឱ្យដឹងថា តាមការបញ្ជាពីលោក កង គឹមលី នាយខណ្ឌ ដែលទទួលសេចក្តីរាយការណ៍ពីកម្លាំងរដ្ឋបាលព្រៃឈើកំពង់ស្ពឺមកថា នៅយប់ថ្ងៃទី១៤ ខែកុម្ភៈ អាចមានរថយន្តដឹកឈើល្មើសច្បាប់ចេញពីខេត្តកំពង់ស្ពឺមកកាន់ខេត្តកំពតឆ្ពោះទៅច្រកតន់ហន់ ដើម្បីលក់ឱ្យឈ្មួញវៀតណាម កម្លាំងរដ្ឋបាលព្រៃឈើកំពត ក៏បានចាំឃ្លាំមើលនៅជិតវត្តអង្គចក ស្រុកជុំគិរី ដើម្បីបង្ក្រាប ។ ប៉ុន្តែទំនងជាបែកការណ៍ ក្រុមឈ្មួញបានគេចពីកន្លែងលាក់ខ្លួនរបស់មេព្រៃកំពត ដោយឱ្យរថយន្តដឹកឈើនោះបើកគេចពីកន្លែងស្ទាក់ចាប់របស់ខណ្ឌរដ្ឋបាលព្រៃឈើកំពត ដោយបើកសំដៅទៅត្បូង រួចឆ្លងស្ពានដែកមួយនៅជិតសាលាឃុំតាកែន បណ្តាលឱ្យបាក់ទៅមុខមិនរួច ។
ក្រោយពីបាក់ស្ពាន ក្រុមឈ្មួញមិនបាននៅទទួលខុសត្រូវទេ គឺនាំគ្នារត់គេចខ្លួនបាត់អស់ បន្សល់ទុកតែវត្ថុតាងនៅលើស្ពានដែលបាក់ ។
តាមការប៉ាន់ប្រមាណ ឈើនៅលើរថយន្តមានចំនួនប្រមាណ១៣ម៉ែត្រគូប ជាប្រភេទម្រេញ ។
បើតាមមន្ត្រីអាវុធហត្ថមួយរូបនិយាយក្នុងលក្ខខណ្ឌមិនបញ្ចេញឈ្មោះបានឱ្យដឹងថា តាមពិតឈើទាំងនេះក្រុមឈ្មួញមុនពេលដឹកចេញពីខេត្តកំពង់ស្ពឺ គឺសុទ្ធតែបានទាក់ទងជាមួយមន្ត្រីពាក់ព័ន្ធរួចអស់ហើយ ក្នុងនោះមានទាំងមេព្រៃខេត្តកំពតផងដែរ ។ បើគ្មានការបើកដៃពីសំណាក់មេព្រៃទេ ក្រុមឈ្មួញក៏មិនហ៊ានធ្វើសកម្មភាពដែរ ។
នេះចាត់ទុកថាជារឿងស៊យរបស់ឈ្មួញព្រោះតែដឹកបាក់ស្ពាន បើមិនបាក់ស្ពានទេ ម្ល៉េះសមឈើទាំងអស់នេះនឹងទៅដល់ច្រកតន់ហន់តាំងពីយប់ ហើយឆ្លងចូលទៅវៀតណាមបាត់ទៅហើយ ។
បើតាមមន្ត្រីដែលមិនសូវបានសើមមាត់សើមកនឹងគេបានបង្ហើបថា តាមពិតក្រុមរដ្ឋបាលព្រៃឈើកំពត មិនបានឃ្លាំមើលចាំបង្ក្រាបឡើយ គឺនាំគ្នាចាំមើលផ្លូវឱ្យឈ្មួញទៅវិញទេ ហើយនៅពេលដែលមានហេតុការណ៍បាក់ស្ពានកើតឡើង ក៏តាំងនាំគ្នាចេញមុខធ្វើជាមកបង្ក្រាប ហើយធ្វើរបាយការណ៍ដាក់ជូនថ្នាក់លើថា ចាំបង្ក្រាបទៅវិញ ការធ្វើបែបនេះគឺដើម្បីដោះបន្ទុកខ្លួនតែប៉ុណ្ពោះ ។
មិនមានអ្នកណាម្នាក់ហ៊ានអះអាងឱ្យប្រាកដថា រថយន្តនិងឈើទាំងនេះជារបស់ឈ្មួញម្នាក់ណាឡើយ តែបើចង់ដឹងថាម្ចាស់រថយន្តនេះជាអ្នកណា សួរតែលោកនាយខណ្ឌរដ្ឋបាលព្រៃឈើកំពតទៅប្រាកដជាដឹងហើយ បើលោកមិនអនុញ្ញាតក្រុមឈ្មួញក៏មិនហ៊ានចេញឈើរហូតធ្វើឱ្យបាក់ស្ពានដែរ ។
ទោះជាយ៉ាងណាក្តី នេះគ្រាន់តែជាព័ត៌មានក្រៅផ្លូវការប៉ុណ្ណោះមិនអាចយកជាការបានឡើយ ឯរឿងរ៉ាវពិតយ៉ាងណានោះ អាស្រ័យលើសមត្ថកិច្ចមេព្រៃ និងសមត្ថកិច្ចពាក់ព័ន្ធធ្វើការស្រាវជ្រាវបន្តទៀត ។ បើថ្នាក់លើចង់ដឹងប្រាកដថា រឿងរ៉ាវយ៉ាងណានោះ ទាល់តែបង្កើតក្រុមស្រាវជ្រាវចុះមកអង្កេតទើបដឹងច្បាស់ បើមើលនិងស្តាប់តាមសេចក្តីរាយការណ៍ គឺមើលទៅថ្នាក់ក្រោមដូចជាប្រឹងប្រែងខ្លាំងណាស់ ៕
ចែករំលែកព័តមាននេះ