ប្រទេសរុស្ស៊ី ៖ លោកប្រធានាធិបតីរុស្ស៊ី Vladimir Putin បានជួបជាមួយលោក Matthias Mueller នាយកប្រតិបត្តិក្រុមហ៊ុន Volkswagen ក្នុងទីក្រុងមូស្គូ កាលពីថ្ងៃពុធ និងនិយាយថា លោកបានត្រៀមខ្លួនជាស្រេចក្នុងការជួយដល់ក្រុមហ៊ុនរថយន្តអាល្លឺម៉ង់នេះ ដើម្បីអភិវឌ្ឍន៍អាជីវកម្មនៅរុស្ស៊ី ខណៈការលក់ និងតម្រូវការកំពុងធ្លាក់ចុះ ។
លោក Putin ឲ្យដឹងថា លោកយល់ពីឧបសគ្គដែលក្រុមហ៊ុននេះកំពុងជួបប្រទះក្នុងប្រទេសរុស្ស៊ី គឺទីផ្សារយានយន្តធ្លាក់ចុះ ព្រោះតែភាពអន់ថយនៃសេដ្ឋកិច្ច ។ លោកថ្លែងថា ៖ « ពួកយើងពិតជាសប្បាយរីករាយណាស់ដែលអាជីវកម្មរបស់អ្នកកំពុងតែល្អប្រសើរ ប៉ុន្តែនៅមានឧសគ្គមួយចំនួនទៀត ។ ពួកយើងបានត្រៀមខ្លួនរួចជាស្រេចក្នុងការចរចាពីសំណួរណាមួយរបស់អ្នក ដើម្បីជួយដល់អ្នកអាចអភិវឌ្ឍន៍បន្ថែមក្នុងប្រទេសរុស្ស៊ី » ។
VW Group ផលិតរថយន្តយីហោ Volkswagen, Audi, Seat និង Skoda គឺជាក្រុមហ៊ុនផលិតរថយន្តបរទេសធំជាងគេរបស់រុស្ស៊ី បើគិតពីការលក់ និងប្រាក់ចំណូល ប៉ុន្តែចំនួនលក់របស់ក្រុមហ៊ុននេះបានធ្លាក់ចុះ៥%ក្នុងប្រទេសរុស្ស៊ីកាលពីឆ្នាំមុន ។ នេះបើតាមសមាគមអាជីវកម្មអឺរ៉ុប (AEB) ។
ក្រុមហ៊ុនផលិតរថយន្តបរទេសមួយចំនួនដូចជា General Motors បានបោះបង់ចោលប្រទេសរុស្ស៊ី ប៉ុន្តែ Volkswagen នៅតែរក្សាការវិនិយោគ និងនិយាយថា ការលក់នឹងប្រសើរឡើងវិញនៅថ្ងៃណាមួយដូចឆ្នាំ២០១២ ដែលបានលក់រថយន្ត៣លានគ្រឿងក្នុង១ឆ្នាំ (បច្ចុប្បន្ន បានតែ១,៤លានគ្រឿង) ។
ក្រុមហ៊ុននេះផលិតរថយន្តក្នុងរោងចក្រមួយនៅ Kaluga មានចម្ងាយ១៧០គីឡូម៉ែត្រទៅទិសនីរតីពីទីក្រុងមូស្គូ និងបានចាប់ផ្តើមផលិតកម្មក្នុងរោងចក្រថ្មីមួយនៅឆ្នាំ២០១៥ ។ ក្រុមហ៊ុនក៏មានរោងចក្រ២ផ្សេងទៀតផងដែរ ។
តាមប្រភពមួយនិយាយថា ការជួបគ្នារវាងលោក Mueller និងលោក Putin គឺទាក់ទិននឹងអត្ថប្រយោជន៍ផ្តាច់មុខសម្រាប់ក្រុមហ៊ុនខាងលើ ។
Volkswagen បាននិយាយក្នុងសេចក្តីថ្លែងការណ៍មួយថា ពួកគេប្តេជ្ញាចិត្តចំពោះទីផ្សាររុស្ស៊ី ដែលបានផ្តល់ការងារផ្ទាល់ចំនួន៦.៨០០ និងមិនផ្ទាល់៥ម៉ឺន ហើយក្រុមហ៊ុនក៏មានគម្រោងអភិវឌ្ឍន៍បន្តក្នុងប្រទេសនេះទៀតផង ។ Volkswagen ឲ្យដឹងថា ៖ « ពួកយើងគិតដល់អនាគត និងចង់ស្វែងរកវិធីអនុម័តយុទ្ធសាស្ត្រពិភពលោក ក្នុងទីផ្សាររុស្ស៊ី » ។
លោក Putin បានប្រាប់ដល់អ្នកកាសែតថា អត្ថប្រយោជន៍ផ្នែកពន្ធបានជួយដល់ការលក់របស់ក្រុមហ៊ុន Volkswagen ។
AEB មើលឃើញថា ការលក់រថយន្តនៅរុស្ស៊ី នឹងកើនឡើង៤%ក្នុងឆ្នាំនេះ បន្ទាប់ពីបានធ្លាក់ចុះជាប់ៗគ្នាអស់៤ឆ្នាំ ។ AEB និយាយកាលពីថ្ងៃពុធថា ការលក់បានធ្លាក់ចុះ៥%ក្នុងខែមករា។ ទោះជាយ៉ាងណា ការលក់របស់ VW Group បានកើនឡើង២%ក្នុងខែមករា ៕
ចែករំលែកព័តមាននេះ