រាជធានីភ្នំពេញ ៖ ថ្វីដ្បិតតែប្រទេសកម្ពុជាស្ថិតនៅចំណុចកណ្ដាលនៃអាស៊ាន និងត្រូវបានរំពឹងថា អាចនឹងទាក់ទាញវិនិយោគិន មកបណ្ដាក់ទុនច្រើន នៅពេលអាស៊ានចាប់ផ្ដើមដំណើរការ តែយ៉ាងណាអ្នកវិនិយោគមកបណ្ដាក់ទុននៅតែមានកម្រិតនៅឡើយ ដែលតម្រូវឱ្យស្ថាប័នពាក់ព័ន្ធមួយចំនួន ផ្សព្វផ្សាយ និងរៀបចំវេទិកាធុរកិច្ចជាបន្តបន្ទាប់ ដើម្បីទាក់ទាញវិនិយោគិនធំៗមកបណ្ដាក់ទុនបន្ថែមទៀត ស្របពេលមានអ្នកវិនិយោគមួយចំនួនហើយបានចាប់អារម្មណ៍ និងចាប់ផ្ដើមឈានជើងចូលទីផ្សារប្រទេសកម្ពុជា ក្នុងនោះ ចិន និងជប៉ុន ក៏មានកំណើនច្រើនគួរឲ្យកត់សម្គាល់ផងដែរក្នុងរយៈពេលចុងក្រោយនេះ ។ តើកម្ពុជាគួរតែត្រៀមអ្វីខ្លះ និងត្រូវធ្វើអ្វីបន្ថែមទៀត ដើម្បីធានាដល់ការវិនិយោគនៅក្នុងប្រទេសកម្ពុជា ពីសំណាក់វិនិយោគិនបរទេស ?
លោក Brettong G. Sciaroni ប្រធានសភាពាណិជ្ជកម្មអន្តរជាតិនៃកម្ពុជា (IBC ) ដែលជាអ្នករៀបចំកិច្ចប្រជុំកំពូលពាណិជ្ជកម្មអន្តរជាតិកម្ពុជា ឆ្នាំ២០១៧ រយៈពេល២ថ្ងៃ នៅសណ្ឋាគារអាំងទែរកុងទីណង់តាល់ ពីថ្ងៃទី១៥ និង១៦ កុម្ភៈ បានឱ្យដឹងថា ឆ្លងកាត់តាមបទពិសោធន៍អស់រយៈពេលជាង២០ឆ្នាំ នៅកម្ពុជា ឃើញថា កម្ពុជាបានព្យាយាមធ្វើបច្ចុប្បន្នភាពនូវច្បាប់ ក៏ដូចជាបទប្បញ្ញត្តិផ្សេងៗរបស់ខ្លួន ធ្វើយ៉ាងណាដើម្បីទាក់ទាញវិនិយោគទុន មកបណ្ដាក់ទុន ។ មួយវិញទៀត កម្ពុជា ក៏បានព្យាយាមប្រយុទ្ធប្រឆាំង និងលុបបំបាត់អំពើពុករលួយនៅក្នុងប្រទេសផងដែរ ។
ទោះបីយ៉ាងណាក៏ដោយ Brettong G. Sciaroni បញ្ជាក់ថា កម្ពុជាក៏នៅមានកត្តាមួយចំនួនដែលធ្វើឱ្យវិនិយោគិនក្រៅប្រទេសនៅមានភាពស្ទាក់ស្ទើរក្នុងការសម្រេចចិត្តដាក់ទុនវិនិយោគ ដូចជា ការរៀបចំឯកសារមួយចំនួនដើម្បីវិនិយោគមានភាពស្មុគ្រស្មាញ ថ្លៃចំណាយក្នុងដំណើរការធ្វើអាជីវកម្ម និងថ្លៃអគ្គិសនីជាដើមគឺនៅមានកម្រិតខ្ពស់។ លោកនិយាយថា៖ « ទាក់ទិននឹងកត្តានេះយើងនឹងព្យាយាមធ្វើយ៉ាងណាដើម្បីឱ្យថ្លៃចំណាយទាំងនោះធ្លាក់មកនៅទាប ដើម្បីទាក់ទាញបន្ថែមទៀតនូវវិនិយោគិនមកបណ្ដាក់ទុនវិនិយោគនៅក្នុងប្រទេសកម្ពុជា ជាពិសេសនោះ ក្នុងវិស័យកសិកម្មដែលមានសក្ដានុពលខ្ពស់ » ។
លោកបន្ថែមថា កត្តាដែលសំខាន់មួយ ក្នុងការទាក់ទាញវិនិយោគទុនក្រៅប្រទេសប្រទេសមកបណ្ដាក់ទុនវិនិយោគនៅកម្ពុជា នោះគឺការលុបបំបាត់អំពើពុករលួយ ដូចជាការលុបបំបាត់ការិយាធិបតេយ្យនៅតាមស្ថាប័នក្រសួងមួយចំនួន ព្រោះថា ការិយាធិបតេយ្យនេះហើយដែលធ្វើឱ្យមានការយឺតយ៉ាវក្នុងការស្នើសុំបើកអាជីវកម្មអ្វីមួយនៅក្នុងប្រទេស។ លោកនិយាយថា៖ « ក្នុងនាមយើងជាអ្នកសម្របសម្រួលវិនិយោគិន យើងនឹងព្យាយាមធ្វើយ៉ាងណាឱ្យវិនិយោគិនដែលមានបំណងមកវិនិយោគនៅក្នុងប្រទេសកម្ពុជា មានភាពងាយស្រួលជាងមុន ដូចជាការសម្របសម្រួលការបង់ពន្ធ និងការស្នើសុំបើកក្រុមហ៊ុនថ្មីៗនៅកម្ពុជា ជាដើម» ។
លោកបញ្ជាក់ថា កំណើនសេដ្ឋកិច្ចដែលប្រទេសកម្ពុជាសម្រេចបានក្នុងរយៈពេលជាងមួយទស្សវត្សរ៍កន្លងកមកនេះ គឺផ្អែកលើមូលដ្ឋាននៃកំណែទម្រង់ច្បាប់ និងលិខិតបទដ្ឋានដែលសំខាន់ចាំបាច់ ដើម្បីទាក់ទាញវិនិយោគ និងលើកស្ទួយដល់ក្រុមហ៊ុនក្នុងស្រុក ប៉ុន្តែវាក៏ផ្អែកផងដែរទៅលើគោលការណ៍ម៉ាក្រូសេដ្ឋកិច្ច រឹងមាំ ដូចដែលបានឆ្លុះបញ្ចាំងនៅក្នុងរបាយការណ៍ IMF និងស្ថាប័នអន្តរជាតិផ្សេងទៀត ក្នុងរយៈពេលប៉ុន្មានឆ្នាំកន្លងមកនេះ ។ លោកថា ៖ « រយៈពេលនេះ កំណើននេះត្រូវបានរំខានតែម្ដងគត់ប៉ុណ្ណោះ ពោលគឺនៅពេលមានវិបត្តិហិរញ្ញវត្ថុនៅក្នុងទស្សវត្សរ៍ចុងក្រោយ ។ ជាកុសល វិបត្តិហិរញ្ញវត្ថុទាំងនោះ មិនមានផលប៉ះពាល់ធ្ងន់ធ្ងរសម្រាប់កម្ពុជាដូចដែលមនុស្សជាច្រើនបារម្ភនោះឡើយ ។ វិស័យទាំងអស់ដែលបានរងផលប៉ះពាល់ដូចជា វិស័យទេសចរណ៍ កាត់ដេរសម្លៀកបំពាក់ និងអចលនទ្រព្យ បានងើបឡើងវិញយ៉ាងល្អប្រសើរ និងក្លាយជាផ្នែកដ៏អំណោយផលនៃសេដ្ឋកិច្ចកម្ពុជាជាថ្មីម្ដងទៀត » ។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងនៅក្នុងកិច្ចប្រជុំកំពូលនោះដែរថា ក្នុងរយៈ ពេលប៉ុន្មានទសវត្សរ៍កន្លងទៅនេះ កម្ពុជាបាន ឆ្លងកាត់ការផ្លាស់ប្តូរគួរឱ្យកត់សម្គាល់ទាំងទិដ្ឋភាពនយោបាយ សន្តិសុខ និងសង្គមសេដ្ឋកិច្ច។ កម្ពុជាបានក្លាយទៅជាកោះសន្តិភាព និងទិសដៅដ៏ល្បីល្បាញមួយក្នុងតំបន់អាស៊ីអាគ្នេយ៍ សម្រាប់ភ្ញៀវទេសចរតំបន់ និងអន្តរជាតិ មកកម្សាន្ត ដែលក្នុងឆ្នាំ ២០១៦កន្លងទៅ កម្ពុជាបានទទួល ភ្ញៀវទេសចរអន្តរជាតិចំនួនប្រមាណ ៥លាននាក់ ក្នុងអត្រាកំណើនប្រមាណ៥% ។
សម្ដេចបន្តថា ៖ « ក្នុងទិដ្ឋភាពសេដ្ឋកិច្ចវិញ កម្ពុជាបានឆ្លងផុតពីប្រទេសដែលមានចំណូលទាប ក្លាយជាប្រទេសដែលមានចំណូលមធ្យមកម្រិតទាប និងត្រូវបានគេចាត់ទុកថាជាប្រទេសជាប់ចំណាត់ល្អ ជាប្រទេសមានកំណើនដ៏រឹងមាំ ពោលគឺកម្ពុជាសម្រេចបានកំណើនក្នុងអត្រាជាមធ្យម៧,៧%ក្នុងមួយឆ្នាំ ក្នុងរយៈពេលជាង២ទសវត្សរ៍កន្លងមក» ៕
ចែករំលែកព័តមាននេះ