រាជធានីភ្នំពេញ ៖ សាលាឧទ្ធរណ៍ កាលពីព្រឹកថ្ងៃទី១៥ ខែកុម្ភៈ បានបើកសវនាការរឿងក្ដីអ្នកស្រី ទេព វន្នី តំណាងសហគមន៍បឹងកក់ និងស្ត្រី៣នាក់ទៀតក្រោមបទចោទ ពាក់ព័ន្ធករណីប្រមាថអ្នករាជការសាធារណៈ និងប្រឆាំងនឹងអ្នករាជការសាធារណៈ មានស្ថានទម្ងន់ទោស ។
សវនាការនេះ ដឹកនាំដោយលោក ញូង ធុល អនុប្រធានសាលាឧទ្ធរណ៍ លោក ប៉ាក ច័ន្ទសំបូរ លោកស្រី យ៉េត ម៉ូលីន ជាចៅក្រមប្រឹក្សា និងលោក ស យសថាវរៈ ជាតំណាងមហាអយ្យការ ។ ក្នុងចំណោមជនជាប់ចោទ៤នាក់ មានតែអ្នកស្រី ទេព វន្នី ម្នាក់ប៉ុណ្ណោះដែលកំពុងជាប់ពន្ធនាគារ រីឯជនជាប់៣នាក់ផ្សេងទៀតរស់នៅក្រៅឃុំ ។
អ្នកស្រី ទេព វន្នី បាននិយាយថា «ពួកខ្ញុំមិនអាចចូលសវនាការជាមួយតុលាការនេះបានទេ ។ បានកាត់ទោសពួកខ្ញុំរងភាពអយុត្តិធម៌បែបនេះទេ ព្រោះភាពអយុត្តិធម៌នេះដែលបង្ហាញពីភាពអសន្តិសុខក្នុងប្រទេស ។ វាមិនផ្តល់សេចក្តីយុត្តិធម៌ដល់ប្រជារាស្ត្រខ្មែរនិងប្រជាពលរដ្ឋទេ ។ ក្នុងនាមជាប្រជាពលរដ្ឋខ្មែរ ត្រូវតែទាមទារឲ្យតុលាការផ្តល់កិត្តិយសដល់ពួកខ្ញុំទាំងអស់គ្នា» ។
គួររំលឹកថា ស្ត្រីបឹងកក់៤នាក់ត្រូវបានសាលាដំបូងរាជធានីភ្នំពេញប្រកាសសាលក្រមកាលពីព្រឹកថ្ងៃទី១៩ ខែកញ្ញា ឆ្នាំ២០១៦ ផ្តន្ទាទោសដាក់ពន្ធនាគារក្នុងម្នាក់ៗ៦ខែ ដោយគ្មានការពិន័យជាប្រាក់នោះទេ ។ លោក លី សុខលេង ចៅក្រមជំនុំជម្រះសាលាដំបូងរាជធានីភ្នំពេញ បានផ្តន្ទាទោសឈ្មោះ ទេព វន្នី ឈ្មោះ បូ ឆវី ឈ្មោះ គង់ ចន្ថា និង ឈ្មោះ ហេង មុំ ។
ជនជាប់ចោទទាំង៤នាក់បានឆ្លើយបដិសេធនាពេលសវនាការថា ពួកគាត់ទាំង៤នាក់មិនបានប្រមាថ និងប្រឆាំងអ្នករាជការសាធារណៈទេកាលពីថ្ងៃនោះ ពួកគាត់គ្រាន់តែយកញត្តិមកដាក់នៅសាលារាជធានីភ្នំពេញតែប៉ុណ្ណោះ ។ ទោះជាយ៉ាងណា លោក ញូង ធុល អនុប្រធានសាលាឧទ្ធរណ៍បានសម្រេចលើកពេលប្រកាសសាដីការរឿងខាងលើនេះទៅព្រឹកថ្ងៃទី២៧ ខែកុម្ភៈ ឆ្នាំ២០១៧ ខាងមុខនេះ ។
តែជនជាប់ចោទមិនសុខចិត្តចំពោះការសម្រេចរបស់សាលាដំបូងរាជធានីភ្នំពេញក៏បានដាក់ពាក្យប្តឹងឧទ្ធរណ៍ប្រឆាំងការសម្រេចនេះ ដែលស្ត្រីទាំង៤នាក់អះអាងថា តុលាការសម្រេចនេះមិនយុត្តិធម៌ចំពោះពួកគាត់ទេ ។ ជនជាប់ចោទបានលើកឡើងថា ពួកគាត់មិនបានប្រព្រឹត្តដូចបទចោទទេ សូមតុលាការដោះលែង ។ នៅខាងក្រៅតុលាការមានអ្នកគាំទ្រជាង១០នាក់ បានទាមទារឲ្យតុលាការដោះលែងជនជាប់ចោទឲ្យមានសេរីភាពវិញ ។
តុលាការបានរកឃើញទោសថា ស្ត្រីជាប់ចោទពីបទ «ប្រមាថអ្នករាជការសាធារណៈ និងបទប្រឆាំងនឹងអ្នករាជការសាធារណៈ មានស្ថានទម្ងន់ទោស» តាមមាត្រា៥០២ និងមាត្រា៥០៤ នៃក្រមព្រហ្មទណ្ឌ ប្រព្រឹត្តនៅមុខសាលារាជធានីភ្នំំពេញ កាលពីថ្ងៃទី២៨ ខែវិច្ឆិកា ឆ្នាំ២០១១ ដែលករណីនេះសាលារាជធានីភ្នំពេញ ជាដើមបណ្ដឹង ៕
ចែករំលែកព័តមាននេះ