កូរ៉េខាងជើងបានធ្វើការសាកល្បងប្រកបដោយជោគជ័យកាលពីថ្ងៃទី១២ កុម្ភៈ នូវមីស៊ីលបាលីស្ទិករំលងទ្វីបមួយដែលនេះជាការបង្កហេតុថ្មីគួរឱ្យព្រួយបារម្ភ ។
ការបាញ់សាកមីស៊ីលនេះធ្វើឡើងមួយខែ ក្រោយពីកូរ៉េខាងជើងប្រកាសថា ខ្លួនត្រៀមធ្វើគ្រប់ពេលការសាកល្បងនោះ ។ យោងតាមក្រសួងការពារជាតិកូរ៉េខាងត្បូងថា មីស៊ីលនេះ រត់ចម្ងាយប្រមាណជា៥០០គីឡូម៉ែត្រ ទៅទិសខាងកើតមុនពេលធ្លាក់ក្នុងសមុទ្រជប៉ុន ។ ទោះបីយ៉ាងណា ចម្ងាយនេះត្រូវបានកម្រិតពុំមែនជាសមត្ថភាពពិតប្រាកដរបស់មីស៊ីលប្រភេទនោះ ហៅមីស៊ីលបាលីស្ទិករំលងទ្វីប ICBM ឡើយ ។
យើងបានបង្ហាញផែនទីមួយពីសមត្ថភាពរបស់មីស៊ីលសំខាន់ៗ ដែលរបបកូរ៉េខាងជើងធ្វើការសាកល្បងចាប់តាំងពីដំណាច់ទសវត្សឆ្នាំ៨០មក ។ ចម្ងាយឆ្ងាយបំផុតរបស់មីស៊ីលទាំងនេះ កំណត់តាមរយៈការវាយតម្លៃមួយរបស់ពួកអ្នកជំនាញការ ហើយសម្រាប់ផែនទីរបស់យើង យើងបានប្រើប្រាស់បណ្តាទិន្នន័យចេញផ្សាយដោយវ៉េបសាយ GLOBALSECURITY.ORG ព្រមទាំងដោយអ្នកជំនាញការរបស់មជ្ឈមណ្ឌលសិក្សាយុទ្ធសាស្ត្រ និងអន្តរជាតិ CSIS ជាមជ្ឈមណ្ឌលមួយបង្កើតឡើងដោយបណ្តាអតីតយោធាអាមេរិក ។
លើផែនទីនេះ យើងកំណត់ថា មីស៊ីល SCUD-C ឬ HWASONG-6 អាចបាញ់បានចម្ងាយ៥០០គីឡូម៉ែត្រ ហើយមីស៊ីល NO-DONG ឬ HWASON-7 អាចបាញ់បានចម្ងាយ១.៥០០គីឡូម៉ែត្រ ។ មីស៊ីលទាំងនេះ ផលិតរវាងឆ្នាំ១៩៨៧ និង១៩៩២ ព្រមទាំងកំពុងប្រើប្រាស់រួចហើយ ។ ចំណែកមីស៊ីលធុន MUSUDAN ឬ HWASONG-10 ត្រូវបានគេវាយតម្លៃថា អាចបាញ់បានចម្ងាយរវាងពី៣.២០០ ទៅ៣.៩០០គីឡូម៉ែត្រ ។ សម្រាប់ពេលនេះ បណ្តាការសាកល្បងមីស៊ីលធុននេះហាក់សុទ្ធតែបរាជ័យ ។ ចំពោះចម្ងាយឆ្ងាយបំផុតដែលមីស៊ីលសាកល្បងកាលពីថ្ងៃទី១២ កុម្ភៈ អាចរត់បានមានដល់ប្រមាណជា១០.០០០គីឡូម៉ែត្រ ហើយជាលើកដំបូងតំណាងឱ្យការគំរាមកំហែងដ៏ពិតប្រាកដមួយសម្រាប់ទ្វីបអាមេរិក ព្រមទាំងអឺរ៉ុប ៕
ចែករំលែកព័តមាននេះ