ខេត្តប៉ៃលិន ៖ យុវជនម្នាក់បានរត់ត្រឡប់មកផ្ទះទាំងបែកពពុះមាត់ស្កុលបណ្ដើរ ក្អួតចង្អោរបណ្ដើរ ហើយប្រាប់ម្តាយថា បានផឹកថ្នាំពុលបា.ញ់ស្មៅសញ្ញាឆ្កែអង្គុយអស់កន្លះកែវជ័រ …
ខេត្តប៉ៃលិន ៖ យុវជនម្នាក់បានរត់ត្រឡប់មកផ្ទះទាំងបែកពពុះមាត់ស្កុលបណ្ដើរ ក្អួតចង្អោរបណ្ដើរ ហើយប្រាប់ម្តាយថា បានផឹកថ្នាំពុលបាញ់ស្មៅសញ្ញាឆ្កែអង្គុយអស់កន្លះកែវជ័របង្កឲ្យមានការភ្ញាក់ផ្អើលកាលពីវេលាម៉ោង៧ និង៣០នាទីព្រឹក ថ្ងៃទី១៤ ខែកុម្ភៈ ឆ្នាំ២០១៧ ស្ថិតនៅភូមិអូរប្រើស សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះឈ្មោះ ចេក ភិរុន ភេទប្រុស អាយុ១៨ឆ្នាំ ជាកសិករ មានឪពុក ឈ្មោះ មុត មុន្នី អាយុ៤៩ឆ្នាំ ម្តាយឈ្មោះ អ៊ុក ចាន់ទី អាយុ៤៨ឆ្នាំ ទាំងអស់គ្នារស់នៅភូមិកើតហេតុ ។
ម្តាយជនរងគ្រោះបានឱ្យសមត្ថកិច្ចដឹងថា មុនពេលកើតហេតុ គាត់បានប្រើកូនប្រុសឱ្យទៅជួយដកដំឡូងមីនៅក្នុងចម្ការរបស់ខ្លួន ហើយសន្យាឱ្យប្រាក់១០ម៉ឺនរៀលសម្រាប់ចាយវាយទិញសម្ភារៈប្រើប្រាស់ផ្ទាល់ខ្លួន លុះក្រោយពីកូនប្រុសបានធ្វើការរួចរាល់ ស្របពេលដែលគាត់អស់ប្រាក់ពីខ្លួន ដោយនៅសល់លុយត្រឹមតែ៥ម៉ឺនរៀលប៉ុណ្ណោះ ហើយក៏ហុចឱ្យកូនរបស់ខ្លួន ។
ម្តាយជនរងគ្រោះបន្តទៀតថា ពេលនោះកូនប្រុសគាត់អត់ព្រមទទួលយកនោះទេ ហើយរករឿង និងស្រែកទារដដែលៗពីគាត់ ធ្វើឲ្យគាត់ទ្រាំមិនបានក៏ស្តីបន្ទោសបន្តិចបន្តួច និងណែនាំប្រាប់កូនឱ្យចាំ២-៣ថ្ងៃទៀត ព្រោះគាត់កំពុងតែជំពាក់បំណុលគេច្រើនណាស់ ។ រហូតដល់ព្រឹកថ្ងៃកើតហេតុ បាត់កូនប្រុសពីផ្ទះ ដើររកប្រើឱ្យធ្វើការងារមិនឃើញសោះ លុះមួយសន្ទុះក្រោយស្រាប់តែឃើញរត់ត្រឡប់មកផ្ទះវិញ ទាំងបែកពពុះមាត់ ក្អួតចង្អោរ ហើយប្រាប់ថា បានផឹកថ្នាំពុលបាញ់ស្មៅសញ្ញាឆ្កែអង្គុយ ។ គ្រាន់តែឃើញកូនស្ថិតក្នុងសភាពបែបនេះភ្លាម គាត់ក៏ប្រញាប់ទាញម៉ូតូដឹកទៅសង្គ្រោះនៅមន្ទីរពេទ្យបង្អែកខេត្តទាន់ពេលវេលា ។
ម្តាយជនរងគ្រោះបញ្ជាក់ទៀតថា រហូតមកដល់ពេលនេះកូនប្រុសរបស់គាត់មានសភាពធូរស្រាលគ្រាន់បើជាងមុនឡើងវិញហើយ ប្រហែលជា២-៣ថ្ងៃទៀតបន្ទាប់ពីតាមដានអាការជំងឺរួច លោកគ្រូពេទ្យនឹងអនុញ្ញាតឱ្យត្រឡប់ទៅផ្ទះវិញហើយ ៕
ចែករំលែកព័តមាននេះ