លោក SEAN SPICER អ្នកនាំពាក្យសេតវិមានថ្លែងកាលពីថ្ងៃទី១៤ កុម្ភៈ ថា ប្រធានាធិបតីអាមេរិក លោកដូណាល់ ត្រាំ គូសបញ្ជាក់យ៉ាងច្បាស់ថា លោករង់ចាំឱ្យរុស្ស៊ីប្រគល់តំបន់គ្រីមេ ទៅឱ្យអ៊ុយក្រែនវិញ ហើយចង់ឃើញការថយចុះនៃអំពើហិង្សានៅអ៊ុយក្រែន ។
លោក SPICER បញ្ជាក់ថា លោកប្រធានាធិបតីត្រាំ និយាយយ៉ាងច្បាស់ថា លោករង់ចាំឱ្យរដ្ឋាភិបាលរុស្ស៊ីកាត់បន្ថយអំពើហិង្សានៅអ៊ុយក្រែន ហើយប្រគល់តំបន់គ្រីមេឱ្យអ៊ុយក្រែនវិញ ។ ទន្ទឹមនឹងនេះ លោកចង់ឱ្យមានការស្រុះស្រួលគ្នាពេញលេញមួយជាមួយរុស្ស៊ី ។
ចំណែកព្រឹទ្ធសមាជិករុស្ស៊ីមួយរូបមានប្រតិកម្មតបវិញថា ចំពោះការទាមទារនេះ ប្រសិនបើរុស្ស៊ីស្នើឱ្យសហរដ្ឋអាមេរិកប្រគល់អាឡាស្កាឱ្យរុស្ស៊ីវិញ តើសហរដ្ឋអាមេរិកយល់បែបណាដែរ? លោកវិកទ័រ អូហ្សឺរ៉ូវ ប្រធានគណៈកម្មាធិការការពារ និងសន្តិសុខរបស់ក្រុមប្រឹក្សាសហព័ន្ធ (ព្រឹទ្ធសភារុស្ស៊ី) ថ្លែងកាលពីថ្ងៃទី១៤ កុម្ភៈ ថា គ្រីមេជារបស់រុស្ស៊ីនឹងនៅតែជារបស់រុស្ស៊ី ហើយវាពុំមែនជាកម្មវត្ថុនៃការផ្លាស់ប្តូរគ្នារវាងក្រុងមូស្គូ និងក្រុងវ៉ាស៊ីនតោនឡើយ ។ យោងតាមលោកអូហ្សឺរូវ អះអាងថា ការអំពាវនាវឱ្យប្រគល់គ្រីមេវាពុំប្រាកដនិយមឡើយ មិនខុសគ្នា ប្រសិនបើរុស្ស៊ីស្នើឱ្យសហរដ្ឋអាមេរិកប្រគល់អាឡាស្កូឱ្យខ្លួនវិញដែរ ៕
ចែករំលែកព័តមាននេះ